ގަވާއިދާ ޚިލާފަށް ވެހިކަލް ދޮވުމުގެ ވިޔަފާރިކުރި 8 ބިދޭސީއަކު އިމިގްރޭޝަންގެ ބެލުމުގެ ދަށަށް
-
މި އެންމެން އިމިގްރޭޝަންގެ ބެލުމުގެ ދަށަށް ގެންދިޔައީ ރެއިޑް އޮޕަރޭޝަނެއްގެ ތެރެއިން
-
މި އޮޕަރޭޝަން ހިންގާފައިވަނީ ހުޅުމާލޭ ފޭސް 1 އަދި 2 ގައި
ގަވާއިދާ ޚިލާފަށް ވެހިކަލް ދޮވެ ސާފުކުރުމުގެ ވިޔަފާރިކުރި 8 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
ސޯޝަލް މީޑިއާގައި ޙިއްސާކުރެއްވި ޕޯސްޓެއްގައި އިމިގްރޭޝަނުން ވިދާޅުވީ ހުޅުމާލޭ ފޭސް 1 އަދި ފޭސް 2 ގެ އެކި ސަރަހައްދުތަކުގައި ގަވާއިދާ ޚިލާފަށް ވެހިކަލް ދޮވެ ސާފުކުރުމުގެ މަސައްކަތް ކުރާ ބިދޭސީންނަށް އަމާޒުކޮށްގެން ރެއިޑު އޮޕަރޭޝަނެއް ހިންގާފައިވާ ކަމަށެވެ.
މި އޮޕަރޭޝަންގެ ތެރެއިން ޞައްޙަ ވިސާއެއް ނެތް 8 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށް އެ އިދާރާއިން ވިދާޅުވިއެވެ.
ހުޅުމާލޭގެ ފޭސް 1 އަދި 2ގެ އެކި ސަރަހައްދުތަކުގައި ގަވާއިދާ ހިލާފަށް ވެހިކަލް ދޮވެ ސާފުކުރުމުގެ މަސައްކަތް ކުރަމުންދާ ބިދޭސީންނަށް އަމާޒުކޮށް އިއްޔެ ވަނީ ރެއިޑު އޮޕަރޭޝަނެއް ހިންގާފައި. އެގޮތުން ސައްހަ ވިސާއެއް ނެތް 08 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައި. pic.twitter.com/EzVTRixd6M
— Maldives Immigration (@ImmigrationMV) December 24, 2024
މިއަހަރުގެ ތެރޭގައި ރާއްޖޭގައި ގަވާއިދާ ޚިލާފަށް އުޅެމުންދާ ބިދޭސީން ހޯދުމަށް ގިނަ އޮޕަރޭޝަންތަކެއް އިމިގްރޭޝަނުން ހިންގާފައިވެއެވެ. މިގޮތުން ހިންގި އޮޕަރޭޝަންތަކުގެ ތެރެއިން ގަވާއިދާ ޚިލާފަށް އުޅެމުންދާކަމަށް ދެނެގަނެވުނު 4000 އަށްވުރެ ގިނަ ބިދޭސީން މިހާތަނަށް ވަނީ ޑީޕޯޓްކޮށްލާފައެވެ.