ފަލަސްޠީނުގެ ޣައްޒާގައި ޔަހޫދީން ހިންގަމުންދާ ޤަތުލްޢާންމާއި ރަތް ކަނޑުން ދަތުރުކުރަމުންދާ ޔަހޫދީ އުޅަނދުތަކަށް ޙޫޘީ ޖަމާޢަތުން ދެމުންދާ ޙަމަލާތަކުގެ ސަބަބުން ސުވައިސް ކެނޭލުން ލިބެމުންދާ އާމުދަނީގެ ތެރެއިން ހަތް ބިލިޔަން ޑޮލަރު ގެއްލިފައިވާ ކަމަށް މިޞްރުގެ ރައީސް ޢަބްދުލްފައްތާޙް އަލް-ސީސީ ވިދާޅުވެއްޖެއެވެ.
ސީސީ ދެއްވި ބަޔާނެއްގައި ވިދާޅުވީ، 2023 ވަނަ އަހަރު ސުވައިސް ކެނޭލުން ލިބުނު އާމްދަނީގެ 60 ޕަސެންޓު މި އަހަރު ދަށްވެފައިވާ ކަމަށެވެ. ނަމަވެސް، އެ ގެއްލުމުގެ ތަފްޞީލެއް ސީސީ ނުދެއްވައެވެ.
ރަތް ކަނޑުގައި ދަތުރުކުރާ ޔަހޫދީންނާ ގުޅުންހުރި އާގުބޯޓުތަކަށް ޔަމަނުގެ ޙޫޘީ ޖަމާޢަތުން މިދިޔަ ނޮވެމްބަރު މަހުން ފެށިގެން 100އަށްވުރެ ގިނަ ޙަމަލާ ދީފައިވެއެވެ.
އާގުބޯޓުތަކަށް ޙޫޘީން އަމާޒުކުރާ ޙަމަލާތަކުގެ ސަބަބުން ދުނިޔޭގެ ގިނަ މުދާ އުފުލާ ކުންފުނިތަކުން ވަނީ ރަތް ކަނޑުން ދަތުރުކުރުން ހުއްޓާލައިފައެވެ. ރަތް ކަނޑު އޮންނަނީ ޔަމަނުގެ ބާބް އަލް މަންދީބު ކަނޑުއޮޅިން ފެށިގެން މިޞްރުގެ ސުވައިސް ކެނޭލާ ހަމައަށެވެ. މުދާ އުފުލާ ކުންފުނިތަކުން ރަތް ކަނޑުގެ ދަތުރުތައް ހުއްޓައިލުމުން ސުވައިސް ކެނަލުން ދަތުރުކުރާ އާގުބޯޓުތަކުގެ ޢަދަދު ވެސް ވަނީ ވަރަށް ބޮޑަށް މަދުވެފައެވެ.
އޭގެ ބަދަލުގައި، އާގުބޯޓުތައް އެފްރިކާ ބައްރު ވަށާލައި ދަތުރުކުރަން ޖެހުމުގެ ސަބަބުން، ދުނިޔޭގެ މުދާ އުފުލުމުގެ މުޅި ނިޒާމަށް ބުރޫ އަރައި މުދަލުގެ އަގުތައް ވެސް ވަނީ އުފުލިފައެވެ.
އޮކްޓޫބަރު މަހުގެ ހަތް ވަނަ ދުވަހު ޔަހޫދީ ފައުޖުތަކާއި ފަލަސްޠީނުގެ ޣައްޒާގެ ވެރިކަންކުރާ ޙަމާސް ޖަމާޢަތާ ދެމެދު ހަނގުރާމަ ފެށިފަހުން ރަތް ކަނޑުގައި ދަތުރުކުރާ ބޯޓުތަކަށް ޙޫޘީން އަންނަނީ ޙަމަލާތައް ދެމުންނެވެ. ޙޫޘީން އެ ގޮތަށް ޢަމަލުކުރަނީ ފަލަސްޠީނަށް ތާއީދުކުރުމުގެ ގޮތުންނެވެ.