ސަރުކާރުން މިހާތަނަށް އޮޑިވެރިންނަށް 981 މިލިޔަން ރުފިޔާ ދޫކޮށްފި

މި ސަރުކާރު ވެރިކަމާއި ހަވާލުވުމަށްފަހު މިހާތަނަށް އޮޑިވެރިންނަށް 981 މިލިޔަން ރުފިޔާ ދޫކޮށްފައިވާކަމަށް ސަރުކާރުގެ މަސް ކުންފުނި މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯއިން ވިދާޅުވެއްޖެއެވެ. ސަރުކާރުން މިހާރު ދަނީ 48 ގަޑިއިރުގެ ތެރޭގައި އޮޑިވެރިންނަށް ފައިސާ ދޫކުރަމުންނެވެ.

މި ސަރުކާރު ވެރިކަމާއި ހަވާލުވިއިރު، މަސް ދޯނިތަކުން ކިރުވާފައިވާ މަހަށް އޮޑިވެރިންނަށް ދޭންޖެހޭ 230 މިލިޔަނަށްވުރެ ގިނަ ރުފިޔާ އޮތެވެ. ނަމަވެސް ސަރުކާރުން ވަނީ އެ ފައިސާ ދީ ހަލާސްކޮށް ބެކްލޮކް އެއްކޮށް ފިލުވާލާފައެވެ. އަދި މިހާރު ކިރުވާ މަހަށް 48 ގަޑިއިރުގެ ކުރިން ދަނީ އޮޑިވެރިންނަށް ފައިސާ ދޫކުރަމުންނެވެ.

މިފްކޯއިން ވިދާޅުވީ މި ސަރުކާރު ވެރިކަމާއި ހަވާލުވުމަށްފަހު 17 ނޮވެމްބަރ 2023 އިން 28 ޑިސެމްބަރ 2024 ގެ ނިޔަލަށް މިފްކޯއަށް 55،925 މެޓްރިކް ޓަނުގެ މަސް ކިރުވާފައިވާކަމަށެވެ. އަދި ކިރުވާފައިވާ މަހަށް 981،126،385 ރުފިޔާ އޮޑިވެރިންނަށް ދީފައިވާކަމަށެވެ.

މިފްކޯއިން ވިދާޅުވީ، އޮޑިވެރިންނަށް 48 ގަޑިއިރުގެ ތެރޭގައި ފައިސާ ދޫކުރުމުގައި ބޭންކް އޮފް މޯލްޑިވްސްއާއި، މާލީ ވުޒާރާއާއި މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާގެ ފަރާތުން ވަރަށް ބޮޑު އެހީތެރިކަމަކާއި އެއްބާރުލުމެއް ލިބެމުންދާކަމަށެވެ.

މި ސަރުކާރުން ދަނީ ރާއްޖޭގެ މަސްވެރިކަމުގެ ސިނާއަތް ކުރިއަރުވައި ސިންދަފާތުކުރުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން މަސްވެރިކަމުގެ ސިނާއަތައް ދިމާވެފައިވާ މައްސަލަތަކަށް ސަރުކާރުގެ ފުރަތަމަ 3 އަހަރުގެ ތެރޭގައި ހައްލު ލިބިގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވަނީ ވިދާޅުވެފައެވެ.