ސޫރިޔާގެ ކުރީގެ ރައީސް ބައްޝާރް އަލް-އަސަދަށް ވަފާތެރި ސިފައިންނާ ދެކޮޅަށް، އެ ޤައުމުގެ ވެރިކަމާ ޙަވާލުވެފައިވާ ތަޙްރީރް އަލް-ޝާމް (އެޗްޓީއެސް)ގެ ސަރުކާރުން އެކި ސަރަޙައްދުތަކުގައި ވަރުގަދަ އަސްކަރީ ޙަރަކާތްތަކެއް ފަށައިފިއެވެ.
މި ޙަރަކާތްތަކުގެ އަމާޒަކީ އަސަދުގެ ވެރިކަމުގެ އަސަރު ވެސް ސޫރިޔާއިން ފޮހެލުން ކަމަށް އެޗްޓީއެސުން ވަނީ ސިފަކޮށްފައެވެ.
ސޫރިޔާގެ ދައުލަތުގެ މީޑިޔާއިން ބުނީ، އިރުދެކުނު އައްސޭރިފަށުގައި ސޫރިޔާގެ އަސްކަރިއްޔާއިން ދަނީ އަސަދަށް ވަފާތެރި ސިފައިން ހޯދުމުގެ ވަރުގަދަ ޙަރަކާތެއް ހިންގަމުން ކަމަށެވެ.
އެ ސަރަޙައްދަކީ އަސަދަށް ތާޢީދުކުރާ އަލް-ޢަލާވިއްޔޫން ދަރިކޮޅުގެ މީހުން ގިނަ ސަރަޙައްދެކެވެ. އެއީ، އަސަދު ނިސްބަތްވެ ވަޑައިގަންނަވާ ދަރިކޮޅެވެ.
ނަމަވެސް، މި އަސްކަރީ ޙަރަކާތުގައި އަލް-ޢަލާވިއްޔޫން ދަރިކޮޅުގެ މީހުންނަށް އަމާޒުކޮށް އެއްވެސް ފިޔަވަޅެއް ނާޅައި ކަމަށް ސަރުކާރުން ވަނީ ބުނެފައެވެ. އޭގެ ބަދަލުގައި، މި އަސްކަރީ ޙަރަކާތުގެ އަމާޒަކީ، އަސަދަށް ވަފާތެރި ސިފައިން ހޯދުންކަމަށް ސަރުކާރުން ދަނީ ތަކުރާރުކޮށް ބުނަމުންނެވެ.
މި ގޮތުން، އަސަދަށް ވަފާތެރި ސިފައިން ހަތިޔާރު ބަހައްޓަން މުޙުލަތެއް ދިނުމަށް ފަހު މި އަސްކަރީ ޙަރަކާތް ޙުމްސާއި، ޙަލަބު އަދި ދިމިޝްޤަށް ވެސް ވަނީ ފުޅާކޮށްފައެވެ.
މި ބޮޑު އަސްކަރީ ޙަރަކާތް ފަށާފައި މި ވަނީ، ސޫރިޔާގެ ޠަރްޠޫސްގެ ރަށްބޭރުގެ ސަރަޙައްދެއްގައި ދިން ނުރައްކާތެރި ޙަމަލާތަކެއްގައި ސޫރިޔާގެ ފުލުހުންގެ 14 މީހުން މަރައިލާފައިވަނިކޮށެވެ.
މިއީ، އެޗްޓީއެސްގެ ހަނގުރާމަވެރިން ވެރިރަށް ދިމިޝްޤަށް އަރައި އަސަދުގެ ސަރުކާރު ޑިސެމްބަރު މަހުގެ 8ވަނަ ދުވަހު ވައްޓައިލި ފަހުން، އަސަދަށް ވަފާތެރި ސިފައިން ދިން އެންމެ ނުރައްކާތެރި ޙަމަލާއެވެ.
ސޫރިޔާގެ އިންތިޤާލީ ސަރުކާރުގެ ދާޚިލީ ވުޒާރާއިން ބުނީ، ޠަރްޠޫސްގެ ރަށްބޭރުގައި ދީފައިވާ ޙަމަލާތަކުގައި 14 ފުލުހުން މަރުވުމުގެ އިތުރުން ފުލުހުންގެ 10 މީހުން ޒަޚަމުވެފައިވާ ކަމުގައެވެ. އަދި، އަސަދަށް ވަފާތެރި ސިފައިން ހޯދައި، އެ މީހުންގެ ޙަރަކާތްތައް ހުއްޓުވާނެ ކަމުގެ އިންޒާރު އެ ވުޒާރާއިން ވަނީ ދީފައެވެ. ސޫރިޔާގެ ސަލާމަތީ ބާރުތަކާއި ޢާންމު ރައްޔިތުންގެ ފުރާނައަށް ނުރައްކާ ކުރާ ކޮންމެ ފަރާތެއް ހޯދައި، ހުއްޓުވާނެ ކަމުގައި ވެސް އެ ވުޒާރާއިން ބުންޏެވެ.