ސޫރިޔާގެ އައު ސަރުކާރުން ދައްކަމުންދާ ބިނާކުރަނިވި ވާހަކަތަކުގެ މައްޗަށް ބިނާކޮށް، ވެރިކަން ކުރުމުގެ ފުރުޞަތު ދޭންޖެހޭ ކަމަށާއި، ސަރުކާރުން އެދޭނަމަ، އަސްކަރީ ތަމްރީން ދިނުމަށް ތުރުކީވިލާތުން ތައްޔާރަށް އޮތް ކަމަށް، އެ ޤައުމުގެ ދިފާއީ ވަޒީރު ޔަޝާރު ގުލަރ ވިދާޅުވެއްޖެއެވެ.
ނޭޓޯގެ މެންބަރު ޤައުމެއް ކަމަށްވާ ތުރުކީވިލާތުން ވަނީ، މިދިޔަ ހަފުތާގައި ސޫރިޔާގެ ރައީސް ބައްޝާރް އަލް-އަސަދުގެ ވެރިކަން ވައްޓާލައި، ސޫރިޔާގެ 13 އަހަރުވީ ދާޚިލީ ހަނގުރާމަ ނިމުމަކަށް ގެނައި، ސޫރިޔާގެ ހަނގުރާމެރިންނަށް ތާޢީދުކޮށްފައެވެ. އަދި ތުރުކީވިލާތުގެ ޖާސޫސީ އިދާރާގެ ވެރިޔާ ސޫރިޔާގެ ވެރިރަށަށް ޒިޔާރަތް ކުރެއްވިތާ ދެ ދުވަސް ފަހުން، މިދިޔަ ހޮނިހިރު ދުވަހު ދިމިޝްގުގައި ހުންނަ ތުރުކީވިލާތުގެ އެންބަސީ ވަނީ އަލުން ހުޅުވައިފައެވެ.
"އެ މީހުންގެ ފުރަތަމަ ބަޔާނުގައި، އަސަދުގެ ވެރިކަން ވައްޓައިލި އައު ސަރުކާރުން ވަނީ، ސަރުކާރުގެ ހުރިހާ މުއައްސަސާތަކަށާއި އދ އަދި ބައިނަލްއަޤްވާމީ އެހެން ޖަމްޢިއްޔާތަކަށް އިޙްތިރާމް ކުރާނެ ކަމަށް އިޢުލާންކޮށްފައި،" ވެރިރަށް އަންކާރާގައި ނޫސްވެރިންނާ ވާހަކަ ދައްކަވަމުން ގުލަރ ވިދާޅުވިއެވެ.
"އަޅުގަނޑުމެން ޤަބޫލުކުރާ ގޮތުގައި، އައު ސަރުކާރުން ޢަމަލުކުރާނެ ގޮތެއް ބަލައި، އެ މީހުންނަށް ފުރުޞަތު ދޭން ޖެހޭ ކަމަށް."
ސޫރިޔާގެ އައު ސަރުކާރާ އެކު އަސްކަރީ ގުޅުން ބާއްވަން ގަސްދުކުރޭތޯ ކުރި ސުވާލަށް ޖަވާބު ދެއްވަމުން، ގުލަރ ވިދާޅުވީ، ތުރުކީވިލާތުން ވަރަށް ގިނަ ޤައުމުތަކާ އެކު އަސްކަރީ ގުޅުމާއި ތަމްރީންގެ އެކި ޙަރަކާތްތައް ކުރިއަށް ގެންދާ ކަމަށެވެ.
"އައު ސަރުކާރުން އެދިއްޖެ ނަމަ، އެކަމަށް ބޭނުންވާ އެހީތެރިކަން ފޯރުކޮށްދިނުމަށް [ތުރުކީވިލާތް] އޮތީ ތައްޔާރަށް،" އޭނާ ވިދާޅުވިއެވެ.
ޤައުމީ ސަލާމަތަށް ނުރައްކާ އޮތް ކަމަށް ބުނެ، ތުރުކީވިލާތުން ވަނީ 2016 ވަނަ އަހަރުން ފެށިގެން ސޫރިޔާގެ އުތުރުގެ އެކި ސަރަޙައްދުތަކުގައި ތަފާތު ހަތަރު އަސްކަރީ ޙަރަކާތެއް ހިންގައިފައެވެ. އަދި އޭގެ ގިނަ ސަރަޙައްދުތަކުގައި ތުރުކީވިލާތުގެ ސިފައިން މިހާރު ވެސް ދަނީ ހަރަކާތްތެރިވަމުންނެވެ.
ނަމަވެސް، ސޫރިޔާގެ ސަރަޙައްދުތަކުގައި ތިބި ތުރުކީވިލާތުގެ ސިފައިން ފޭބުމާ ގުޅޭގޮތުން އައު ސަރުކާރާ އެކު މަޝްވަރާކުރާނެ ދޮރު ހުޅުވިފައިވާ އޮތް ކަމުގެ އިޝާރާތެއް ވެސް އޭނާ ވަނީ ދެއްވައިފައެވެ.
ގުލަރ ވިދާޅުވި ގޮތުގައި، މި ވަގުތަށް އެންމެ އިސްކަމެއް ދެނީ އެމެރިކާއިން ވާގިދޭ ކުރުދީންގެ ޕީޕަލްސް ޕްރޮޓެކްޝަން ޔުނިޓްސް (ވައިޕީޖީ)ގެ ހަނގުރާމަވެރިން ބަލިކުރަން ކަމަށާއި، އެ ކަން އެމެރިކާގެ ސަރުކާރާ ވެސް ވަނީ ޙިއްސާކޮށްފައެވެ.
އެމެރިކާއާއި ތުރުކީވިލާތުން، ސޫރިޔާގެ 13 އަހަރުވީ ދާޚިލީ ހަނގުރާމައިގައި ސޫރިޔާގެ ހަނގުރާމަވެރިންނަށް ވާގިދިން ނަމަވެސް، ކުރުދީން އިސްވެ އުފައްދާފައިވާ ސީރިއަން ޑިމޮކްރެޓިކް ފޯސަސް (އެސްޑީއެފް)އާ ގުޅޭ ގޮތުން އެ ދެ ޤައުމުގެ މެދުގައި ވަނީ ދެބަސްވުން އުފެދިފައެވެ.
އައިއެސްގެ ހަނގުރާމަވެރިންނާ ދެކޮޅަށް އެމެރިކާގެ އެންމެ ވަރުގަދަ ހަތިޔާރަކީ އެސްޑީއެފްއެވެ. ނަމަވެސް، ތުރުކީވިލާތުން ޤަބޫލުކުރާ ގޮތުގައި، އެސްޑީއެފަކީ ވައިޕީޖީގެ ފަހަތުގައި އޮތް ކުރުދީސްތާން ވޯކަރސް ޕާޓީ (ޕީކޭކޭ) ގޮތްޕެކެވެ. ޕީކޭކޭއަކީ، ފާއިތުވި 40 އަހަރު ތުރުކީވިލާތާ ދެކޮޅަށް ހަނގުރާމަ ކުރަމުންދާ ޖަމާޢަތެކެވެ.
ކުރިއަށް އޮތް ތަނުގައި، ޕީކޭކޭ/ވައިޕީޖީގެ ނިރުބަވެރި ޖަމާޢަތް ނައްތާލާނެ ކަމަށް ގުލަރ ވިދާޅުވިއެވެ.
ސޫރިޔާއަށް އައިއެސްގެ ހަނގުރާމަވެރިން އަލުން އަތްގަދަކޮށްފާނެކަމުގެ ކަންބޮޑުވުން އެމެރިކާއިން ފާޅުކޮށްފައިވީ ނަމަވެސް، އެކަމުގެ އެއްވެސް ނިޝާނެއް އަދި ނުފެންނަ ކަމަށް ގުލަރ ވިދާޅުވިއެވެ.