ސޫރިޔާގައި ހަމަނުޖެހުން އުފައްދައި، ޞުލްޙަ މަސަލަސްކަން ނަގައިލުމުގެ ފުރުޞަތު އެއްވެސް ބަޔަކަށް ނުދޭނެކަމުގެ އިންޒާރު، ސޫރިޔާގައި ވެރިކަމާ ވަގުތީ ގޮތުން ހަވާލުވެފައިވާ ތަޙްރީރް އަލް-ޝާމް (އެޗްޓީއެސް)އިން ބުނެފިއެވެ.
އެ ޖަމާޢަތުން މި އިންޒާރު ދީފައިވަނީ، ސޫރިޔާގެ ޠަރްޠޫސްގެ ރަށްބޭރުގެ ސަރަޙައްދެއްގައި ދިން ނުރައްކާތެރި ޙަމަލާތަކެއްގައި ސޫރިޔާގެ ފުލުހުންގެ 14 މީހުން މަރައިލާފައިވަނިކޮށެވެ. މި ޙަމަލާތަކުގެ ފަހަތުގައި ތިބީ ކުރީގެ ރައީސް ބައްޝާރް އަލް-އަސަދަށް ވަފާތެރި ސިފައިން ކަމަށް ބެލެވެއެވެ.
މިއީ، އެޗްޓީއެސްގެ ހަނގުރާމަވެރިން ވެރިރަށް ދިމިޝްޤަށް އަރައި އަސަދުގެ ސަރުކާރު ޑިސެމްބަރު މަހުގެ 8ވަނަ ދުވަހު ވައްޓައިލިފަހުން، އަސަދަށް ވަފާތެރި ސިފައިން ދިން އެންމެ ނުރައްކާތެރި ޙަމަލާއެވެ.
އަސަދުގެ ސަރުކާރު ވައްޓައިލުމުން އެ ޤައުމުގެ އެކި ކަންކޮޅުތަކުގައި ހަމަނުޖެހުން ހިންގަމުންދާ ކަމުގައި އެޗްޓީއެސްގެ ސަރުކާރުން ބުންޏެވެ. މި ކަން ހުއްޓުވުމަށް އިންތިޤާލީ ސަރުކާރުން އަޅާފައިވާ ބައެއް ފިޔަވަޅުތަކުގެ ތެރޭގައި ބައެއް ސަރަޙައްދުތަކުގައި ކަރފިޔު ހިންގުން ހިމެނެއެވެ.
ސޫރިޔާގެ އިންތިޤާލީ ސަރުކާރުގެ ދާޚިލީ ވުޒާރާއިން ބުނީ، ޠަރްޠޫސްގެ ރަށްބޭރުގައި ދީފައިވާ ޙަމަލާތަކުގައި 14 ފުލުހުން މަރުވުމުގެ އިތުރުން ފުލުހުންގެ 10 މީހުން ޒަޚަމުވެފައިވާ ކަމުގައެވެ. އަދި، އަސަދަށް ވަފާތެރި ސިފައިން ހޯދައި، އެ މީހުންގެ ޙަރަކާތްތައް ހުއްޓުވާނެ ކަމުގެ އިންޒާރު އެ ވުޒާރާއިން ވަނީ ދީފައެވެ. ސޫރިޔާގެ ސަލާމަތީ ބާރުތަކާއި ޢާންމު ރައްޔިތުންގެ ފުރާނައަށް ނުރައްކާ ކުރާ ކޮންމެ ފަރާތެއް ހޯދައި، ހުއްޓުވާނެ ކަމުގައި ވެސް އެ ވުޒާރާއިން ބުންޏެވެ.
ސޫރިޔާގެ ދަޢުލަތުގެ މީޑިޔާއިން ބުނީ، އެ ސަރަޙައްދުގައި ހިންގަމުންދާ ހަމަނުޖެހުންތަކުގެ އަޑީގައި ތިބީ އަލް-ޢަލާވިއްޔޫން ދަރިކޮޅުގެ މީހުންނާއި ޝިޔަޢީ ޖަމާޢަތްތައް ކަމަށް ބެލެވޭ ކަމުގައެވެ. އެއީ، އަސަދު ނިސްބަތްވެ ވަޑައިގަންނަވާ ދަރިކޮޅެވެ.
ސޫރިޔާގެ ބައިމަދު ދަރިކޮޅުތަކުގެ މީހުންގެ ރައްކާތެރިކަން ކަށަވަރުކޮށްދީ، އެ މީހުންގެ ޙައްޤުތައް ޙިމާޔަތް ކޮށްދިނުމަށް އެޗްޓީއެސްގެ ސަރުކާރުން ވަނީ ވަޢުދުވެފައެވެ.