ވައިޑް-ބޮޑީ މަތިންދާ ބޯޓާއި ހެލިކޮޕްޓަރުގެ ޚިދުމަތާއެކު ރާއްޖޭގެ އޭވިއޭޝަން ސިނާއަތު ބޮޑު ބަދަލަކާ ދިމާއަށް

ކޮންމެ އަހަރެއްގެވެސް ޑިސެމްބަރ މަހުގެ 7 ވަނަ ދުވަސް ފާހަގަކުރަނީ ބައިނަލްއަޤްވާމީ ސިވިލް އޭވިއޭޝަން ނުވަތަ މަދަނީ އުދުހުންތަކުގެ ދުވަހުގެ ގޮތުގައެވެ. މި ދުވަސް ފާހަގަކުރުމުގެ އެންމެ މުހިންމު އެއް ބޭނުމަކީ އޭވިއޭޝަން ދާއިރާއާއިމެދު އާންމުންގެ މެދުގައި ހޭލުންތެރިކަން އިތުރުކޮށް، މި ދާއިރާގައި ހަރަކާތްތެރިވާ މީހުންގެ އަގު ވަޒަންކުރުމެވެ. ރާއްޖެއަކީ އޭވިއޭޝަންގެ ދާއިރާއިން ގިނަ ކުރިއެރުންތަކެއް ހޯދާފައިވާ ޤައުމެކެވެ. އަދި މިހާރުވެސް މި ދާއިރާގެ ކުރިއެރުމަށް ދަނީ ގިނަ މަސައްކަތްތަކެއް ކުރަމުންނެވެ.

ބައިނަލްއަޤްވާމީ ސިވިލް އޭވިއޭޝަން ދުވަސް ފާހަގަކުރަން ފެށީ މީގެ 80 އަހަރު ކުރިން 1944 ވަނަ އަހަރުއެވެ. މިއަހަރުގެ
މިދުވަހުގެ މިއަހަރުގެ ޝިއާރަކީ "ސޭފް ސްކައިސް، ސަސްޓެއިނަބަލް ފިއުޗަރ: ޓުގެދަރ ފޯރ ދި ނެކްސް 80 އިޔާސް" މިއެވެ.

ރާއްޖޭގެ މަދަނީ އުދުހުންތަކުގެ ފެށުމަކީ ވެލާނާ އެއަރޕޯޓް

ރާއްޖެ އުފެދިފައިވާގޮތުން ޖަޒީރާ ޤައުމަކަށް ވުމާއިއެކު އޭވިއޭޝަންގެ ދާއިރާއަކީ ރާއްޖެއަށް ވަރަށް މުހިންމު ސިނާއަތެކެވެ. ރާއްޖޭގެ އޭވިއޭޝަންގެ ދާއިރާގެ ފެށުމަކީ ވެލާނާ އިންޓަނޭޝަނަލް އެއަރޕޯޓް ހުޅުވިގެންދިޔަ ހިސާބުންނޭ ދެންނެވުމަކީ ދޮގަކަށް ނުވާނެއެވެ. އެއީ 1966 ވަނަ އަހަރުއެވެ. އޭގެފަހުން ރާއްޖޭގެ ސިވިލް އޭވިއޭޝަންގެ ދާއިރާއަށް ދިޔައީ ބޮޑެތި ބަދަލުތަކެއް އަންނަމުންނެވެ.

ރާއްޖޭގެ އޭވިއޭޝަން ސިނާޢަތަށް އިންގިލާބީ ބަދަލުތަކެއް ގެނެސް ފަތުރުވެރިކަން ކުރިއެރުވެން އޮތް އެންމެ މަތީ ފަންތިއަކަށް ކުރިއެރުވުމަކީ މި ސަރުކާރުގެ އަމާޒެއް ކަމަށް ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން މީގެކުރިން ވަނީ ވިދާޅުވެފައެވެ. އަދި އެމަގަށް ސަރުކާރުން ދަނީ މަސައްކަތްކުރައްވަމުންނެވެ.

ސީ-ޓު-އެއަރ ކާގޯ

ރާއްޖޭގެ އޭވިއޭޝަން ދާއިރާއަށް މި ސަރުކާރުން ގެންނަމުންދާ ބަދަލުތަކުގެ ތެރެއިން އެންމެ ފާހަގަކޮށްލެވޭ އެއް ބަދަލަކީ ސީ-ޓު-އެއަރ ކާގޯގެ ޚިދުމަތް ތައާރަފްކުރެއްވުމެވެ. މިއަހަރުގެ މެއި މަހުގެ ތެރޭގައި މުޅިން އައު ސިނާއަތެއްގެ ގޮތުގައި ސީ-ޓު-އެއަރ ކާގޯގެ ޚިދުމަތް ސަރުކާރުން ވަނީ ފަށްޓަވާފައެވެ.

ސީ-ޓު-އެއަރ ކަރގޯ ޚިދުމަތަކީ ކަނޑުމަގުން ރާއްޖެ ގެންނަ މުދާ ރައްކާތެރިކަމާއެކު ބޭނުންވާ މަންޒިލަށް ވައިގެ މަގުން އަވަހަށް ފޯރުކޮށްދިނުމެވެ. ރާއްޖޭގެ ސީ-ޓު-އެއަރ ކާގޯގެ ޚިދުމަތައް މިހާތަނަށް ބައިނަލްއަޤްވާމީ 12 އެއަރލައިނަކުން ވަނީ ބައިވެރިވެފައެވެ. އަދި މި ޚިދުމަތުން މިހާތަނަށް 3 މިލިޔަނަށްވުރެ ގިނަ އެމެރިކާ ޑޮލަރު ރާއްޖޭގެ އިގުތިސާދުގެ ތެރެއަށް ވަދެފައިވާކަމަށް ސަރުކާރުން ވަނީ ވިދާޅުވެފައެވެ.

ވައިޑް-ބޮޑީ މަތިންދާބޯޓު

ޤައުމީ އެއަރލައިންގެ އުދުހުންތައް ފުޅާކުރުމަށް ދަނީ ގިނަ މަސައްކަތްތަކެއް ކުރައްވަމުންނެވެ. އެކަމަށްޓަކައި މޯލްޑިވިއަންގެ ޚިދުމަތައް ވައިޑް-ބޮޑީ މަތިންދާބޯޓު ތައާރަފްކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އަންނަ ޖެނުއަރީމަހު މޯލްޑިވިއަންގެ އުދުހުންތަކުގައި ވައިޑް- ބޮޑީ މަތިންދާ ބޯޓު ބޭނުންކުރަން ފެށުމަށް ސަރުކާރުން އަންނަނީ ތައްޔާރުވަމުންނެވެ.

މިއީ އެއަރކްރާފްޓް ރާއްޖެ ގެނެސް ޚިދުމަތްދޭން ފެށުމަކީ އޭވިއޭޝަންގެ ދާއިރާއިން ރާއްޖެއަށް ލިބޭނެ ބޮޑު ކުރިއެރުމަކަށްވާނެއެވެ. ވައިޑް-ބޮޑީ މަތިންދާބޯޓު ރާއްޖެ ގެނެސް އެންމެ ފުރަތަމަ ދަތުރު ފެށުމަށް ހަމަޖެހިފައިވަނީ ޗައިނާއަށެވެ. އަދި އެއަށްފަހު ޔޫރަޕްގެ މަންޒިލްތަކަށްވެސް ދަތުރުކުރާނެއެވެ. މިއީ ރާއްޖޭގެ ފަތުރުވެރިކަން ފުޅާކުރުމަށް ކުރެވޭނެ މުހިންމު މަސައްކަތެކެވެ.

ހެލިކޮޕްޓަރުގެ ޚިދުމަތް ފެށުން

1990އަހަރުތަކުގެ ކުރީކޮޅުން ފެށިގެން 1999 ވަނަ އަހަރާއި ހަމައަށް ރާއްޖޭގައި ދިޔައީ ހެލިކޮޕްޓަރުގެ ޚިދުމަތް ފޯރުކޮށްދެމުންނެވެ. ނަމަވެސް ދިމާވި ހިތާމަވެރި ބައެއް ހާދިސާތަކަކާއި ގުޅިގެން މި ޚިދުމަތް މެދުކަނޑާލިއެވެ.

ނަމަވެސް ސަރުކާރުން މަސައްކަތް ކުރައްވަމުން ގެންދަވަނީ އަލުން އެ ޚިދުމަތް ފެށުމަށެވެ. އެގޮތުން ފެށޭ އަހަރުގެ މާރިޗު މަހުގެތެރޭގައި ރާއްޖޭގައި ހެލިކޮޕްޓަރު އޮޕަރޭޓްކުރުމަށް ވަނީ އަމާޒުހިފާފައެވެ. މި ޚިދުމަތް ރާއްޖޭގައި ދިނުމަށް، ބައިނަލްއަޤްވާމީ 36 ކުންފުންޏަކުން ވަނީ ޝައުގުވެރިކަން ފާޅުކޮށްފައެވެ.

މި ޚިދުމަތް ފެށުމުން އިމަޖެންސީ ހާލަތުގައި އެއްތަނުން އަނެއްތަނަށް މީހުން އުފުލުމާއި، ފަތުރުވެރިކަމަށްވެސް ފައިދާތަކެއް ކުރާނެއެވެ.

ބޮޑެތި އެއަރލައިންތަކުގެ ޝައުޤު ރާއްޖެއަށް ބޮޑު

ބައިނަލްއަޤްވާމީ ބޮޑެތި އެއަރލައިންތަކުން ރާއްޖެއަށް ދަތުރުތައް ބޭއްވުމަށް ޝަޢުގުވެރިކަން އޮތްކަން ހާމަވަނީ، ރާއްޖެއަށް މިހާރު ދަތުރުކުރާ އެއަރލައިންތަކުގެ އުދުހުންތައް އިތުރުކުރުމާއި، އައު އެއަރލައިންތަކުން ދަތުރުތައް ފެށުމެވެ.

މިގޮތުން އަޒަރުބައިޖާން އެއަރލައިން، އެއަރ އަރަބިއާ، ޗައިނާގެ ޝިއާމެން އެއަރ، ޗައިނާގެ ޗޮންޗިންގ އެއާލައިންސްފަދަ އެއަރަލައިންތަކުން ވަނީ ދަތުރުތައް ފަށާފައެވެ. އަދި މެލޭޝިއާ އެއަރލައިންސްގެ ޝެޑިއުލް ދަތުރުތައް 7 އަހަރަށްފަހު ރާއްޖެއަށް ވަނީ އަލުން ފަށާފައެވެ. މީގެ އިތުރުންވެސް އަލަށް ބައެއް އެހެން އެއަރލައިންތަކުންވެސް ދަތުރުތައް ފެށުމަށް އަންނަނީ ތައްޔާރުވަމުންނެވެ.

މޯލްޑިވްސް މަނިޓަރީ އޮޓޯރިޓީ، އެމްއެމްއޭއިން ކޮންމެ މަހަކު އާންމުކުރާ ރިޕޯޓުން ދައްކާގޮތުން މިއަހަރުގެ ފުރަތަމަ 10 މަސްދުވަހު ރާއްޖެއަށް ދަތުރުކޮށްފައިވާ ބައިނަލްއަޤްވާމީ އެއަރލައިންތަކުގެ ޢަދަދު ވަނީ އިތުރުވެފައެވެ. އެގޮތުން މި މުއްދަތުގައި ބައިނަލްއަޤްވާމީ ފްލައިޓް މޫމަންޓްސް އުޅުނީ 13،671 ގައެވެ. މިދިޔަ އަހަރުގެ މި މުއްދަތުގައި ފްލައިޓް މޫމަންޓްސްއަކީ 13،018އެވެ.

އޭވިއޭޝަން ދާއިރާއަށް މި ސަރުކާރުން ގެންނަމުންދާ ބަދަލުތަކާއެކު ރާއްޖޭގެ ފަތުރުވެރިކަމުގެ ސިނާއަތައްވެސް ބޮޑު ކުރިއެރުމެއް އަންނާނެއެވެ.