އަމާޒަކީ މަހެއްހާ ދުވަހުގެ ތެރޭގައި އިއްޒުއްދީން ފާލަމުގެ މަސައްކަތް ނިންމާލުން: ވަޒީރު ޑރ.މުއްޠަލިބު

މާލޭ ޢިއްޒުއްދީން ފާލަމުގެ މަސައްކަތް ކުރިއަށް އޮތް މަހެއްހާ ދުވަހުގެ ތެރޭގައި ނިންމާ، ޢާއްމުންނަށް ހުޅުވާލާނެކަމަށް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވެއްޖެއެވެ.

ވަޒީރު ވިދާޅުވީ، ފާލަން ޢާއްމުންނަށް ބަންދުކުރަންޖެހުނީ ސަލާމަތާއި ރައްކާތެރިކަމަށް ބެލުމަށްފަހުގައިކަމަށާއި، މަސައްކަތް ނުފެށި ލަސްތަކެއްވީނަމަވެސް މިހާރު ބާރު ސްޕީޑުގައި މަސައްކަތް ކުރިއަށްދާކަމަށެވެ.

މާލޭ ރަސްމީ ފާލަން ނުވަތަ ޢިއްޒުއްދީން ފާލަމަކީ، ރައްޖޭގެ ތާރީޚާއިވސް ގުޅިފައިވާ މުހިއްމު ތަނެކެވެ. ޢިއްޒުއްދީން ފާލަން މަރާމާތު ނުކޮށް ގިނަ ދުވަސްވުމުގެ ސަބަބުން ސަލާމަތީގޮތުން ރައްޔިތުންނަށް އޭގެ ނުރައްކާވެދާނެ ފަދަ ޙާލަތަކެއް މެދުވެރިވެދާނެކަމަށް ޤަބޫލުކުރައްވާ އިމާރަތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިންވަނީ އެމްޓީސީސީއަށް އަންގަވާފައެވެ.

އިއްޒުއްދީން ފާލަން އަލުން ތަރައްޤީކުރުމަށް ނިމިދިޔަ ދައުރުގެ ތެރޭގައިވަނީ އެކުންފުންޏާއި ޙަވާލުކުރައްވާފައެވެ. ޑިޒައިން އެންޑް ބިލްޑް އުސޫލުން ޙަވާލުކުރި މިމަސައްކަތް ފެށުން ލަސްވެ އަދި މަސައްކަތް ފެށުމަށްފަހުވެސް އެކަށީގެންވާ ސްޕީޑުގައި ކުރިއަށްގޮސްފައެއް ނުވެއެވެ.

މިމަސައްކަތް މިހާރު ބާރު ސްޕީޑުގައި ކުރިއަށްދާއިރު އިމާރަތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބު ވަނީ މަސައްކަތް ކުރިއަށްދާގޮތް ބައްލަވާލެއްވުމަށް އެސަރަޙައްދަށް ވަޑައިގަންނަވާފައެވެ.

މަސައްކަތް ކުރިއަށްދާގޮތް ބައްލަވާލެއްވުމަށްފަހު ޕީއެސްއެމްނިއުސްއަށް ދެއްވި އިންޓަރވިއުގައި ވަޒީރު ވިދާޅުވީ، ދައުރު ބަދަލުވީއިރު މިމަސައްކަތުގެ އެއްބަސްވުމެއް އެކުލަވާލެވިފައިވީނަމަވެސް އެމަސައްކަތް ފެށިފައި ނުވާކަމަށެވެ. އެހެންނަމަވެސް އޭރުގެ ފާލަމުގެ ޙާލަތު އޮތީ ރައްޔިތުންނަށް ގެއްލުމެއް ވެދާނެ ފަދަ ޙާލެއްގައިކަމުން ފާލަން ބަންދުކުރުމަށް އެންގީކަމަށެވެ. އެހެންނަމަވެސް މިހާރު މަސައްކަތް ކުރިއަށްދާގޮތާމެދު ހިތްހަމަޖެހިވަޑައިގަންނަވާކަމަށް ވަޒީރު ވިދާޅުވިއެވެ.

Minister Dr. Abdulla Muththalib conducted a site visit to the Izzudheen Jetty (Presidential Jetty) today to observe the upgrading works carried out by @MTCCPlc , where the latest developments of the project were reviewed.

During today’s site visit, Minister was joined by the… pic.twitter.com/8Bjxrgd10h

— Ministry of Construction, Housing & Infrastructure (@MoCImv) December 31, 2024

"އޭރު އޮތް ފާލަމަށް ވަރަށް ބޮޑަށް ގެއްލުންތަކެއްވެ، ބައިތައް ވެއްތި ރައްޔިތުންނަށް ގެއްލުމެއް ވެދާނެތީ އަޅުގަނޑުމެން އެނގީ ރޫޅާލަން. ރޫޅާލާފަ އޭރު މަސައްކަތް ފެށެން ތައްޔާރުނުވާތީ ހަގީގަތުގައި ވަރަށް ލަސްތަކެއް ވެގެންދިޔަ ފާލަން ބަންދުކޮށްފަ އޭރު މަސައްކަތް ނުފެށި. އެހެންމަވެސް މިއީ މާލޭގެ މަލަމަތިކަމަށްވެފައި، ފާލަން އެގޮތަށް ބަންދުކޮށްފައި ބޭއްވުމަކީ މިތަނަށް އަރަާފައިބާ މީހުންނަށްވެސް ފާހަގަކުރެވޭ ކަމަކަށްވެ މާލޭގެ ރީތިކަން ގެއްލިގެންދާނެ ފަދަކަމެއްކަމުން ސަރުކާރުން ވަރަށް ބޮޑަށް ބަރުއަޅައިގެން މަސައްކަތް ބާރަށް ކުރިއަށް އެބަދޭ. އުއްމީދުކުރަނީ މަހެއްހާ ދުވަހުގެ ތެރޭގައި މިމަސައްކަތް ނިންމާ ފާލަން ހުޅުވާލެވޭނެކަމަށް." ޑރ. މުއްޠަލިބު ވިދާޅުވިއެވެ.

މިމަޝްރޫޢާއި ގުޅޭގޮތުން ވާހަކަދައްކަވަމުން އެމްޓީސީސީގެ މެނޭޖިންގ ޑިރެކްޓަރ ރިޓަޔަރޑް ޑީސީޕީ އަޙްމަދު ސަޢުދީ ވިދާޅުވީ، މަސައްކަތް އަވަސްކުރުމަށް ކުންފުނީގެ ބައެއް މަޤާމުތައް ބަދަލު ގެންނަވާ އަދި މިކަމަށް ބޭނުންވާ ވަޞީލަތްތައް އެތެރެކުރާ ބައެއް ކުންފުނިތަކާ މެދުވެސް ފިޔަވަޅު އަޅުއްވާފައިވާކަމަށެވެ.

"ޕްރޮޖެކްޓް އަވަސްކުރުމަށް އަޅުގަނޑުވެސް ބައެއް އެޑްމިނިސްޓްރޭޓިވް ކުދިކުދި ބަދަލު ގެނެސް. ޕްރޮޖެކްޓް މެނޭޖަރުވެސް ވަކިކޮށް އެހެން މެނޭޖަރެއް ޢައްޔަންކޮށް، މެޓީރިއަލް ލިބުމުގައި ހުރި ދަތިތައް އަވަސްކުރުވާފައި، އަދި ހަމައެއާއެކު ބައެއް މެޓީރިއަލް ސަޕްލައިކުރުރުމަށް ސޯސްކޮށްފައި ހުރި ބައެއް ބޭރުގެ ކުންފުނިތަކުންވެސް އެއްބަސްވެފައިވާގޮތަށް ޑެލިވަރ ނުކުރީމަ އެކުންފުނިތައްވާނީ ބްލެކް ލިސްޓްކުރެވިފައި." އެމްޑީ ސަޢުދީ ވިދާޅުވިއެވެ.

މިމަސައްކަތުގެ ދަށުން ފާލަމުގެ އޯވަހެޑް ސްޓްރަކްޗރ ފްރޭމްގެ މަސައްކަތް ނިންމާފައިވާ ކަމަށާއި ފުރާޅުގައި ޝިންގަލްސް ހަރުކޮށް، ސީލިންގް ފްރޭމްވޯކްގެ މަސައްކަތް ކުރަމުން އަންނަ ކަމަށް އެމްޓީސީސީން ވިދާޅުވިއެވެ. މިމަޝްރޫޢު ޖެނުއަރީ 31 ވަނަ ދުވަހު ނިންމުމަށް އެމްޓީސީސީން ދަނީ މަސައްކަތްކުރައްވަމުންނެވެ.