ރަޝިޔާއިން ދޭ ޙަމަލާތަކުގައި އުތުރު ކޮރެޔާގެ ސިފައިން ބޭނުންކުރާ ޢަދަދު އިތުރުކޮށްފައިވާ ކަމަށް ބުނެފި
ރަޝިޔާގެ ކޫރްސްކް ސަރަޙައްދަށް ޔޫކްރައިނުން އަތްގަދަ ކުރުމަށް ދެމުންދާ ޙަމަލާތަކާ ދެކޮޅަށް ރަޝިޔާއިން ދޭ ޙަމަލާތަކުގައި ގިނަ ޢަދަދަކަށް އުތުރު ކޮރެޔާގެ ސިފައިން ބޭނުންކުރަން ފަށާފައިވާ ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ.
މިދިޔަ އޮގަސްޓު މަހު ޔޫކްރެއިންގެ ސިފައިންގެ ލަޝްކަރެއް ރަޝިޔާގެ ހުޅަނގު ކޫރްސްކް ސަރަޙައްދަށް އަރައިގަނެ، ރަޝިޔާގެ ސަރަޙައްދުތަކަށް އަތްގަދަ ކުރަން ވަނީ ފަށައިފައެވެ. އެ ސަރަޙައްދުގެ ބާރު ޔޫކްރެއިނުގެ އަތްދަށުގައި ބޭއްވުމަށް ގިނަ މަސައްކަތްތަކެއް އެ ޤައުމުން ކުރަމުންދާ އިރު، ރަޝިޔާގެ ސިފައިންނަށް އެހީތެރިކަން ފޯރުކޮށްދިނުމަށް އުތުރު ކޮރެޔާއިން ސިފައިން ފޮނުވާފައިވާ ކަމުގައި ޔޫކްރެއިނުން ފުރަތަމަ ތުހުމަތު ކުރީ މިދިޔަ އޮކްޓޯބަރު މަހުގެ ތެރޭގައެވެ. ޔޫކްރެނުން ބުނީ ރަޝިޔާގެ ބިޔަ ފައުޖުތަކާ އެއް ސަފެއްގައި ހަނގުރާމަ ކުރުމަށް އުތުރު ކޮރެޔާގެ 11،000އަށް ވުރެ ގިނަ ސިފައިން އެ ޤައުމުން ފޮނުވާފައިވާ ކަމަށެވެ. ނަމަވެސް އުތުރު ކޮރެޔާގެ ސިފައިން ރަޝިޔާ ސިފައިންނާ ބައިވެރިވާ ކަން ނުވަތަ ނޫން ކަމެއް ރަޝިޔާއިން ކަށަވަރު ކޮށްދީފައެއް ނުވެއެވެ.
އެ ތުހުމަތުތައް އަލުން ތަކުރާރު ކުރައްވާ ޒެލެންސްކީ ވިދާޅުވީ ޙަމަލާތައް ދިނުމުގައި ރަޝިޔާއިން ބޭނުން ކުރަމުންދާ އުތުރު ކޮރެޔާގެ ސިފައިންގެ ޢަދަދު މިހާރު ވަރަށް ބޮޑަށް އިތުރު ކޮށްފައިވާ ކަމަށެވެ. އެއީ ހަނގުރާމައިގެ ޙާލަތު އިތުރަށް ގޯސް ކޮށްދޭ ކަމެއް ކަމަށާއި އެ ކަން ދުނިޔޭގެ ސަމާލުކަމަށް ގެންނަވަން ބޭނުންވާ ކަމަށް އޭނާ ވިދާޅުވިއެވެ. ރަޝިޔާއިން އުތުރު ކޮރެޔާއިން ހަނގުރާމައިގައި ބައިވެރިކުރުން ކުށްވެރި ކުރައްވާ ޒެލެންސްކީ އިތުރަށް ވިދާޅުވީ ރަޝިޔާއިން ހަނގުރާމައިގެ ތެރެއަށް އިތުރު ދައުލަތެއް ވައްދައިފައިވާ ކަމަށެވެ. އަދި އެއީ ހަނގުރާމައިގެ ޙާލަތު ގޯސްކުރުން ނޫން ކޮން ކަމެއްތޯ އޭނާ ވަނީ ސުވާލު ކުރައްވައިފައެވެ.
ރައީސް ޒެލެންސްކީ ވިދާޅުވީ ރަޝިޔާއިން އުތުރު ކޮރެޔާގެ ސިފައިން މި ވަގުތު ބޭނުންކުރަމުން ދަނީ ހަމައެކަނި ކޫރްސްކް ސަރަޙައްދުގައި ކަމަށެވެ. ނަމަވެސް ކުރިއަށް އޮތް ދުވަސްތަކުގައި އެ ނޫން ވެސް ސަރަޙައްދުތަކުގައި އުތުރު ކޮރެޔާގެ ސިފައިން ބޭނުން ކުރާނެކަމުގެ މަޢުލޫމާތު ލިބިފައިވާ ކަމަށް އޭނާ ވިދާޅުވިއެވެ.
ޔޫކްރެއިންގެ ޖެނެރަލް ސްޓާފުން ބުނީ ކޫރްސްކަށް ރަޝިޔާއިން ދެމުންދާ ޙަމަލާތައް ވަރަށް ބޮޑަށް އިތުރުވެފައިވާ ކަމަށާއި އޭގެ ތެރޭގައި ވައިގެ ޙަމަލާތަކާއި ގްލައިޑު ބޮން ރެއިޑުތަކާއި 200އަށް ވުރެ ގިނަ ބަޑީގެ ޙަމަލާ ހިމެނޭ ކަމަށެވެ. ޔޫކްރެއިނުގެ ޤައުމީ ސަލާމަތާއި ދިފާޢުއާބެހޭ ކައުންސިލްގެ އިސް ވެރިއެއް ކަމަށްވާ އަންދްރީ ކޮވަލެންކޯ ވިދާޅުވީ ބަދަލު ކުރަމުންދާ ޙަމަލާތަކުގައި އުތުރު ކޮރެޔާގެ ސިފައިން ވެސް މަރުވަމުންދާ ކަމަށެވެ.
"ރަޝިޔާއިން ބަރޯސާވަމުންދަނީ އެމީހުންގެ [ބިޔަ] ނަންބަރުގެ މައްޗަށް. އެ ޤައުމުން ބޭނުންވަނީ އުތުރު ކޮރެޔާގެ ސިފައިން ބޭނުންކޮށްގެން ޙަމަލާތައް ދޭން. ކޮރެޔާ ސިފައިންގެ މަސައްކަތަކީ އަޅުގަނޑުމެންގެ ފައުޖުތަކުގެ ޙަމަލާތަކުން ރެކި، ވަކި ސަރަޙައްދުތަކެއް ހިފުން،" ކޮވަލެންކޯ ވިދާޅުވިއެވެ.