ދާޚިލީ ވުޒާރާ މިހާރު ހިނގަމުންދަނީ ނާތީޖާ ނެރެވޭ ގޮތަށް: ވަޒީރު ޢަލީ އިޙުސާން

ދާޚީލީ ވުޒާރާގެ މަސައްކަތްތައް ހިނގަމުންދަނީ ނަތީޖާ ނެރެވޭ އަދި ރައްޔިތުންގެ ރައްކާތެރިކަން ކަށަވަރުކުރެވޭނެ ގޮތަށްކަމަށް ދާޙިލީ ސަލަމާތާއި ފަންނީއްޔާތާބެހޭ ވަޒީރު ޢަލީ އިހުސާން ވިދާޅުވެއްޖެއެވެ.

ވަޒީރު މިހެން ވިދާޅުވީ، ފުލުހުންގެ 37 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތު ބައިވެރިވެވަޑައިގެން، ވާހަކަފުޅު ދައްކަވަމުންނެވެ.

މިރަސްމިއްޔާތު ޝަރަފުވެރިކޮށްދެއްވީ ތަޢުލީމީ ވަޒީރު ޑރ. ޢިސްމާޢި ޝަފީޢުއެވެ. މިރަސްމިއްޔާތުގައި ދާޚިލީ ސަލާމާތާއި ފަންނީއްޔާތާބެހޭ ވަޒީރު ޢަލީ އިހުސާންގެ އިތުރުން، އިންޑިއާގެ ސަރްދާރު ވައްލަބާއި ޕަޓޭލް ނޭޝަނަލް ޕޮލިސް އެކަޑަމީގެ ޑިރެކްޓަރ އަމިތު ގަރްގް ޙާއްސަ މެހެމާނެއްގެ ގޮތުގައި ވަނީ ބައިވެރިވެވަޑައިގަންނަވާފައެވެ.

އައްޑޫސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެން ލޯ އެންފޯސްމަންޓުގައި ބޭއްވި މި ރަސްމިއްޔާތުގައި ވާހަކަ ދައްކަވަމުން ވަޒީރު ޢަލީ އިހުސާން، ވަނީ ފުލުހުންގެ އަސާސީ ތަމްރީނު ފުރިހަމަ ކުރި އޮފިސަރުން ހަވާލުވަނީ ބޮޑު ޒިންމާއެއްކަން ފާހަގަކުރައްވާފައެވެ. އަދި އެ ޒިންމާ އަދާކުރުމުގައި، ނަޒާހަތްތެރިކަމާއެކު މަސައްކަތް ކުރުމަށް ވަޒީރު ގޮވާލެއްވިއެވެ.
މީގެ އިތުރުން، ފުލުހުންގެ ޚިދުމަތުން މިވީ އެއް އަހަރު ތެރޭގައި ގިނަ ކާމިޔާބީތައް ހާސިލްކޮށްފައިވާއިރު، އެއަށް ވުރެ ބޮޑު ކާމިޔާބީތަކެއް ހާސިލްކުރުމަށް މަސައްކަތް ކުރުމަށް ވަޒީރު ގޮވާލެއްވިއެވެ. ވާޒީރު ވިދާޅުވީ ދާޚިލީ ވުޒާރާ މިހާރު އެކުލަވާލެވިފައިވަނީ ނަތީޖާ ނެރެވޭނެހެން ރައްޔިތުންގެ ރައްކާތެރިކަން ކަޝަވަރު ކުރެވޭގޮތަށް ކަމަށެވެ.

މި ރަސްމިއްޔާތުގެ ތެރެއިން ވަޒީރު އަލީ އިހުސާން ވަނީ، އިންޑިއާ ސަރުކާރުގެ އެހީގައި އައްޑޫގައި ތަރައްޤީކޮށްފައިވާ ފުލުހުންގެ ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމެންޓުގެ މަރާމާތުގެ މަސައްކަތަށް އިންޑިއާ ސަރުކާރުން 130.9 މިލިޔަން ރުފިޔާ ނުވަތަ 8.5 މިލިޔަން ޑޮލަރުގެ އެހީއެއް ދިނުމަށް ނިންމަވާފައިވާކަން ހާމަކުރެއްވިއެވެ.