މިދިޔަ އަހަރު ފަތުރުވެރިކަމަށް އަލަށް 1598 އެނދުވަނީ ނެރެފައި

ފަތުރުވެރިކަމަށް މިދިޔަ އަހަރު އަލަށް 1،500އަށް ވުރެ ގިނަ އެނދު ނެރެފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން 2023 ވަނަ އަހަރު ނިމުނުއިރު، ފަތުރުވެރިކަމަށް ނެރެފައިވާ އެނދުގެ ޖުމްލަ އަދަދު ހުރީ 61،650 ގައެވެ. އަދި މިހާރު މިއަދަދުވަނީ 63،248އަށް އަރާފައެވެ. މިއީ 1،598 އެނދުގެ އިތުރުވުމެކެވެ.

ފަތުރުވެރިކަމަށް ނެރޭ އެނދުގެ އަދަދު އިތުރުވަމުން އަންނައިރު މީގެ ތެރެއިން ގެސްޓު ހައުސްތަކުން ނެރޭ އެނދުގެ އަދަދު އިތުރުވާކަމީ ފާހަގަކޮށްލަން ޖެހޭކަމެކެވެ. 2023 ވަނަ އަހަރު ގެސްޓު ހައުސްތަކުން ނެރުނު އެނދުގެ އަދަދު ހުރީ 13657 ގައެވެ. މިދިޔަ އަހަރު ނިމުނުއިރު މި އަދަދުވަނީ 15621 އަށް އިތުރުވެފައެވެ. މިއީ 1964 އެނދުގެ ކުރިއެރުމެކެވެ.

ތަފާސްހިސާބުތައް ދައްކާގޮތުން ފަތުރުވެރިކަމަށް ނެރެފައިވާ 63248 އެނދަކީ، 1271 ފެސިލިޓީއަކުން ފަތުރުވެރިކަމަށް ނެރެފައިވާ އެނދެވެ.

ފަތުރުވެރިކަމުގެ ފެސިލިޓީތަކުން ނެރެފައިވާ އެނދުގެ އަދަދުތައް:

• 172 ރިސޯޓަކުން 42،547 އެނދު
• 929 ގެސްޓު ހައުސްއަކުން 15،621 އެނދު
• 155 ސަފާރީއަކުން 3،052 އެނދު
• 15 ހޮޓަލުން 2،028 އެނދު

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން ރާއްޖޭގައި ފަތުރުވެރިންނަށް ޚިދުމަތް ދިނުމަށް ރަޖިސްޓްރީކޮށްފައިވާ ބެޑު ކެޕޭސިޓީއަކީ 63248 އެނދެވެ.

ރާއްޖޭން ފަތުރުވެރިކަމަށް ނެރެފައިވާ އެނދުގެ އަދަދު އިތުރުވަމުން އަންނައިރު ރާއްޖެއަށް އަންނަ ފަތުރުވެރިންގެ އަދަދަށްވެސް ކުރިއެރުން އަންނަނީ ލިބެމުންނެވެ. އެގޮތުން މިދިޔަ އަހަރު ނިމުނުއިރު ރާއްޖެއަށް ފުރަތަމަ ފަހަރަށް 2 މިލިޔަން ފަތުރުވެރިން ވަނީ ޒިޔާރަތްކޮށްފައެވެ.

ރާއްޖޭގެ ފަތުރުވެރިކަން ކުރިއަރުވާ ބެޑް ކެޕޭސިޓީ އިތުރުކުރުމަށް ފަތުރުވެރިކަމާއި ބެހޭ ވުޒާރާއިން ދަނީ ގިނަ މަސައްކަތްތަކެއް ކުރައްވަމުންނެވެ. މީގެ އިތުރުން ރާއްޖޭގެ ފަތުރުވެރިކަން އިޝްތިހާރުކޮށް ރާއްޖެ އަންނަ ފަތުރުވެރިން އިތުރުކުރުމަށް އެމްއެމްޕީއާރްސީއާއި ގުޅިގެން ތަފާތު އެކި ފެއަރތަކުގައި ބައިވެރިވެ ކެމްޕެއިންތައް އަންނަނީ ކުރަމުންނެވެ.