އިންޓަރ ސްކޫލް މުބާރާތްތަކުގައި މާލެ އާއި އަތޮޅުތެރޭގެ ތަފާތަކީ ރަށްރަށުގައި އަބަދުވެސް ކޮންމެވެސް ކުޅިވަރެއްގެ ތެރޭގައި އުޅުން ކަމަށް ހޭންޑްބޯލް މޯލްޑިވްސްގެ ރައީސް އަޙްމަދު މުޖުތަބާ ވިދާޅުވެއްޖެއެވެ.
ޕީއެސްއެމްގެ "ކުޅިވަރު ވިންދު" ޕްރޮގްރާމުގައި ވާހަކަދައްކަމުން މުޖުތަބާ ވިދާޅުވީ މާލޭގައި ނެތީ ކުޅިވަރު ކުޅޭނެ ޖާގަ ކަމަށާއި، މާލޭގައި ކުޅިވަރު ކުޅޭނެ ތަނެއްގެ މައްސަލަ އިންތިހާއަށް ބޮޑުވެފައިވާ ކަމަށެވެ. އެގޮތުން ކުޅިވަރު ކުޅޭނެ ކުޅުންތެރިން މާލޭގައި ތިބި ނަމަވެސް، ނިސްބަތުން ބަލާއިރު އެންމެ ބޮޑު ދައްޗަކީ ޖާގަ ނެތުން ކަމަށްވެސް ވިދާޅުވިއެވެ.
"ގިނަވާނީ އަތޮޅުތެރޭގައި ވަން ސެޝަން ސްކޫލުތައް. ވަން ސެޝަން ނޫނަސް ސްކޫލުތަކުން ހަވީރު ގަޑި ހުސްވާނެ. އެކުދިން ކުޅޭނެ އިތުރު ކުޅިވަރުތަކެއް ނޯންނާނެ. ވޮލީބޯލް ކުޅޭ ކުދިން ވޮލީ ކުޅޭތަނަށް ދާނީ. ހޭންޑްބޯލް ކުޅޭ ކުދިން ވެލި ދަނޑަކަށް ވިޔަސް އަދި ވެލި ގަނޑުގައި ވިޔަސް ކުޅެން ނުކުންނާނެ" މުޖޭ ވިދާޅުވިއެވެ.
ޖާގައިގެ ދަތިކަމަށް ހައްލެއް ގެނައުމައްޓަކައި ހޭންޑްބޯލް ދަނޑު ހިޔާކުރުމުގެ މަސައްކަތް މިހާރު ކުރިއަށްދާ ކަމަށް މުޖުތަބާ ވިދާޅުވިއެވެ. އެގޮތުން ކޮންޓްރެކްޓަރުންނާއެކު ވަރަށް އަވަހަށް ސޮއިކުރެވި، ދަނޑު ހިޔާކުރުމުގެ މަސައްކަތް ފެށިގެންދާނެ ކަމަށް ވަނީ ވިދާޅުވެފައެވެ. އަދި އުއްމީދަކީ ރޯދަ މަސް ނިމެންވާއިރަށް އެ މަސައްކަތް ނިންމާލުން ކަމަށްވެސް މުޖުތަބާ ވިދާޅުވިއެވެ.
މިހާރު ހޭންޑްބޯލް ސްޓޭޑިއަމަށް ކުޅިބަލަން ވަދެވެނީ 600 މީހުންނަށެވެ. މުޖުތަބާ ވިދާޅުވީ ހޭންޑްބޯޅަކީ ރާއްޖޭގައި މިހާރު އެންމެ ބޮޑަށް ކުރިއަރަމުން އަންނަ ކުޅިވަރު ކަމަށެވެ.