ތުރުކީގެ ފެކްޓްރީއެއްގައި އެއްޗެއް ގޮވައި ބަޔަކު މަރުވުމާ ގުޅިގެން ރައީސް ތަޢުޒިޔާ ވިދާޅުވެއްޖެ
-
މި ހާދިސާގައި 12 މީހުން މަރުވިކަމަށް ބައިނަލްއަޤްވާމީ މީޑިއާތަކުން ރިޕޯޓްކޮށްފައިވޭ
-
ހާދިސާގައި ޒަޚަމްވި މީހުންނަށް އަވަސް ޝިފާއަކަށް ރައީސް އެދިވަޑައިގެންނެވި
ތުރުކީވިލާތުގައި ހުންނަ ފެކްޓްރީއެއްގައި އެއްޗެއް ގޮވައި ބަޔަކު މަރުވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތުރުކީގެ ރައީސް ރަޖަބް ޠައްޔިބު އުރްދުޣާނަށް ތަޢުޒިޔާގެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާގެ ތަޢުޒިޔާ މެސެޖުގައި ތުރުކީގެ ބްލިކެސިރް ސަރަހައްދުގައި ހުރި ހަނގުރާމައިގެ އާލާތްތައް އުފައްދާ ފެކްޓްރީއެއްގައި އެއްޗެއް ގޮވައި، 12 މީހުން މަރުވެ ގިނަ ބަޔަކު ޒަޚަމްވި ހާދިސާ ޚަބަރު އަޑުއެއްސެވީ ފުން ހިތާމައާއެކުކަމަށް ވިދާޅުވިއެވެ.
ރައީސުލްޖުމްހޫރިއްޔާގެ މެސެޖުގައި ތުރުކީގެ ރައީސަށާއި އެ ޤައުމުގެ ރައްޔިތުންގެ އިތުރުން އެ ހާދިސާގައި މަރުވި މީހުންނާއި ޒަޚަމްވި މީހުންގެ ޢާއިލާތަކަށް ތަޢުޒިޔާ ވިދާޅުވިއެވެ.
މި މެސެޖު ނިންމަވާލައްވަމުން ދިވެހި ސަރުކާރާއި ދިވެހި ރައްޔިތުންގެ ފަރާތުން ހާދިސާގައި ޒަޚަމްވި އެންމެންނަށް އަވަސް ޝިފާއަކަށް އެދިވަޑައިގަންނަވާކަމަށް ރައީސުލްޖުމްހޫރިއްޔާ ވިދާޅުވިއެވެ.
ބްލިކެސިރް ސަރަހައްދުގައި ހުރި ހަނގުރާމައިގެ އާލާތްތައް އުފައްދާ ފެކްޓްރީއެއްގައި އެއްޗެއް ގޮވައި މި ހާދިސާ ހިނގާފައިވަނީ މިއަދުގެ ވަގުތެއްގައެވެ.