ޢުމްރާގެ އަޅުކަމާއި ގާތް ޒުވާނުންނާއި ކުޑަކުދިންނާއެކު ދީނާ ގާތް މުޖުތަމަޢެއްގެ އުއްމީދީ މާދަމައެއް

ދީނީ އަޅުކަންކަމާއެކު ޒަމާނުއްސުރެއް ދެކެވިފައި އޮންނަނީ ވަކި ޢުމުރަކަށް ދިޔުމުން ހެޔޮކަންކަން ކުރުމުގެ ވިސްނުމެވެ. މިގޮތުންވެސް ޙައްޖާއި ޢުމްރާގެ އަޅުކަމަކީ ދޮށީ ޢުމުރުގެ މީހުން އަދާކުރަންޖެހޭ ކަމެއްގެ ގޮތުގައި މުޖުތަމަޢުގައި ޤަބޫލުކުރުންތަކެއް އޮތް ދުވަސްވަރެއް މާޒީވެއްޖެއެވެ. އެހެންނަމަވެސް ދީނީގޮތުން ޢާއްމުންގެ ހޭލުންތެރިކަން އިތުރުވެ، ޒުވާނުންވެސް ދީނީކަންކަމަށް އަހަންމިއްޔަތުކަންދޭ މިންވަރުދަނީ އިތުރުވަމުންނެވެ. މިކަން އެންމެ ބޮޑަށް ފާހަގަވާ އެއްކަމަކީ ރާއްޖެއިން ޙައްޖާއި ޢުމްރާގެ އަޅުކަމަށް ދިޔުމަށް މަސައްކަތްކުރާ ޒުވާނުންގެ ނިސްބަތް އިތުރުވަމުންދާތީއެވެ.

ޙައްޖުގެ އަޅުކަމަކީ، ވަކި ކޯޓާއެއްގެ ދަށުން ވަކި ޢަދަދަކަށް މީހުންނަށް ދެވޭ ފުރުސަތެއްނަމަވެސް ޢުމްރާގެ އަޅުކަމަށްދެވެއެވެ. ފަހަކަށްއައިސް ޢުމްރާގެ އަޅުކަމަށްދާ ޒުވާނުންނާއި ކުޑަކުދިންގެ ޢަދަދުވަނީ އިތުރުވެފައެވެ. މިކަން އެންމެ ބޮޑަށް ފަހަގަކުރެވުނީ ނިމިގެންދިޔަ ޑިސެމްބަރު މަހުގެ ޗުއްޓީތެރޭގައެވެ. މިގޮތުން ރާއްޖެއިން މިހާތަނަށް އެންމެ ގިނަ ބަޔަކު ޢުމްރާއަށް ގޮސްފައިވަނީ 2024 ވަނަ އަހަރުގެ ޑިސެމްބަރު މަހުގައެވެ. 6373 ދިވެއްސަކު މިދިޔަ މަހުވަނީ ޢުމްރާއަށް ގޮސްފައެވެ.

މީގެތެރޭގައި ޙައްޖު ކޯޕަރޭޝަނުގެ ޙަވާލުގައި 800 އަށްވުރެ ގިނަ މީހުން ގޮސްފައިވާއިރު، އެކޯޕަރެޝަންގެ ޙަވާލުގައިވެސް ގިނަ ޢަދަދެއްގެ ކުޑަކުދިން ޢުމްރާއަށް މިދިޔަ މަހު ގޮސްފައިވާކަން ޙައްޖު ކޯޕަރެޝަނުން ފާހަގަކުރައްވައެވެ.

ރާއްޖޭގައި 50 އެއްހާ ކުންފުނި ޢުމްރާއަށް މީހުން ގެންދިޔުމަށް ރަޖިސްޓަރކޮށްފައިވާއިރު މިދިޔަ ޑިސެމްބަރު މަހުގެ ތެރޭގައި 33 ކުންފުންޏަކުންވަނީ ޢުމްރާގެ އަޅުކަން އަދާކުރުމަށް ދިވެހީން ޢުމްރާއަށް ގެންގޮސްފައެވެ.

ޒުވާނުންނާއި ކުޑަކުދިންގެ އިތުރުން ދިވެހީންގެ ތެރޭގައި އަށަގަންނަމުންދާ އިތުރު ރީތި އާދައެއް މިހާރުދަނީ ފާހަގަވަމުންނެވެ. އެގޮތުން ޗުއްޓީއާއި ދިމާކޮށް ޢާއިލާގެ ހުރިހާ މެމްބަރުން އެކުގައި ޢުމްރާގެ މަތިވެރި އަޅުކަން އަދާކުރުމަށް ދިޔުމުގެ އާދަ ދިވެހިންގެ ފަރާތުން އަންނަނީ ފެންނަމުންނެވެ.

ޒުވާނުންގެ މެދުގައި ޢުމްރާގެ އަޅުކަމަށް ދިޔުމުގެ ޝައުގުވެރިކަން އުފެދެމުންދިޔުމާއި ގުޅިގެން އިސްލާމީ ކަންތައްތަކާ ބެހޭ ވަޒީރުގެ ނައިބު އައްޝައިޚު މުޠީޢު އިސްމާޢީލް މުޙައްމަދު ވިދާޅުވީ، މިއީ ދިވެހީންގެ ތެރެއަށް ހެޔޮ ބަދަލެއް އަންނަކަން ފެންނަކަމެއްކަމަށެވެ. އަދި ޤައުމެއްގެ ގޮތުގައި އަދި މުޖުތަމަޢެއްގެ ގޮތުގައި އެއީ އުފާކުރަންޖެހޭކަމެއްކަން ފާހަގަކުރެއްވިއެވެ.

"އަޅުގަނޑުމެންގެ މުޖުތަމަޢުގައި ވަރަށް ގިނަ މީހުން ވަރަށް އަވަދިނެތި މިއުޅެނީ. ވަޒީފައާއި ޢާއިލީ ކަންކަމުގައި. އެހެންނަމަވެސް މިހުރިހާކަމެއް ދޫކޮށް ޢުމްރާއަށްޓަކައި މިކުރެވޭ ދަތުރަކީ، ﷲ ސުބުޙަނަހޫ ވަތަޢާލާ މާތްކުރެވި ބިމެއްގައި، މާއިކުރެއްވި ވަގުތުތަކެއް ހޭދަކުރެއްވުމަށް މިދަނީ. އެވަގުތުތަކުގައި ޢުމްރާއަށް ދާ މީހާ އެބަ އޭނަގެ ކުރިމަގު ކުރަހާލާ. ތިމާއުޅެމުން މިދަނީ އެންމެ ރަނގަޅަކަށް ނޫންކަން ދެނެގަނެ ދީނީގޮތުން އަދި އެނޫން ގޮތްގޮތުންވެސް ކަންކަން ރަނގަޅުކުރުމަށް އެބަ މަސައްކަތް ފަށާ. މިއީ ރަނގަޅު ބަދަލެއް އަސްލު." މުޠީޢު ވިދާޅުވިއެވެ.

ޢުމްރާގެ އަޅުކަމަށްދާ ޒުވާނުންނާއި ކުޑަކުދިންގެ ޢަދަދު އިތުރުވަމުންދަނީ އެ ޚިދުމަތް ދިނުމުގައި ޢުމްރާއަށް މީހުން ގެންދާ ކުންފުނިތަކުންވެސް މުހިއްމު ދައުރެއް އަދާކުރާތީކަމަށް، އިސްލާމީ ކަންތައްތަކާ ބެހޭ ވުޒާރާއިން ފާހަގަކުރައްވައެވެ. އެހެންކަމުން ކުރިއަށް އޮތްތަނުގައި، އެފަދަ ގްރޫޕްތަކާއެކު އިތުރަށް މަސައްކަތްތަކެއްކޮށް ޚިދުމަތްތައް މިހާރަށްވުރެ ފުރިހަމަކުރުމަށް މަސައްކަތްކުރައްވާނެކަމަށް އެވުޒާރާއިން ވިދާޅުވެއެވެ.

ޢުމްރާގެ އަޅުކަމަށް ދިޔުމަށް އެވްރެޖްކޮށް އަގުތަށް ހުންނަނީ 28،000 އާއި 30،000 އާއި ދެމެދުގައެވެ. ޑިސެމްބަރު ޗުއްޓީގެ އިތުރުން ސްކޫލް ބަންދު ދުވަސްތަކުގައި އަދި ވަކިން ޚާއްސަކޮށް ރަމަޟާންމަހު ޢުމްރާއަށް ދާ މީހުންގެ ޢަދަދު އަންނަނީ އަހަރުން އަހަރަށް އިތުރުވަމުންނެވެ. ރަމަޟާން މަހުގެ ފަހު 10 އެއް ސަރުކާރު ބަންދު ދުވަސްތަކެއްގެ ގޮތުގައި ސަރުކާރުން ކަނޑައެޅުއްވުމާއެކު މިޢަދަދު އިތުރުވެގެންދާނެކަމަށް ބެލެވެއެވެ.