ޤައުމިއްޔަތަށް އިސްކަން ދިނުމާއެކު ތަޢުލީމީ ދާއިރާ އާ މިސްރާބަކަށް

ޤައުމު ތަރައްޤީ ކުރުމުގެ އެންމެ މުހިންމު ދައުރެއް އަދާކުރާނެ އެއް ބަޔަކީ ޢިލްމީ ޤާބިލު ދަރިވަރުންނެވެ. އެކަމަށްޓަކައި ތަޢުލީމީ ދާއިރާ ހަރުދަނާވެ ކުރިއަރަންޖެހެއެވެ.

ޢުމްރާނީ ގޮތުން ތަރައްޤީ ގެނައުމާއި ފެންވަރު ރަނގަޅު މުދައްރިސުން ބިނާކޮށް ވަށާޖެހޭ ތަޢުލީމެއް ދަރިވަރުންނަށް ސްކޫލް މާހައުލުން ފޯރުކޮށްދޭންޖެހެއެވެ. އަދި ދަރިވަރުންނަކީ ކިޔެވުމަށް މޮޅު ބަޔަކަށް ހެދުމުގެ އިތުރަށް އެއީ އެހެން މީހުންނަށް އިޙްތިރާމްކުރާ، ދިވެހި ޤައުމާއި އިސްލާމްދީނަށް ލޯބި ކުރާ ދަރިވަރުންތަކަށްވެސް ހަދަންޖެހެއެވެ. އެމަގަށް ވާޞިލުކުރުމަށްޓަކައި ތަޢުލީމީ ދާއިރާއިން 2024 ވަނަ އަހަރު މުހިންމު ގިނަ މަސައްކަތްތަކެއް ކުރައްވާފައިވެއެވެ.

ދިރާސީ އަހަރުގެ ކިޔެވުން އިހު އޮތްގޮތަށް ބަދަލުކުރުމަށް ނިންމެވުން

މީލާދީ އަހަރުގެ މެދުތެރޭ ދިރާސީ އަހަރުގެ ކިޔެވުން ފަށާގޮތަށް ބަދަލުކުރީ 2021 ވަނަ އަހަރުއެވެ. މި ބަދަލު ގެނައުމާ ގުޅިގެން ދިރާސީ އަހަރުގެ ކިޔެވުން ފެށީ އޯގަސްޓު މަހުއެވެ. އޭގެފަހުން 2024 ވަނަ އަހަރާ ހަމައަށް ދިރާސީ އަހަރުގެ ކިޔެވުން ފަށަމުން އައީ އޮގަސްޓު މަހުއެވެ. ނަމަވެސް މިގޮތަށް ބަދަލުކޮށްފައިވަނީ އެކަމަށް ޚިޔާލު ހޯދި މީހުންގެ ތެރެއިން %70 މީހުންގެ ޚިޔާލާ ދެކޮޅަށެވެ.

އެހެންކަމުން ސަރުކާރުން ނިންމެވީ 2026 ވަނަ އަހަރު، ދިރާސީ އަހަރުގެ ކިޔެވުން ޖެނުއަރީ މަހު ފަށާގޮތަށެވެ.

މުދައްރިސުންގެ މަައްސަލަ ހައްލުކުރުމުގެ މަސައްކަތް

ރާއްޖޭގައި ތަޢުލީމީ ދާއިރާގައި އޮތް އެންމެ ބޮޑު އެއް ގޮންޖެހުމަކީ ދޭސީ މުދައްރިސުން ލިބުމުގެ ދަތިކަމެވެ. ތަޢުލީމީ ދާއިރާއަށް ދެހާހަށްވުރެ ގިނަ ދޭސީ މުދައްރިސުން އަދިވެސް ބޭނުންވެއެވެ. ހަމައެކަނި ޕްރައިމަރީ ގްރޭޑްތަކަށް ކިޔަވައިދިނުމަށްވެސް 250 އެއްހާ މުދައްރިސުން ބޭނުންވެއެވެ.

މުދައްރިސުންގެ މައްސަލައަށް ހައްލެއް ހޯދުމުގެ ގޮތުން 2024 ވަނަ އަހަރުވަނީ މުދައްރިސުން ތަމްރީންކުރުމުގެ ޤައުމީ ޕްރޮގްރާމެއް ފަށާފައެވެ. އެގޮތުން 135 ދަރިވަރަކަށް މުދައްރިސުކަން ކިޔެވުމަށް ވަނީ ސްކޮލަރޝިޕްގެ ފުރުޞަތު ތަނަވަސްކޮށްދީފައެވެ. މީގެ އިތުރުން ސާނަވީ ގްރޭޑްތަކުގައި އިނގިރޭސި، ސައިންސް އަދި ހިސާބު މާއްދާ ކިޔަވައިދޭ މުދައްރިސުންނަށް ޚާއްސަކޮށްގެން ތަމްރީން ޕްރޮގްރާމްތައް ވަނީ ހިންގާފައެވެ.

ސަރުކާރުން ވަނީ މުދައްރިސުންގެ ނަފްސާނީ ދުޅަހެޔޮކަމަށްޓަކައި މުދައްރިސުން ސްކޫލްގައި ހޭދަކުރާ ވަގުތު ވަކިމިންގަނޑެއްގައި ހިފެހެއްޓުމުގެގޮތުން ހުކުރު ދުވަހަކީ ސްކޫލްތަކުގައި ހަރަކާތްތައް ނުހިންގާ ދުވަހެއްގެ ގޮތުގައި ކަނޑއަޅުއްވާފައެވެ. މީގެ އިތުރުން މުދައްރިސުންގެ ނަފްސާނީ ދުޅަހެޔޮކަމަށްޓަކައި މެންޓަލް ހެލްތް ހެލްޕްލައިން 1418ގެ ޚިދުމަތް މުދައްރިސުންނަށް ލިބޭނެ ގޮތް ވަނީ ހަމަޖައްސާފައެވެ.

"ޤައުމިއްޔަތު" ވަކި މާއްދާއެއް

އަދުގެ ޖީލަކީ ޤައުމުދެކެ ލޯބިވާ ދިވެހިންގެ ތާރީޚު ދަންނަ ދަރިވަރުންތަކަށް ހެދުމަށްޓަކައި ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ޤަައުމިއްޔަތު ވަކި މާއްދާއެއްގެ ގޮތުގައި ކިޔަވައިދިނުމުގެ ޕައިލެޓް ޕްރޮގްރާމެއް 2024 ވަނަ އަހަރު ވަނީ ފަށްޓަވާފައެވެ. މިހާރު މި މާއްދާ ކީ ސްޓޭޖް 1 އަދި 2 ގެ ދަރިވަރުންނަށް ކިޔަވައި ދެމުންދިޔަނަމަވެސް ކުރިއަށް އޮތްތަކުގައި މިކަންވެސް ފުޅާ ކުރެއްވުމަށް ވަނީ ނިންމަވާފައެވެ.

"ރިވެލި" މަޝްރޫޢު

ރާއްޖެއިން ބޭރުގައި ދިރިއުޅޭ ދިވެހި ދަރިވަރުންނަށް ދިވެހި ބަސް ދަސްކޮށްދިނުމުގެ ޕްރޮގްރާމް"ރިވެލި" މަޝްރޫޢުއެއް 2024 ވަނަ އަހަރު ވަނީ ފަށާފައެވެ. އެގޮތުން މިހާތަނަށް 4 ޤައުމެއްގައި އުޅޭ ދިވެހިންނަށް މި ޕްރޮގްރާމް ކުރިއަށް ގެންދެއެވެ. އެއީ ޔޫއޭއީ، އޮސްޓްރޭލިއާ، މެލޭޝިޔާ އަދި ސިންގަޕޫރުގައި ދިރިއުޅޭ ދިވެހިންނަށެވެ.

ޢުމްރާނީ މަސައްކަތްތައް

ސަރުކާރު ހަވާލުވިއިރު ރާއްޖޭގެ އެކި ސަރަހައްދުތަކުގެ ސްކޫލްތަކުގައި ތަފާތު 107 މަޝްރޫޢެއް ފަށާފައި އޮތެވެ. ނަމަވެސް އޭގެ ތެރެއިން ގިނަ މަޝްރޫޢުތަކުގައި ކޮންޓްރެކްޓަރުންނަށް ދޭންޖެހޭ ފައިސާ ނުދިނުމުގެ ސަބަބުން އޮތީ މަޑުޖެހިފައެވެ. އެހެންކަމުން 2024 ވަނަ އަހަރު ވަނީ ހުއްޓިފައި އޮތް މަޝްރޫޢުތައް ފެށުމަށްޓަކައި ކުންފުނިތަކަށް ދޭންޖެހޭ ފައިސާ ހަވާލުކޮށްފައެވެ. މިއާއެކު ގިނަ މަޝްރޫޢުތައް ކުރިއަށްދަން ފެށިއެވެ.

ޢުމްރާނީ ވަޞީލަތްތައް ޤާއިމްކުރުމުގެ މަސައްކަތުގެ ދަށުން ހުޅުމާލެ ދެވަނަ ފިޔަވަހީގައި އައު ސްކޫލެއް އިމާރާތްކުރުމުގެ މަސައްކަތް 2024 ވަނަ އަހަރުގެ ކުރީކޮޅު ފެށިއެވެ. މީގެ އިތުރުން ޢަރަބިއްޔާ ސްކޫލް އިމާރާތްކުރުމަށްޓަކައި ކުރިން ހަވާލުކޮށްފައި އޮތް ވަރަށްވުރެ 83 މިލިޔަން ރުފިޔާ އަގު ހެޔޮކޮށް އެ މަޝްރޫއު ވަނީ ފަށާފައެވެ. މިފަދަ ބޮޑެތި މަޝްރޫޢުތަކުގެ އިތުރަށް ކްލާސްރޫމްތަކުގައި ދަރިވަރުންނަށް ހިތްހަމަޖެހިގެން ކިޔަވަން ތިބޭ ތަނަކަށް ހެދުމުގެ މަޤްޞަދުގައި ކްލާސްރޫމްތައް ފިނިކުރުމަށްޓަކައި އޭސީ ހަރުކުރުމުގެ މަސައްކަތްތައް ވަނީ ފަށާފައެވެ.

މިއީ ވޭތުވެދިޔަ 2024 ވަނަ އަހަރު ތަޢުލީމީ ދާއިރާއިން ކުރެއްވި މުހިންމު ބައެއް މަސައްކަތްތަކެވެ.

2024 ވަނަ އަހަރު ތަޢުލީމީ ދާއިރާގެ މަޝްރޫޢުތައްވެސް ހިންގީ ބަޖެޓުގެ ދަތިކަމާއެކުއެވެ. ނަމަވެސް އައު އަހަަރށް ކުރެވޭ އުންމީދު ބޮޑެވެ. ރައީސުލްޖުމްހޫރިއްޔާ ދެއްވާފައިވާ ޔަޤީންކަމަކީ 2025 ވަނަ އަހަރަކީ ތަޢުލީމީ ދާއިރާއިން އެމަނިކުފާނު ވެވަޑައިގެންފައިވާ ހުރިހާ ވަޢުދެއް ފުއްދެވުމުގެ އަހަރަށް ވާނެކަމެވެ، ޢުމްރާނީ ގޮތުން ގިނަ މަޝްރޫޢުތަކެއް ފެށޭނެ އަހަރަށް ވާނެކަމެވެ.