ހައުސިންގް ޑިވެލޮޕްމެންޓް ކޯޕަރޭޝަން، އެޗްޑީސީގެ ބޯޑުގެ ކުރީގެ ޗެއަރމަން އަހުމަދު ޒުހޫރުގެ ސިޓީފުޅެއް ލިބިވަޑައިނުގަންނަވާކަމަށާއި، އެފަދަ ސިޓީއެއް ލިބިވަޑައިގެންނެވިނަމަ ވަގުތުން ފިޔަވަޅު އެޅުއްވީސްކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ރާއްޖޭގެ ބައެއް މީޑިއާތަކަށް ދެއްވި އިންޓަރވިއުއެއްގައެވެ.
އެޗްޑީސީގައި ކޮރަޕްޝަނަށް މަގުފަހިވާ ގިނަ ކަންތައްތަކެއް އެކުންފުނީގެ މެނޭޖިންގ ޑިރެކްޓަރުގެ މަޤާމުގައި ކުރިން ހުންނެވި އިބްރާހީމް ފަޒުލް ރަޝީދާއި، ބައެއް އިސްވެރިން ހިންގާކަމަށް، އެޗްޑީސީގެ ޗެއަރމަނަކަށް މިސަރުކާރުން އެންމެ ފުރަތަމަ އައްޔަންކުރެއްވި އަޙްމަދު ޒުހޫރު ވަނީ ތުހުމަތުކުރައްވާފައެވެ. އަދި އެ ތުހުމަތުތައް ބަޔާންކުރާ ސިޓީއެއް ރައީސުލްޖުމްހޫރިއްޔާއަށް ފޮނުއްވެވިކަމަށް ބުނާ ވާހަކަތަކެއް ސޯޝަލް މީޑިއާގައި ވަނީ ދައުރުވެފައެވެ.
ޒުހޫރުގެ އެ ތުހުމަތުތަކާއި، އެޗްޑީސީއަށް އަމާޒުވެފައިވާ ކޮރަޕްޝަންގެ މައްސަލައާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފުރަތަމަ ފަހަރަށް ވާހަކަފުޅު ދައްކަވާފައެވެ. މީޑިއާތަކަށް ދެއްވި އިންޓަރވިއުއެއްގައި ރައީސުލްޖުމްހޫރިއްޔާ ޑރ. މުހައްމަދު މުހައްމަދު މުޢިއްޒު ވިދާޅުވީ، އެޗްޑީސީގެ ކުރީގެ ޗެއަރމަން ޒުހޫރުގެ ސިޓީއެއް އެމަނިކުފާނަށް ލިބިވަޑައިނުގަންނަވާކަމަށެވެ. އަދި އެފަދަ ސިޓީއެއް ލިބިވަޑައިގެންނެވިނަމަ ވަގުތުން ފިޔަވަޅު އަޅުއްވަން ފަސްޖެހިވަޑައިނުގަންނަވާނެކަމަށްވެސް ރައީސް ވިދާޅުވިއެވެ.
"ކޮރަޕްޝަންގެ ޢަމަލެއް ނުވަތަ ޤަވާއިދާއި ޚިލާފަށް ކުރާ ކަމެއް ހުއްޓުވުމަށް ފަހަތަކަށް ނުޖެހޭނަން. މިއަދާ ހަމައަށްވެސް ހުންނާނީ އެކި ކަންކަމުގައި މަޢުލޫމާތު ލިބުނީމަ އެކަމަކަށް ފިޔަވަޅު އަޅަން ދަންނަވާފައި. އަޅުގަނޑު ބޭނުންވަނީ އަޅުގަނޑުމެންގެ ސަރުކާރަކީ ކޮރަޕްޝަނާއި ނުގަވާއިދުން ހިންގާ ކަންކަމާ ދުރުވެފައި އޮންނަ ސަރުކާރަކަށް ހަދަން. އެއީ އަޅުގަނޑުމެން ވަޢުދުވީ ގޮތަކީވެސް. ސިޓީއެއް ލިބި އަޅުގަނޑު އެއައަށް ޢަމަލު ނުކޮށް އޮތްވާހަކައަކީ ހަޤީޤަތައި ޚިލާފު ވާހަކައެއް. އަޅުގަނޑަށް ކަންކަން އެނގުނު ހިސާބުން ފިޔަވަޅު އަޅާފައިވަނީ. " ރައީސުލްޖުމްހޫރިއްޔާ ވިދާޅުވިއެވެ.
އެޗްޑީސީގައި ހިންގިކަމަށް ތުހުމަތުކުރެވޭ ކޮރަޕްޝަންގެ މައްސަލައާއި ގުޅިގެން ބައެއް މުވައްޒަފުން މިއަދު އެކުންފުނިން ވަކިކޮށްފައިވާކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ، އެފަދަ ޢަމަލުތައް ހިންގަން އެއްވެސް މުޢައްސަސާއަކައި އެއްވެސް ކުންފުންޏެއްގައިވެސް ޖާގަ ދެއްވަން ބޭނުންފުޅުވެވަޑައިނުގަންނަވާ ކަމަށެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީ އެޗްޑީސީއަށް އަލަށް އައްޔަންކުރެއްވި މުޙައްމަދު މަޢުރޫފް ޖަމީލަށް އިތުބާރުކުރައްވާކަމަށް ވިދާޅުވެފައެވެ.
"މައުރޫފް ޖަމީލަކީ އަޅުގަނޑުވަރަށް އިތުބާރުކުރާ އިންޓެގްރިޓީ ހުރި ބޭފުޅެއް. ފުލް ކޮމިޓްމަންޓާ ޕްރޮފެޝަނަލިޒަމާއެކު މަސައްކަތްކުރައްވާ ބޭފުޅެއް. އަޅުގަނޑު ބޭނުންވަނީ އެގޮތަށް ހުރިިހާކަމެއް ހުރިހާ މުއައްސަސާތަކުންވެސް ކަންކަން ވާން. އަޅުގަނޑު ބޭނުމެއް ނުވޭ އެއްވެސް މުއައްސަސާއެއްގެތެރޭގައި ކޮރަޕްޝަނަށް ފުރުޞަތެއް ލިބޭކަށެއް. އަދި އެފަދަ ކަމެއްކުރާ މީހަކަށްވެސް ފުރުޞަތު ދޭކަށެއް."
ރައީސުލްޖުމްހޫރިއްޔާ ވިދާޅުވީ، ހުރިހާ ފަރާތްތަކެއްގެ އެއްބާރުލުން ލިބިގެން، ކަންކަން ރަނގަޅު ކުރެވޭނެކަމުގެ ޔަޤީންކަން އެމަނިކުފާނަށް އެބައޮތް ކަމަށެވެ.
އެޗްޑީސީގެ ޗެއަރމަންކަމުގެ މަޤާމުން އަޙްމަދު ޒުހޫރު ވަކިކުރައްވާފައިވަނީ މެއި މަހުގެ 22 ވަނަ ދުވަހުއެވެ.