"ސުލްހަ ޤާއިމްކުރަން ޤައުމުތަކުގެ މެދުގައި އެއްބާރުލުން އިތުރުކުރަންޖެހޭ"

ފަލަސްތީނުގެ މައްސަލައިގައި ދިވެހި ރާއްޖެއިން އަބަދުވެސް ވަކާލާތު ކުރާނެ ކަމުގެ ޔަޤީންކަން އަރުވައި، ދުނިޔޭގެ މަސްރަހަށް ރިޢާޔަތްކޮށް، މެންބަރު ޤައުމުތަކުގެ މެދުގައި އެއްބާރުލުން އިތުރުކުރުމަށް ޚާރިޖީ ވަޒީރު އިރުތިޝާމް ޢާދަމް ގޮވާލައްވައިފިއެވެ.

އޯގަނައިޒޭޝަން އޮފް އިސްލާމިކް ކޯޕަރޭޝަން، އޯއައިސީއިން އިރާޤުގެ ބަޤުދާދުގައި މިއަދު ބޭއްވި ޙާރިޖީ ވަޒީރުންގެ ކައުންސިލުގެ 52 ވަނަ ބައްދަލުވުމުގައި ދިވެހިރާއްޖޭގެ ޚާރިޖީ ވަޒީރު، އިރުތިޝާމް އާދަމް ބައިވެރިވެ ވަޑައިގެން ވަނީ ތަޤުރީރު ކުރައްވާފައެވެ.

އޯއައިސީގެ ޚާރިޖީ ވަޒީރުންގެ ކައުންސިލުގެ މި ބައްދަލުވުމުގައި ޚާރިޖީ ވަޒީރު ދެއްވި ތަޤުރީރުގައި، މިހާރު ދުނިޔެއަށް ކުރިމަތިވެފައިވާ އެކި މައްސަލަތަކާމެދު ކަންބޮޑުވުން ފާޅުކުރައްވައި، ޚާއްސަކޮށް އިސްލާމީ އުއްމަތަށް ކުރިމަތިވެފައިވާ ގޮންޖެހުންތައް ހައްލު ކުރުމަށާއި މައްސަލަތަކުގައި ސުލްޙަ ޤާއިމްކުރުމަށް ޤައުމުތަކުގެ މެދުގައި އެއްބާރުލުން އިތުރުކޮށް މަޝްވަރާތައް ކުރިއަށް ގެންދިއުމުގެ މުހިންމުކަމަށް އަލިއަޅުވާލެއްވިއެވެ. އަދި ދެމެހެއްޓެނިވި ތަރައްޤީއަށާއި ސުލްޙައަށް، މުޖުތަމަޢުއެއްގެ ހުރިހާ ބައިތަކެއް ޝާމިލުކުރުމުގެ މުހިންމުކަމަށް ބާރުއަޅުވައިލައްވާ، މިކަން ހާސިލުކުރުމަށް ދިވެހި ސަރުކާރުން ކުރަމުންދާ ބައެއް މަސައްކަތްތަކަށް އަލިއަޅުވާލެއްވިއެވެ.

މި އަހަރަކީ ދިވެހިރާއްޖެއިން އޯއައިސީއާ ގުޅުނުތާ 50 އަހަރުފުރުނު އަހަރަށް ވުމާއެކު، ދިވެހިރާއްޖެއިން އޯއައިސީ އަދި މެންބަރު ގައުމުތަކާއެކު އިސްލާމީ އުއްމަތުގެ މަސްލަހަތު ކުރިއެރުވުމަށް އަބަދުވެސް މަސައްކަތް ކުރާނެކަމުގެ ޔަޤީންކަން ޚާރިޖީ ވަޒީރު ވަނީ ދެއްވާފައެވެ.

🌍At the 52nd Session of the Council of Foreign Ministers of the @OIC_OCI in Baghdad, I stressed that dialogue and solidarity must be central to our pursuit of lasting peace and sustainable development.

➡️ I expressed concern over the incursions into Al-Aqsa Mosque and reaffirmed our commitment to an independent and sovereign State of Palestine.

➡️ Reflecting on the current state of global affairs, I called for inclusive cooperation to confront the challenges we face today.

➡️ I highlighted that all Member States must share in the benefits of cooperation, and that any dialogue on peace must include the voices of the vulnerable, who are disproportionately affected by war and violence.

@presidencymv
@MoFAmv

— Iruthisham Adam ( Iru) (@IruthishamAdam) October 17, 2026

މީގެ އިތުރުން ރާއްޖެއިން ފަލަސްތީނުގެ މައްސަލައިގައި ގެންގުޅޭ ސިޔާސަތު ކަމުގައިވާ، 1967 ވަނަ އަހަރުގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ފަލަސްތީނުގެ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްތީނުގެ ދައުލަތް ޤާއިމުކުރުމަށް ވަކާލާތު ކުރުމުގައިވެސް ރާއްޖެއިން އަބަދުވެސް ދެމިހުންނާނެކަމުގެ ޔަޤީންކަން ޙާރިޖީ ވަޒީރު ދެއްވިއެވެ. އަދި މި މަޤުސަދު ހާސިލުކުރުމަށް އޯއައިސީގެ ހުރިހާ މެންބަރު ގައުމުތަކުގެ މެދުގައި އެއްބާރުލުން އިތުރު ކުރުމަށްވެސް ވަނީ ގޮވާލައްވާފައެވެ.

މި ބައްދަލުވުމުގެ ހަވާސާގައި އިރުތިސާމް ވަނީ އޯއައިސީ މެންބަރު ޤައުމުތަކުގެ ވަޒީރުންނާވެސް ބައްދަލުކުރައްވާފައެވެ. މި ބައްދަލުވުންތަކުގައި މި ޤައުމުތަކާއި ދިވެހިރާއްޖެއާ މެދުގައި އޮތް ގުޅުން އިތުރަށް ބަދަހިކޮށް، ދެފަރާތުގެ މަސްލަހަތު ހިމެނޭ ދާއިރާތަކުން އެއްބާރުލުން އިތުރުކުރުމަށް މަޝްވަރާ ކުރެއްވިއެވެ.

ޚާރިޖީ ވަޒީރުންގެ ކައުންސިލުގެ މި ބައްދަލުވުމަކީ ކޮންމެ އަހަރަކުވެސް އޯއައިސީގެ ގައުމުތަކުގެ ޚާރިޖީ ވަޒީރުން އެއްތަނަކަށް އެއްވެ އިސްލާމީ އުއްމަތަށް ދިމާވެފައިވާ މުހިންމު މައްސަލަތަކަށް ހައްލު ހޯދުމާ ގުޅޭގޮތުން މަޝްވަރާ ކުރުމަށް ބާއްވާ ބައްދަލުވުމެކެވެ.

މި ދަތުރުފުޅުގައި ޚާރިޖީ ވަޒީރުގެ އަރިހުގައި، އެޑިޝަނަލް ސެކްރެޓަރީ ޝިރުޒިމަތު ސަމީރު އަދި އެސިސްޓެންޓް ޑިރެކްޓަރ މުހައްމަދު ޝުޖާއު ބައިވެރިވެ ވަޑައިގެންނެވިއެވެ.