ހިޔާ ފްލެޓުގެ ޓަވަރަކުން ކުޑަކުއްޖަކު ވެއްޓި ނިޔާވެއްޖެ

ހިޔާ ފްލެޓުގެ ޓަވަރަކުން ކުޑަކުއްޖަކު ވެއްޓި ނިޔާވެއްޖެއެވެ.

ފުލުހުން ވިދާޅުވީ، ހިޔާ ޓަވަރަކުން ވެއްޓި ނިޔާވެފައިވަނީ 16 އަހަރުގެ ކުޑަކުއްޖެއް ކަމަށެވެ. އެ ކުއްޖާ ވެއްޓިފައިވަނީ ހިޔާގެ ފަސް ވަނަ ޓަވަރުން ކަމަށްވެސް ފުލުހުން މައުލުމާތު ދެއްވައެވެ.

ފުލުހުން ވިދާޅުވިގޮތުގައި މިހާދިސާ ހިނގައިގެން އުޅޭކަމުގެ މައުލޫމާތު ލިބިފައިވަނީ ރޭ ދަންވަރު 1:26 ހާއިރު ކަމަށެވެ.

ވެއްޓިފައިވަނީ 16 އަހަރުގެ ދިވެހި ފިރިހެން ކުއްޖެއް ކަމަށާއި އެ ކުއްޖާ ވެއްޓިފައި ވަނީ އެ އިމާރާތުގެ 13 ވަނަ ފަންގިފިލާއިން ކަމަށް ފުލުހުން ވިދާޅުވެއެވެ.

ކުއްޖާ ހޮސްޕިޓަލަށް ގެންދިޔައިރު ވެސް ނިޔާވެފައިވާ ކަމަށް ހުޅުމާލެ ހޮސްޕިޓަލުން މައުލޫމާތު ދިންކަމަށްވެސް ފުލުހުން ވިދާޅުވެއެވެ. މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.

ހިޔާ ޓަވަރުން ވެއްޓި ކުޑަކުއްޖަކު ނިޔާވެފައިވާއިރު މިދިޔަ އަހަރުގެ އޮކްޓޫބަރު މަހުގެ ތެރޭގައިވެސް 15 އަހަރުގެ ކުޑަކުއްޖަކު ހިޔާ ޓަވަރަކުން ވެއްޓި ނިޔާވެފައިވެއެވެ.