ދުނިޔޭގެ ޞިއްޙަތު ޖަމުޢިއްޔާ (ޑަބްލިޔުއެޗްއޯ)ގެ މެންބަރު ކަމުން އެމެރިކާ ވަކިކުރުމުގެ މަސައްކަތް އެ ޤައުމުގެ އިންތިޚާބީ-ރައީސް ޑޮނަލްޑް ޓްރަމްޕްގެ ޓީމުން ފަށާފައިވާ ކަން ހާމަވެއްޖެއެވެ. މި ކަމާ ގުޅޭ މަޢުލޫމާތު އިނގޭ މަޞްދަރުތަކުން ބުނީ، ރައީސް ކަމުގެ މަޤާމުގެ އައު ދައުރަކާ ޓްރަމްޕް ޙަވާލުވެ ވަޑައިގަންނަވާ ދުވަހު، އެމެރިކާއިން ޑަބްލިޔުއެޗްއޯގެ މެންބަރު ކަމުން ވަކިވާނެ ކަމަށް ބެލެވޭ ކަމުގައެވެ. ޓްރަމްޕް ރައީސް ކަމުގެ ހުވާ ކުރައްވުމަށް ހަމަޖެހިފައި ވަނީ 2025ވަނަ އަހަރުގެ ޖަނަވަރީ މަހުގެ 20ވަނަ ދުވަހުއެވެ.
"[ޓްރަމްޕްގެ] ވެރިކަމުގެ އައު ދައުރުގެ ފުރަތަމަ ދުވަހު [ޑަބްލިޔުއެޗްއޯގެ މެންބަރު ކަމުން އެމެރިކާ] ވަކިވާނެ ކަން ވަރަށް މުޢުތަބަރު ފަރާތްތަކުން އަޅުގަނޑު ގާތުގައި ދެންނެވި،" ވޮޝިންގޓަނުގެ ޖޯޖްޓައުން ޔުނިވަރސިޓީގެ އިސް ޕްރޮފެސަރެއް ކަމުގައިވާ ލޯރެންސް ގޮސްޓިން ވިދާޅުވިއެވެ.
ޑަބްލިޔުއެޗްއޯގެ މެންބަރު ކަމުން އެމެރިކާ ވަކިކުރަން ޓްރަމްޕް ނިންމަވާފައިވާ ކަން ފުރަތަމަ ރިޕޯޓު ކޮށްފައި ވަނީ އިނގިރޭސިވިލާތުގެ ނޫހެއް ކަމުގައިވާ ފައިނޭންޝަލް ޓައިމްސުންނެވެ. އެ ކަން ކަށަވަރު ކޮށްދެއްވާފައިވާ ބޭފުޅުންގެ ތެރޭގައި ކޮވިޑް-19ގެ ބަލިމަޑުގެ ދުވަސްވަރު އެމެރިކާގެ ރިޔާސީ ގަނޑުވަރު، ވައިޓް ހައުސްގައި ރެސްޕޮންސް ކޯޑިނޭޓަރުގެ މަޤާމު ފުރުއްވާފައިވާ އަޝިޝް ޖާ ވެސް ހިމެނެއެވެ. ނަމަވެސް، ޓްރަމްޕްގެ އިންތިޤާލީ ޓީމުން މި ކަން ކަށަވަރު ކޮށްދީފައެއް ނެތެވެ.
ޓްރަމްޕަކީ މީގެ ކުރިން ވެސް ޑަބްލިޔުއެޗްއޯއަށް ފާޑުވިދާޅުވެ، އެ އިދާރާއާ ދެކޮޅަށް ވާހަަކަފުޅު ދައްކަވާފައިވާ ބޭފުޅެކެވެ. އެ ޖަމުޢިއްޔާއިން ވަކިވުމަށް އެމެރިކާއިން ނިންމުމަމީ، ބަލިމަޑުކަން ފަދަ ކަންކަމާ ދެކޮޅަށް ބައިނަލްއަޤުވާމީ މައިދާނުގައި ކުރެވޭ މަސައްކަތްތަކުން އެމެރިކާ އެކަހެރިވެގެން ދާނެ އަމަލެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ސިފަ ކުރެއެވެ. މިއީ ޑަބްލިޔުއެޗްއޯއާ ފެޔަށް ޖެހުމަށް ޓްރަމްޕް މަސައްކަތް ކުރައްވާ ފުރަތަމަ ފަހަރު ނޫން ކަން ވެސް ފާހަގަ ކޮށްލަން ޖެހެއެވެ.
ޓްރަމްޕްގެ ސަރުކާރުގައި ޞިއްޙީ ދާއިރާގެ އިސް މަޤާމުތަކާ ޙަވާލުވެ ވަޑައިގަންނަވާނެ ކަމަށް ބެލެވޭ ބައެއް ބޭފުޅުންނަކީ ވެސް ޑަބްލިޔުއެޗްއޯއާ ދެކޮޅަށް ފާޅުގައި ވާހަަކަފުޅު ދައްކަވާފައިވާ ބޭފުޅުންނެވެ. އޭގެ ތެރެއިން އެންމެ ފާހަގަ ކޮށްލެވޭ އެއް ބޭފުޅަކީ، ޞިއްޙަތާ ބެހޭ ވަޒީރު ކަމުގެ މަޤާމަށް ޢައްޔަން ކުރައްވަން ޓްރަމްޕް ނިންމަވާފައިވާ ރޮބަރޓް އެފް ކެނެޑީ ޖޫނިޔަރއެވެ.
އޭނާއަކީ ވެކްސިނާ ދެކޮޅަށް ވަކާލާތު ކުރައްވާ، ވެކްސިންގެ ރައްކާތެރިކަމާ މެދު ސުވާލު އުފައްދަވަމުން ގެންދަވާ ބޭފުޅެކެވެ. ޞިއްޙަތާ ބެހޭ ވަޒީރު ކަމުގެ މަޤާމާ ޙަވާލުވެ ވަޑައިގަތުމަށް ފަހު އެމެރިކާގެ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ)ގެ އިތުރުން ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ)ގެ އެންމެ މަތީ ވެރިއަކަށް ވެވަޑައިގަންނަވާނީ ވެސް އޭނާއެވެ.
ޑަބްލިޔުއެޗްއޯން ވަކިވުމުގެ މަސައްކަތް 2020ވަނަ އަހަރުގެ ތެރޭގައި ވެސް ޓްރަމްޕް ފެށްޓެވިއެވެ. ނަމަވެސް، އޭގެ ހަ މަސް ފަހުން އެމެރިކާގެ ރައީސް ކަމުގެ މަޤާމާ ޙަވާލުވެ ވަޑައިގެންނެވި ޖޯ ބައިޑަން ވަނީ ޓްރަމްޕްގެ ނިންމެވުން ބަދަލު ކުރައްވާފައެވެ.
ޑަބްލިޔުއެެޗްއޯއާ މެދު ޓްރަމްޕް އެންމެ ބޮޑަށް ހިތްހަމަޖެހިވަޑައި ނުގަންނަވަނީ، ޗައިނާއާ ދެކޮޅަށް ފިޔަވަޅު އެޅުމަށް އެ ޖަމުޢިއްޔާ ފަސްޖެހޭތީ ކަމުގައި ޓްރަމްޕް ވަނީ ވިދާޅުވެފައެވެ. ޢޭނާ ޤަބޫލު ކުރައްވާ ގޮތުގައި، ކޮވިޑް-19ގެ ބަލިމަޑުކަން މުޅި ދުނިޔެއަށް ފެތުރިގެން ދިޔައީ ޗައިނާގެ އަމަލުތަކުގެ ސަބަބުންނެވެ. އަދި، އިންސާފުގެ ކުރިމައްޗަށް ޗައިނާ ގެނައުމަށް ޑަބްލިޔުއެޗްއޯ ފޭލުވެފައިވާ ކަމަށް ވެސް ޓްރަމްޕް ޤަބޫލު ކުރައްވައެވެ. ޑަބްލިޔުއެޗްއޯއަކީ ޗައިނާއިން ބާރާއި ނުފޫޒު ހިންގަމުންދާ ބުދެއްގެ ގޮތުގައި ވެސް އޭނާ ސިފަ ކުރައްވާފައިވެއެވެ.
ޓްރަމްޕްގެ ވެރިކަމުގައި ޑަބްލިއެޗްއޯއިން ވަކިވުމަށް ނިންމާނެ ކަމާ މެދު ސުވާލު ކުރުމުން އެ ޖަމުޢިއްޔާގެ ވެރިޔާ ޓެޑްރޯސް އަދަނޮމް ގެބްރިއޭސޮސް ވިދާޅުވީ އެ ކަމާ މެދު ވިސްނުމަށް އެމެރިކާއަށް އިތުރު ވަގުތު ދޭން ޖެހޭ ކަމަށް ޤަބޫލު ކުރައްވާ ކަމުގައެވެ. އަދި، އެމެރިކާގެ އިންތިޤާލީ މަރުޙަލާއަށް އިތުރު ވަގުތު ބޭނުންވާނެ ކަމަށާއި، 2025ވަނަ އަހަރުގެ މާރިޗު މަހުގެ ކުރިން ބަލިމަޑުކަންތަކާ މެދު އަމަލު ކުރާނެ ގޮތުގެ އެއްބަސްވުމެއް އެކުލަވައިލެވޭނެ ކަމަށް ޤަބޫލު ކުރައްވާ ކަމުގައެވެ.
މަސްރަޙު ދިރާސާ ކުރާ ފަރާތްތަކުން ބުނީ، ޑަބްލިޔުއެޗްއޯއިން އެމެރިކާ ވަކިވުމަކީ ބަލިމަޑުކަމުން އަރައިގަތުމަށް ބައިނަލްއަޤުވާމީ މައިދާނުގައި ކުރަމުންދާ މަސައްކަތްތަކަށް ގޮންޖެހުންތަކެއް ކުރިމަތިވާނެ ނިންމުމަކަށް ވާނެ ކަމުގައެވެ. "ޞިއްޙީ ދާއިރާގެ ކަންކަމުގައި އެމެރިކާގެ އަޑާއި ނުފޫޒު ކެނޑިގެންދާނެ، އަދި އެ ހުސްކަން ދެން ފުރާނީ ޗައިނާއިން. ހަރުދަނާ ޑަބްލިޔުއެޗްއޯއެއް ނެތި ދުނިޔޭގެ ހާލަތަށް އަންނާނެ ބަދަލުތައް އަންދާޒާ ކުރަން ބޭނުމެއް ވެސް ނޫން. ނަމަވެސް، އެމެރިކާ ޑަބްލިޔުއެޗްއޯއިން ވަކިވުމަކީ އެ ޖަމުޢިއްޔާއަށް އަންނާނެ ވަރަށް ބޮޑު ހީނަރުކަމެއް،" ގޮސްޓިން ވިދާޅުވިއެވެ.