70އަށްވުރެ ގިނަ މީހުންނާ އެކު އަޒަރުބައިޖާން އެއާލައިންސްގެ މަތިންދާބޯޓެއް ވެއްޓިއްޖެއެވެ.
މެދުތެރޭ އޭޝިޔާގެ ޤައުމެއް ކަމުގައިވާ ކަޒަކިސްތާނުން ބުނީ އެ ޤައުމުގެ އަކްތައު ސިޓީ ކައިރިއަށް އަޒަރުބައިޖާން އެއާލައިންސްގެ މަތިންދާބޯޓެއް ވެއްޓިފައިވާ ކަމަށެވެ. އަދި އެ މަތިންދާބޯޓުގައި އަލިފާން ރޯވެފައިވާ ކަމަށާއި ކުއްލި ޙާލަތްތަކުގައި މަސައްކަތްކުރާ ފަރާތްތަކުން އެ އަލިފާންގަނޑު ނިއްވާލާފައިވާ ކަމަށް ވެސް އެ ޤައުމުގެ ކުއްލި ޙާލަތްތަކާ ބެހޭ ވުޒާރާއިން ބުނެފައިވެއެވެ. މަތިންދާބޯޓުގައި އަލިފާން ރޯވީ އެ އުޅަނދު ވެއްޓި ބިންމަތީގައި ޖެހުމުންނެވެ.
މަޢުލޫމާތު ލިބިފައިވާ ގޮތުގައި އަޒަރުބައިޖާން އެއާލައިންސްގެ އެމްބްރެއަރ 190 މަރުކައިގެ މަތިންދާބޯޓުން ދަތުރުކުރީ 67 ފަސިންޖަރުންނާއި ފަސް ފަޅުވެރިންނެވެ. އޭގެ ތެރެއިން ސަލާމަތްވީ 12 މީހުންނެވެ. އެ މީހުންނަށް ދަނީ ހަސްފަތާލުން ފަރުވާ ދެމުންނެވެ. މަތިންދާބޯޓުން ދަތުރުކުރި މީހުންގެ ތެރޭގައި ހިމެނެނީ ރަޝިޔާއާއި އަޒަރުބައިޖާނާއި ކަޒަކިސްތާނާއި ކިރްގިސްތާނަށް ނިޞްބަތްވާ މީހުންނެވެ.
އަޒަރުބައިޖާން އެއާލައިންސްގެ މަތިންދާބޯޓު ދަތުރު ކުރަމުން ދިޔައީ އަޒަރުބައިޖާނުގެ ބާކޫއިން ރަޝިޔާގެ ގްރޮޒްނީއަށެވެ. އެ މަތިންދާބޯޓު ވެއްޓުނު ކަޒަކިސްތާން އޮންނަނީ އެ ދެ ޤައުމެ ދެމެދުގައެވެ. ނަމަވެސް ގްރޮޒްނީގައި ދުންފުނީގެ އަސަރު ގަދަކަމުން އެ މަތިންދާބޯޓު މަސައްކަތް ކުރީ އަކްތައުގެ ވައިގެ ބަނދަރަށް ޖެއްސުމަށެވެ.