ޕެރޫއަށް މިހާރު އަންނަމުންދާ އިޤްތިޞާދީ ކުރިއެރުމަށް ރިއާޔަތްކޮށް، އަންނަ އަހަރުން ފެށިގެން އެންމެ ކުޑަ އުޖޫރައިގެ ނިޞްބަތް 10 އިންސައްތައަށް މަތިކޮށް، 300 އެމެރިކާ ޑޮލަރަށް ބޮޑުކުރަން ނިންމާފައިވާ ކަން، އެ ޤައުމުގެ ރައީސް ދީނާ ބޮލުއާތޭ އިޢުލާނުކުރައްވައިފިއެވެ.
ޓީވީ މެދުވެރިކުރައްވައި، ބޮލުއާތޭ ވިދާޅުވީ އެންމެ ކުޑަ އުޖޫރައިގެ ގޮތުގައި މިހާރު ކަނޑައަޅާފައިވާ 270 ޑޮލަރު އަންނަ އަހަރުން ފެށިގެން 300 ޑޮލަރަށް ބޮޑުކުރަން ނިންމާފައިވާ ކަމަށެވެ.
މިއީ ޕެރޫގެ އެންމެ ކުޑަ އުޖޫރައަށް 2022 ވަނަ އަހަރުގެ މެއި މަހުގެ ފަހުން ބަދަލު ގެންނަ ފުރަތަމަ ފަހަރެވެ.
އެންމެ ކުޑަ އުޖޫރަ އޭރު ބޮޑުކުރީ، ކުރީގެ ރައީސް ޕެދްރޯ ކެސްޓީޔޯގެ ވެރިކަމުގައެވެ. އޭނާ ރައީސްކަމުން ދުރުކުރީ، ޕެރޫގެ ޤާނޫނު ހަދާ މަޖިލިސް އުވާލައްވަން މަސައްކަތް ކުރެއްވުމުންނެވެ.
"މިއަދު ކުރިމަގު އޮތީ ވަރަށް އުޖާލާކޮށް. އަޅުގަނޑުމެންގެ އިޤްތިޞާދު ކުރިއަރަމުންދަނީ 3.2 އިންސައްތައިގެ ރޭޓެއްގައި. އަދި އަމިއްލަ ފަރާތްތަކުން ކުރާ އިންވެސްޓްމަންޓްތައް އަންނަނީ ވަރަށް ބޮޑަށް ރަނގަޅުވަމުން،" ބޮލުއާތޭ ވިދާޅުވިއެވެ.
ޕެރޫގެ އިޤްތިޞާދު މިދިޔަ އަހަރު ކާރިސާއެއްގެ ތެރެއަށް ވެއްޓުނީ، މޫސުމީ ކާރިސާތަކާއި ކެސްޓީޔޯ މަޤާމުން ދުރުކުރުމުން ސަރުކާރާ ދެކޮޅަށް ކުރި މުޒާހަރާތަކުގެ ސަބަބުންނެވެ.
އެންމެ ކުޑަ އުޖޫރަ ބޮޑުކުރުމުން، ޕެރޫގެ އެންމެ ފަގީރު އާބާދީގެ އަތްމަތި ތަނަވަސްވި ނަމަވެސް، ރަސްމީ ނިޒާމުގެ ބޭރުން މީހުންނަށް ވަޒީފާ ދިނުން އިތުރުވެދާނެކަމުގެ އިންޒާރު ބައެއް ވިޔަފާރިވެރިން ވަނީ ދީފައެވެ.