މާލޭގެ ކާރޫބާރޫ ބޮޑު މަގުތަކުން 150 ސައިކަލު ޓޯވކޮށްފި
-
މަގުތައް ތަރުތީބުކުރުމުގެ ޚާއްޞަ މަސައްކަތްތަކެއް ވަނީ ފުލުހުން ފަށްޓަވާފައި
-
އުޅަނދުތައް އަނބުރާ ގެންދިއުމަށް 7 ދުވަހުގެ މުއްދަތެއް ވެރިފަރާތަށް ދޭ
މާލޭގެ ކާރޫބާރު ބޮޑު މަގުތަކުގައި ޤަވާއިދާ ޚިލާފަށް ޕާކްކޮށްފައިވާ އުޅަނދުތައް ނެގުމުގެ މަސައްކަތުގެ ދަށުން ގިނަ ޢަދަދެއްގެ އުޅަނދުތަކެއް ޓޯވކޮށްފިއެވެ. މާލެގެ ކާރޫބާރޫ ބޮޑުވާ މަގުތަކުގައި ޤަވާއިދާ ޚިލާފަށް ޕާކްކޮށްފައިވާ އުޅަނދުތައް ނެގުމުގެ ޚާއްޞަ އޮޕަރޭޝަނެއް ފުލުހުން ވަނީ ބުރާސްފަތި ދުވަހު ފަށްޓަވާފައެވެ.
ދިވެހި ފުލުހުންގެ ޚިދުމަތުން ވިދާޅުވީ، ޤަވާއިދާ ޚިލާފަށް ޕާކްކޮށްފައިވާ އުޅަނދުތައް ޓޯވ ކުރަން ފަށާފައިވަނީ، ބޮޑުތަކުރުފާނު މަގު، އަމީނީ މަގު، މަޖީދީ މަގު، އޯކިޑް މަގު، އަމީރު އަޙްމަދު މަގު އަދި ސޯސަން މަގުގެ އިތުރުން، އައިޖީއެމްއެޗް އަދި ވިލިގިލި ފެރީޓާމިނަލް ސަރަހައްދުންނެވެ.
މިމަސައްކަތުގެ ދަށުން ޓޯވ ކުރަމުންދާ އުޅަނދުތަކަކީ، ދަތުރުފަތުރަށާއި ޕަބްލިކް ޓްރާންސްޕޯޓަށް ދަތިވާގޮތައް ގަވައިދާ ޚިލާފަށް ޕާކުކޮށްފައި ހުންނަ އުޅަނދުތައް ތަކެވެ. މިމަސައްކަތާއި ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން، ފުލުހުން ވިދާޅުވީ، މިހާތަނަށް 150 އުޅަނދު ޓޯވކޮށްފައިވާކަމަށެވެ. އަދި އެއީ މުޅިންވެސް ސައިކަލުކަމަށްވެސް ފުލުހުން ވިދާޅުވެއެވެ.
ފުލުހުން ވިދާޅުވީ ޓޯވކުރާ އުޅަނދުތައް އަނބުރާ ގެންދިއުމަށް ވެރިފަރާތަށް 7 ދުވަހުގެ މުއްދަތެއް ދީ އެކަން އިޢުލާންކުރާކަމަށެވެ. އަދި ދެމަސް ދުވަސްފަހުން އެ އުޅަނދުތައް ނުގެންގޮސްފިނަމަ، ރަޖިސްޓްރީ ބާޠިލުކުރުމަށް ދަތުރުފަތުރާބެހޭ ވުޒާރާއަށް ހުށައަޅުއްވާކަަމަށްވެސް ފުލުހުން ވިދާޅުވިއެވެ. އަދި ރަޖިސްޓްރޭޝަން ބާޠިލުކުރާ އުޅަނދުތައް ނައްތާލުމުގެ މަސައްކަތްވެސް ކުރާކަމަށް ފުލުހުން ވިދާޅުވިއެވެ.
މާލޭގެ ކާރޫބާރޫ ބޮޑު މަގުތަކުގެ ދެ ފަރާތުގައި ޤަވައިދާ ޚިލާފަށް ގިނަ އުޅަނދުތައް ޕާކުކޮށްފައި ހުރެއެވެ. މީގެ ސަބަބުން ހިނގާބިނގާވާ މީހުންނާއި މަގު ބޭނުންކުރާ މީހުންނަށް ވަރަށް ބޮޑެތި ދަތިތަކާއި ކުރިމަތިލާންޖެހެއެވެ. ޚައްޞަކޮށް ޢާންމު ދަތުރުފަތުރަށް ބުރޫއަރައެވެ.
ފުލުހުން ވަނީ މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކޮށް، މަގުތައް ތަރުތީބު ކުރުމަށް ފުލުހުން ކުރަމުންދާ މަސައްކަތްތަކަށް އާންމުންގެ ފަރާތުން އެއްބާރުލުމަށް އެދިވަޑައިގެންފައެވެ. އަދި އެކަމުގައި ޢާންމުންގެ ފަރާތުން ލިބޭ އެހީތެރިކަމަށް ފުލުހުން ވަނީ ޝުކުރު އަދާކުރައްވާފައެވެ.