ވައިޑްބޮޑީ މަތިންދާބޯޓުގެ ޓެކްނިކަލް ހުރިހާ މަސައްކަތެއްގައި ގައުމީ އެއަރލައިންގެ މުވައްޒަފުން

އެއަރބަސް މަރުކާގެ ވައިޑް ބޮޑީ މަތިންދާ ބޯޓު ރާއްޖެ ގެނައުމަށްޓަކައި ކުރަންޖެހޭ ހުރިހާ މަސައްކަތެއްގައި ހަރަކާތްތެރިވަމުން ދަނީ ގައުމީ އެއަރލައިން، މޯލްޑިވިއަންގެ ފަންނީ މުވައްޒަފުންކަމަށް އެ އެއަރލައިނުން ވިދާޅުވެއްޖެއެވެ.

މޯލްޑިވިއަންގެ ދަތުރުތަަައް އިތުރު މަންޒިލްތަކަށް ފުޅާކުރުމަށް ހޯދާފައިވާ އެއަރބަސް މަރުކާގެ، އޭ ތްރީ ތަރޓީގެ މަތިންދާބޯޓު ރާއްޖެ ގެންނާނީ އަންނަ މަހުގެ 6 ވަނަ ދުވަހުއެެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މޯލްޑިވިއަންގެ ސީނިއާ މެނޭޖަރ ޓެކްނިކަލް ސްޓްރެޓެޖީ، އިސްމާޢީލް އާޠިފް މުޙައްމަދު ވިދާޅުވީ، މޯލްޑިވިއަންގެ އިންޖިނިއަރުންގެ ޓީމެއް ލިތުއޭނިއާއަށް ގޮސް، މަތިންދާބޯޓުގެ އިންސްޕެކްޝަންތައް ހެދިކަމަށެވެ. އަދި އެ ބޯޓަކީ ދަތުރުތަކުގައި ބޭނުންކުރުމަށް އެންމެ ރަނގަޅު މަތިންދާބޯޓެއްކަން އެ ޓީމުން ކަށަވަރުވުމުން، އެ އެއަރކްރާފްޓް ޚިދުމަތަށް ނެރުމަށް ކުރަންޖެހޭ މަސައްކަތްތަައް މިދިޔަ އޮކްޓޯބަރު މަހުގެ ތެރޭގައި ފެއްޓެވިކަމަށްވެސް އާތިފް ވިދާޅުވިއެވެ..

"އެއަށްފަހު ނޮވެމްބަރު މަހުގެ ފަހުކޮޅު ބޯޓު މިހާރުވާނީ ސިންގަޕޯއަށް ފެރީކުރެވިފައި. މިހާރު ސިންގަޕޫރުގައި ބޯޓުއޮތްއިރު، މިހާރު މައިގަނޑުގޮތެއްގައި ކުރިއަށްދަނީ ޕެއިންޓްކުރުމުގެ މަސައްކަތް." އާޠިފް ވިދާޅުވިއެވެ.

މިބޯޓު ގެނައުމަށް ކުރަމުންދާ މަސައްކަތްތަކާއި ގުޅޭގޮތުން ވާހަކަދައްކަވަމުން މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ، މިބޯޓު ރާއްޖެ ގެނައުމަށް ޤައުމީ އެއަރލައިންގެ މުވައްޒަފުން ބުރަ މަސައްކަތްތަކެއް ކުރަމުން ގެންދާކަމަށެވެ. އަދި ބޯޓު މާލެ ގެނައުމަށް ކުރަންޖެހޭ ހުރިހާ މަސައްކަތެއްވެސް ކުރާނީ ގައުމީ އެއާލައިނުންކަމަށާއި، އެ މަސައްކަތުގައި ބޭރު ބައެއްގެ އެހީތެރިކަމެއް ހޯދާފައިނުވާކަމަށްވެސް ސަލީމް ވިދާޅުވިއެވެ.

"ބޯޓު ބެލުމަށް ލިތުއޭނިއާއަށް ދިޔުންކަމުގައިވީނަމަވެސް، އަދި ބޯޓުގެ އިންޖިނިއަރިން ހުރިހާ ކަމެއްކަމުގައި ވީނަމަވެސް އެހުރިހާ ކަމެއް ކުރެއްވީ އަޅުގަނޑުމެންގެ ޓެކްނިކަލް ބޭފުޅުން. މިހާރު އެކުރިއަށްދާ މަސައްކަތްތަކުގައިވެސް އަޅުގަނޑުމެންގެ ޓީމުތައް އެތަނުގައި ތިބެގެން އެމަސައްކަތް ކުރަނީ. އަޅުގަނޑު ފާހަގަކުރަން ބޭނުން އެއްވެސް ބޭރުބައެއްގެ އެކަހަލަ އެހީތެރިކަމެއް ނެތި، ހަމަ ދިވެހީންކަން މިކަން މިކުރަނީ." ސަލީމް ވިދާޅުވިއެވެ.

އައިލެންޑް އެވިއޭޝަން ސަރވިސްއިން ވިދާޅުވީ، އެކުންފުނީގެ ފަންނީ މުވައްޒަފުންނަކީ އެއަރކްރާފްޓްތައް ބެލެހެއްޓުމުގެ ޤާބިލުކަން ހުރި މުވައްޒަފުންކަމަށެވެ.

ރާއްޖެއަށް އިތުރު 60،000 ފަތުރުވެރިން ގެނެވޭނެ މަގު ފަހިކުރުމަށް ވައިޑްބޮޑީ އެއަރކްރާފްޓް ޚިދުމަތް އަންނަ އަހަރުގެ ކުރީކޮޅު ފެށުމަށްފަހު، އިތުރު މަތިންދާބޯޓެއްް ގެނައުމުގެ މަސައްކަތްވެސް ކުރަމުންދާކަމަށް މޯލްޑިވިއަނުން ވިދާޅުވިއެވެ. މިބޯޓު އަންނަ ޖެނުއަރީ މަހުގެ 6 ވަނަ ދުވަހު މާލެ ގެނައުމަށް މަސައްކަތްކުރަމުންދާއިރު، އެކަން ފާހަގަކުރުމަށް ޚާއްސަ ޙަރަކާތްތަކެއް އިންތިޒާމުކުރައްވާނެކަމަށް ޤައުމީ އެއަރލައިނުން ވިދާޅުވެއެވެ.