ޔަހޫދީ ދައުލަތުން އިސްތިޢުމާރު ކޮށްފައިވާ ޖޫލާންގެ އުސް ބިންތަކުގައި ތިބި ޔަހޫދީންގެ ޢަދަދު ދެ ގުނައަށް އިތުރުކުރާނެ ކަމަށް ބުނެފިއެވެ.
ސޫރިޔާގެ ބިމެއް ކަމުގައިވާ ޖޫލާންގެ އުސް ބިންތަކަށް ޔަހޫދީން އަތްގަދަ ކޮށްފައި ވަނީ 1967ވަނަ އަހަރުގެ ހަ ދުވަހުގެ ހަނގުރާމައިގައެވެ. އަދި, 1981ވަނަ އަހަރު ޔަހޫދީން ވަނީ އެ ސަރަޙައްދަށް ވެރިވެގަނެ، އެއީ ޔަހޫދީންގެ ބިމެއްގެ ގޮތުގައި ކަނޑައަޅައިފައެވެ. އެއީ ބައިނަލްއަޤުވާމީ ޤާނޫނުތަކާ ޚިލާފަށް ޔަހޫދީން ހިންގާފައިވާ ޢަމަލެކެވެ. ޔަހޫދީ ލަޝްކަރު ޖޫލާންގެ އުސް ބިންތަކުން ފޭބުމަށް ސޫރިޔާއިން ގޮވާލަމުން ދިޔަ ނަމަވެސް ޔަހޫދީން ދެނީ ބީރު ކަންފަތެވެ.
ފާއިތުވި 13 އަހަރު ސޫރިޔާގައި ވެރިކަން ކުރައްވަމުން ދިޔަ ބައްޝާރު އަލް-އަސަދުގެ ވެރިކަން ވެއްޓުމުން، ދަނޑިވަޅުގެ ބޭނުން ހިފައި ސޫރިޔާގެ ޙާލަތު ގަޑުބަޑުކުރުމަށް ޔަހޫދީ ދައުލަތުން ވަނީ މަސައްކަތް ފަށައިފައެވެ. އެ ގޮތުން އަސަދުގެ ވެރިކަން ވެއްޓުމާއެކު ޔަހޫދީ ފައުޖުތަކުން ވަނީ ސޫރިޔާގެ ބައެއް ސަރަޙައްދުތަކަށް އަރައިފައެވެ. ހައްދުފަހަނައެޅި ފައުޖުތަކުން ވަނީ ސޫރިޔާއާއި ލުބުނާނުގެ ސަރަޙައްދީ ރޮނގު ކައިރީ އޮންނަ ފަރުބަދަ، ޖަބަލް އަލް-ޝައިޚުގެ ބައެއް ސަރަޙައްދުތަކާއި، އެ ސަރަޙައްދުގައި ސޫރިޔާގެ އަސްކަރިއްޔާއިން ޤާއިމު ކޮށްފައިވާ އަސްކަރީ މަރުކަޒުކަށް ވެސް އަތްގަދަ ކޮށްފައެވެ. ސޫރިޔާގެ ވެރިކަން ވައްޓާލި އިދިކޮޅު ހަނގުރާމަވެރި ޖަމާޢަތްތަކުން ހަރުކަށި އުޞޫލުތައް ގެންގުޅޭ ތަން ނުފެނުނު ނަމަވެސް ޔަހޫދީ ދަޢުލަތުން ބުނަމުން ދަނީ ސޫރިޔާގެ ފަރާތުން ޔަހޫދީ ދައުލަތަށް މި ޙާލަތުގައި ޙަމަލާތަކެއް އަމާޒު ވެދާނެ ކަމަށެވެ. ސޫރިޔާގައި ޔަހޫދީ ދައުލަތުން ޙަރަކާތްތެރި ވަނީ އެ ޤައުމުގެ ފަރާތުން ކުރިމަތި ވެދާނެ ނުރައްކަލަކުން ރައްކާތެރި ވުމަށް ކަމަށާއި ސޫރިޔާއަށް ޔަހޫދީ ދައުލަތުގެ އެއްވެސް ޝައުޤެއް ނެތް ކަމަށް ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ބުނެއެވެ.
ނަމަވެސް ސޫރިޔާގައި މިހާރު ވެރިކަން ކުރާ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ އަސްކަރީ ކޮމާންޑަރު އަޙްމަދު އަލް-ޝަރާޢު ނުވަތަ އަބޫ މުޙައްމަދު އަލް-ޖޫލާނީ ބުނީ ސޫރިޔާގެ ބައެއް ބިންތަކަށް ވެރިވެގަނެ އެ ޤައުމުގެ ސިޔާދަތީ މިނިވަންކަމާއި އިސްތިޤުލާލަށް އަރައިގަނެފައިވާ ޔަހޫދީ ފައުޖުގެ ހައްދުފަހަނަ އެޅި ސިފައިންނާ ދެކޮޅަށް ހަނގުރާމައެއް ފެށުމުގެ ވިސްނުމެއް މި ވަގުތު ނެތް ކަމުގައެވެ. އަދި މި ވަގުތު އެންމެ އިސްކަމެއް ދެނީ، 13 އަހަރަށް ދެމިގެން ދިޔަ ސޫރިޔާގެ ދާޚިލީ ހަނގުރާމައިގައި ސުންނާފަތި ކޮށްލާފައިވާ ރަށްތައް އަލުން އާރާސްތު ކުރުމަށް ކަމުގައެވެ.
ނަމަވެސް ނަތަންޔާހޫ ނެރުނު ބަޔާނެއްގައި ބުނީ ޖޫލާންގެ އުސް ބިންތަކުގައި ޔަހޫދީންގެ ބާރު ގަދަ ކުރުމަކީ ޔަހޫދީ ދައުލަތުގެ ބާރު ގަދަކުރުން ކަމުގައެވެ. އަދި އެއީ މި ވަގުތަށް ވަކިން މުހިންމު ކަމެއް ކަމަށް އޭނާ ފާހަގަ ކުރިއެވެ. ޖޫލާންގެ އުސް ބިންތަކުން ޔަހޫދީން ނުފައިބާނެ ކަމަށާއި އެ ތަނުގައި ޤާއިމުވެ ތިބެ އެ ސަރަޙައްދު ކުރިއަރުވައި އެ ތަނުގައި ވަޒަންވެރި ވާނެ ކަމަށް ވެސް އޭނާ ބުނެއެވެ.
ޖޫލާން އުސްބިންތަކުހައި މިހާރު ވެސް ޔަހޫދީ ދައުލަތަށް ނިޞްބަތްވާ 31،000އަށް ވުރެ ގިނަ މީހުން ދިރިއުޅެއެވެ. އޭގެ އިތުރުން އެ ތަނުގައި ސޫރިޔާއަށް ނިޞްބަތްވާ ދުރޫޒުން ނުވަތަ އަލް-މުވައްޙިދުންގެ 24،000އަށް ވުރެ ގިނަ މީހުން ވެސް ދިރިއުޅެއެވެ. ނަތަންޔާހޫ މިހާރު ވަނީ ޖޫލާންގެ އުސްބިންތަކުގައި ދިރިއުޅޭ ޔަހޫދީ އާބާދީ އިތުރު ކުރުމަށް އެއް މިލިއަން ޑޮލަރު ޚަރަދު ކުރުމަށް ހުށަހަޅައި އެކަމަށް ސަރުކާރުގެ ހުއްދަ ހޯދައިފައެވެ. ނަތަންޔާހޫ ބުނީ އޭނާ އެ ހުށަހެޅުން ހުށަހެޅީ ހަނގުރާމައާއި ސޫރިޔާގެ ޙާލަތަށް ރިޢާޔަތް ކުރުމަށް ފަހުގައި ކަމަށެވެ.