2023ވަނަ އަހަރު ޕާކިސްތާނުގެ އަސްކަރީ މަރުކަޒުތަކަށް އަމާޒުކޮށް ދިން ޙަމަލާތަކުގައި ބައިވެރިވި ކަމުގެ ދަޢުވާ އުފުލައި، ޢާންމުންގެ 25 މީހަކާ ދެކޮޅަށް ޙުކުމް ކުރުމާ ގުޅިގެން ބައިނަލްއަޤުވާމީ މުޖުތަމަޢުން ނުރުހުން ފާޅުކޮށްފިއެވެ. އެ މީހުންނާ ދެކޮޅަށް ޝަރިޢަތް ކޮށްފައި ވަނީ ޕާކިސްތާނުގެ އަސްކަރީ ކޯޓެއްގައެވެ. މި ކަމާ މެދު ނުރުހުން ފާޅު ކޮށްފައިވާ ފަރާތްތަކުގެ ތެރޭގައި އެމެރިކާ، އިނގިރޭސިވިލާތް އަދި ވިލާތުގެ އިއްތިޙާދު (އީޔޫ) ހިމެނެއެވެ.
2023ވަނަ އަހަރުގެ ތެރޭގައި ޕާކިސްތާނުގެ އަސްކަރީ މަރުކަޒުތަކަށް އަމާޒުތަކަށް ޙަމަލާތަކެއް ދީފައި ވަނީ، އެ ޤައުމުގެ ކުރީގެ ބޮޑުވަޒީރު އިމްރާން ޚާން ހައްޔަރު ކުރުމާ ގުޅިގެން، އެ ކަމާ ދެކޮޅަށް އަޑުއުފުލަށް އެ ޤައުމުގެ އެކި ކަންކޮޅުތަކުގައި ފެށި ބޮޑެތި މުޒާހަރާތަކެއްގެ ތެރެއިންނެވެ. އެ ޙަމަލާތަކާ ގުޅިގެން ދަޢުވާ އުފުލާފައި ވަނީ މުޒާހަރާތަކުގައި ބައިވެރިވި ޢާންމުންގެ ތެރެއިން ބައެއް މީހުންނާ ދެކޮޅަށެވެ.
އެ ޙަމަލާތަކާ ގުޅިގެން 25 މީހަކާ ދެކޮޅަށް ޙުކުމް ކޮށްފައިވާއިރު، އެ މީހުންނަށް އިއްވާފައިވާ ޙުކުމްތަކުގެ ތެރޭގައި ދެ އަހަރާއި 10 އަހަރުގެ ދުވަހަށް ޖަލަށް ލުން ހިމެނެއެވެ. މިއީ، ޚާނަށް ތާޢީދު ކުރާ މީހުންގެ ކަންބޮޑުވުން ވެސް އޮތް މައްސަލައެކެވެ. އެ މީހުން ދެކޭ ގޮތުގައި، ޚާނާ ގުޅުންހުރި ހުރިހާ މައްސަލަތަކެއްގައި ޕާކިސްތާނުގެ އަސްކަރިއްޔާއިން ކުރިއަށް އޮތް ތަނުގައި ވެސް ޝާމިލުވާނެއެވެ.
މި ކަމާ ގުޅޭ ގޮތުން ނެރުނު ބަޔާނެއްގައި އެމެރިކާގެ ޚާރިޖީ ވުޒާރާއިން ބުނީ "2023 މޭ 9ވަނަ ދުވަހު ބޭއްވި މުޒާހަރާތަކުގައި ބައިވެރިވި މީހުންގެ ތެރެއިން ބައެއް ޢާންމު ރައްޔިތުންނާ ދެކޮޅަށް [ޕާކިސްތާނުގެ] އަސްކަރީ ކޯޓެއްގައި ޝަރިޢަތްކޮށް، ޙުކުމް ކުރުމަކީ [ވޮޝިންގޓަނުން] ވަރަށް ބޮޑަށް ކަންބޮޑުވާ މައްސަލައެއް" ކަމުގައެވެ.
އިނގިރޭސިވިލާތުގެ ޚާރިޖީ ވުޒާރާއިން ބުނީ "އަސްކަރީ ކޯޓުތަކުގައި ޢާންމުންނާ ދެކޮޅަށް ޝަރިޢަތް ހިންގުމަކީ ހާމަކަމާއި މިނިވަންކަމާ ދެކޮޅު، އިންސާފުވެރި ޝަރިޢަތެއްގެ ޙައްޤުން މަޙްރޫމު ކުރުވި އަމަލެއް" ކަމުގައެވެ. ޕާކިސްތާނުގެ އަމަލާ މެދު އީޔޫން ވެސް ވަނީ ކަންބޮޑުވުން ފާޅުކޮށްފައެވެ. އެ އިއްތިޙާދުން ބުނީ، އެއީ މަދަނީ އަދި ސިޔާސީ ޙައްޤުތަކާ ބެހޭ މުޢާހަދާއާ ދެކޮޅަށް ޕާކިސްތާނުން ހިންގާފައިވާ އަމަލެއް ކަމުގައެވެ.
ޚާނަށް ތާޢީދު ކުރާ މީހުން އަސްކަރީ މަރުކަޒުތަކަށް ޙަމަލާ ދީފައި ވަނީ، އޭނާ ހައްޔަރު ކުރުމާ ގުޅިގެން އެ ކަމާ ދެކޮޅަށް އަޑުއުފުލުމުގެ ގޮތުންނެވެ. އަދި، އޭނާ މިނިވަން ކުރުމަށް ބާރު އެޅުމުގެ ގޮތުންނެވެ. ޚާނަށް ތާޢީދު ކުރާ މީހުންގެ ތެރެއިން 25 މީހަކާ ދެކޮޅަށް ޙުކުމް އިއްވާފައި މި ވަނީ، ޚާނާ ދެކޮޅަށް ވެސް ޕާކިސްތާނުގެ ނިރުބަވެރިކަމާ ބެހޭ ކޯޓުން ޙުކުމެއް އިއްވާފައިވާ ދަނޑިވަޅެއްގައެވެ. 2023ވަނަ އަހަރުގެ މޭ މަހަށް ފަހު މަދު ދުވަސް ކޮޅަކަށް ޚާން މިނިވަންކޮށްފައިވީ ނަމަވެސް، ޕާކިސްތާން ފުލުހުން ވަނީ އޮގަސްޓު މަހު އޭނާ އަލުން ހައްޔަރަށް ގެންގޮސްފައެވެ.
އެއަށް ފަހު، އޭނާ އަދިވެސް ހުންނެވީ ޖަލުގައެވެ. މި ކަން ތަޙުޤީޤު ކުރުމަށް ފަހު އިންސާނީ ޙައްޤުތަކާ ބެހޭ އދގެ ވަރކިންގ ގުރޫޕަކުން ވަނީ، ޚާން ހައްޔަރުކޮށް ބަހައްޓާފައި ހުރީ ބައިނަލްއަޤުވާމީ ޤާނޫނުތަކާ ޚިލާފަށް ކަމަށް ބުނެފައެވެ. ޕާކިސްތާނުގެ ސިޔާސީ މައިދާނަށް އެ ޤައުމުގެ އަސްކަރިއްޔާއިން ނުފޫޒު ފޯރުވަމުންދާ ކަމަށް ޚާނާއި އޭނާއަށް ތާޢީދު ކުރާ މީހުން ދަނީ ތުހުމަތު ކުރަމުންނެވެ. ނަމަވެސް، ޕާކިސްތާނުގެ އަސްކަރިއްޔާއިން މި ތުހުމަތުތައް ދޮގު ކުރެއެވެ.