އިއްޔެ މާލޭގައި 3 މާރާމާރީއެއް، މައްސަލަތައް ތަހުގީގުކުރަނީ

އިއްޔެ މާލޭގައި 3 މާރާމާރީއެއް ރިޕޯޓް ކޮށްފައިވާ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުން މީޑިއާތަކާ ހިއްސާކުރެއްވި މެސެޖެއްގައި ވިދާޅުވީ އިއްޔެ 3 މާރާމާރީއެއް ހިންގީ މާލޭގެ ތިން ސަރަހައްދެއްގައި ކަމަށެވެ. މި 3 މައްސަލަވެސް ފުލުހުންނަށް ރިޕޯޓްކޮށްފައިވަނީ ރޭގެ ވަގުތެއްގައި ކަމަށްވެސް ވިދާޅުވިއެވެ.

ފުލުހުން ވިދާޅުވި ގޮތުގައި އެ އިދާރާއަށް ރިޕޯޓްކޮށްފައިވަނީ ހެލްމެޓް އަޅައިގެން ތިބި ބަޔަކު ދި ރިޕަބްލިކް ކެފޭއަށް ރޭ ވަދެ، މާރާމާރީ ހިންގި މައްސަލައަކާއި ކިންޒާ ކެފޭ ކުރިމަތީގައި ތޫނު ހަތިޔާރު ބޭނުންކޮށްގެން 6 މީހަކު މާރާމާރީ ހިންގި މައްސަލައެއްގެ އިތުރުން ނޫރު މިސްކިތް ކައިރީގައި ބަޔަކު މާރާމާރީ ހިންގި މައްސަލައެއްކަމަށެވެ.

މި 3 މާރާމާރީގެ އިތުރުން މިދިޔަ ބުރާސްފަތި ދުވަހު ލެޓްސް ގޯ ކެފޭއަށް ބަޔަކު ވަދެ ގެއްލުންދިން މައްސަލައެއްގެ ރިޕޯޓްވެސް ފުލުހުންނަށް ލިބިފައިވާކަމަށް ވިދާޅުވިއެވެ.

މި މައްސަލަތަކާ ގުޅޭ އިތުރު ތަފްސީލެއް ފުލުހުން ނުދެއްވައެވެ. ނަމަވެސް މި ހަތަރު މައްސަލަވެސް އިތުރަށް ތަހުގީގު ކުރަމުން އަންނަ ކަމަށް ފުލުހުންގެ ޚިދުމަތުން ވިދާޅުވިއެވެ.