ފުޓްބޯޅައިގެ އެންމެ ޝަރަފުވެރި ދެވަނަ އެވޯޑް ކަމަށްވާ ބަލޮންޑޯގެ އަހަރުގެ މޮޅު ކުޅުންތެރިޔާގެ މަގާމު ލިބުމުން އެކަމާ ކްރިސްޓިއާނޯ ރޮނާލްޑޯ ސުވާލު އުފައްދާ ސަބަބެއް ނޭނގޭ ކަމަށް ސްޕެއިންގެ މިޑްފީލްޑަރު ރޮޑްރީ ބުނެފިއެވެ.
މެންޗެސްޓާ ސިޓީގެ މިޑްފީލްޑަރ ރޮޑްރީ ފުރަތަމަ ފަހަރަށް އެކަމާއި ގުޅޭ ގޮތުން ވާހަކަ ދައްކާފައިވަނީ ދާދި ފަހުން ދުބާއީގައި ބޭއްވި ގޯލްބް އެވޯޑް ހަފުލާގައި ބަލޮންޑޯ އެވޯޑާ ގުޅޭ ގޮތުން ރޮނާލްޑޯ ދެއްކި ވާހަކަތަކާއި ގުޅިގެންނެވެ.
ފަސް ފަހަރު މަތިން ބަލޮންޑޯ އެވޯޑް ހޯދާފައިވާ ރޮނާލްޑޯ ވަނީ މި ފަހަރުގެ އެވޯޑްގެ ހައްގުވެރި ފަރާތަކީ ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއަރ ކަމަށް ބުނެފައެވެ.
ރޮނާލްޑޯގެ ކޮމެންޓާއި ގުޅިގެން ސްޕެއިންގެ ނޫހަކަށް ދިން އިންޓަރވިއުއެއްގައި ރޮޑްރީ ބުނެފައިވަނީ އޭނާއަށް އެ އެވޯޑް ލިބުމުން އެކަމާ ރޮނާލްޑޮ ކޮމެންޓް ކުރުމުން ހައިރާންވި ކަމަށާއި، އެ އެވޯޑް ދެނީ ކިހިނެއް އަދި ކޮން ގޮތަކަށްކަން ރޮނާލްޑޯއަށް ވަރަށް ރަގަޅަށް އެނގޭ ކަމަށެވެ.
ރޮޑްރީ އިތުރަށް ބުނެފައިވަނީ އޭނާއަށް މި ފަހަރުގެ އެވޯޑް ދޭން ވޯޓުދިން ގިނަ ނޫސްވެރިންތައް މީގެ ކުރިން ރޮނާލްޑޯއަށްވެސް ވޯޓް ދީފައިވާނެ ކަމަށާއި، އަދި އެކަން އެނގުމުން އޭނާވެސް އެކަމާ އެއްބަސްވާނެ ކަމަށެވެ.
މި ފަހަރުގެ ބަލޮންޑޯ އެވޯޑް ވިނީޝިއުސް ޖޫނިއަރއަށް ނުލިބޭނެކަން އެނގުމާއެކު ރެއާލް މެޑްރިޑުން ވަނީ މި އެވޯޑް ހަފުލާ ބޮއިކޮޓް ކޮށްފައެވެ.
މިދިޔަ ސީޒަނުގައި އިނގިރޭސި ޕްރިމިއާ ލީގު މެންޗެސްޓަރ ސިޓީއަށް ހޯދައިދިނުމުގެ އިތުރުން ރޮޑްރީ ވަނީ ސްޕެއިންއިން ޔޫރޯ ފުޓްބޯޅަ މުބާރާތް ކާމިޔާބުކުރިއިރު އެ ޓީމުގައި މުހިންމު ދައުރެއް އަދާކޮށްފައެވެ.
ރޮޑްރީގެ ފަޔަށް ލިބުނު އަނިޔާގެ ސަބަބުން ކުޅުމާއި ދުރުގައި މިހާރު ހުރިއިރު، އޭނާ ނެތްތަން ފޫބައްދަން އުނދަގޫ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ވަނީ ބުނެފައެވެ. މި ސީޒަނުގައި އެ ޓީމަށް އަދި ރަގަޅު ނަތީޖާތަކެއް ހޯދިފައެއް ނުވެއެވެ.