ރައީސްގެ ނިންމެވުމާއެކު ފަރުޟު ޙައްޖު އަދާކުރުމަށް ދިގު އިންތިޒާރެއްގައި ތިބި ރައްޔިތުންނަށް ލުޔެއް

މުސްލިމުންގެ މައްޗަށް މާތް ﷲ ފަރުޟުކުރައްވާފައިވާ 5 ރުކުނުގެ ތެރެއިން ހަމައެކަނި ކުޅަދާނަކަން ލިބިފައިވާ މީހާ އަދާކުރުމަށް އަމުރުކުރައްވަވާފައިވާ ރުކުނަކީ ޙައްޖުގެ އަޅުކަމެވެ. މިއީ މާލީ ތަނަވަސްކަމާއި ތިމާގެ ޖިސްމާނީ ދުޅަހެޔޮކަންހުރި މިންވަރަކުން އަދާކުރުމަށް ފަރުޟުކުރައްވާފައިވާ އަޅުކަމެކެވެ.

ޙައްޖުގެ އަޅުކަން އަދާކުރުން ވާޖިބުވާނީ ތިމާގެ މައްޗަށް އެއްވެސް ދަރަންޏެއް ނެތް ނަމައެވެ. އަދި ތިމާއަކީ އަޅުކަން އަދާކުރުމަށްޓަކައި މާތްވެގެންވާ މައްކާގެ ބިމަށް ދެވޭނެ މާލީ ތަނަވަސްކަން ހުރި މީހަކަށްވާނަމައެވެ. އަދި އެ ބުރަ އަޅުކަން އަދާކުރެވޭނެ ޖިސްމާނީ ކުޅެދުންތެރިކަންވެސް ތިމާގެ ކިބައިގައި ހުންނަން ޖެހޭނެއެވެ.

މި ދެންނެވި ޝަރުތުތައް ފުރިހަމަވެ، ޙައްޖުގެ އަޅުކަން އަދާކުރުމަށް ނުދެވި އެތައް ދިވެހީންނެއް އެބަތިއްބެވެ. މިގޮތަށް ކަން ދިމާވެފައިވަނީ ދިވެހިން ޙައްޖަށް ގެންދަން ސަޢުދީ ޢަރަބިއްޔާގެ ސަރުކާރުން ދޫކުރާ ކޯޓާގެ އަދަދާއި ޙައްޖަށް ދާން ފައިސާ ދައްކާފައިވާ މީހުންގެ އަދަދު ބޮޑުތަނުން ނުބައްދަލުވުމުގެ ސަބަބުންނެވެ. ޙައްޖަށް މީހުން ގެންދިއުމަށް ރާއްޖެއަށް އަހަރަކު ލިބެނީ 1000 ކޯޓާއެވެ.

ޙައްޖު ކޯޕަރޭޝަނުން ހާމަކޮށްފައިވާ އެންމެ ފަހުގެ މަޢުލޫމާތަށް ބަލާއިރު، ޙައްޖަށް ދިއުމުގެ އުންމީދުގައި 9115 މީހުން ކިޔުގައި އެބަތިއްބެވެ. ޙައްޖު ކިޔުގެ ބެކްލޮގު އެހާމެ ބޮޑެވެ.

މިހެން ކަން އޮތްވާ، ޙައްޖަށް ނުދެވި ތިބި އެތައް ބަޔަކަށް އުފާވެރިކަން ގެނެސްދޭނެ ނިންމެވުމެއް ރައީސުލްޖުމްހުރިއްޔާ ޑރ. މުޙައްމަދު މުޢިއްޒުވަނީ ނިންމަވާފައެވެ. އެއީ ޒަމާންތަކަކަށްފަހު ރާއްޖޭން ޙައްޖަށް މީހުން ގެންދިއުމާ ބެހޭ އުސޫލަށް މުހިންމު ބަދަލެއް ގެންނެވުމަށް ރައީސުލްޖުމްހޫރިއްޔާ ނިންމެވި ނިންމެވުމެވެ. މިބަދަލާއެކު ފަރުޟު ޙައްޖުގެ އަޅުކަން އަދާނުކޮށް ތިބި މީހުންނަށް ޙައްޖު ކިއުއިން އިސްކަންދެވޭނެއެވެ. މިހެން ހެދުމުން ފަރުޟު ޙައްޖުގެ އަޅުކަން އަދާނުކުރެވި ތިބި އެތައް ބަޔަކަށް އަވަހަށް ޙައްޖަށް ދިޔުމުގެ ފުރުޞަތު ފަހިވާނެއެވެ.

މިކަމާ ގުޅިގެން ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލު ވިދާޅުވީ ރައީސްގެ ނިންމެވުމުގެ ސަބަބުން ޢުމުރުން ދުވަސްވީ އެތައް ބަޔަކު ޙައްޖުގެ އަޅުކަން އަދާކުރުމަށް ކުރަމުން އައި ދިގު އިންތިޒާރަށް ނިމުން އަންނާނެކަމަށެވެ.

"ފަރުޟު ޙައްޖު އަދާކުރުމަށް ދިގު އިންތިޒާރެއްގައި ތިބި ރައްޔިތުންނަށް ޙައްލެއް ހޯދައިދިނުމުގެ ގޮތުން، ދިވެހިރާއްޖޭން ޙައްޖަށް މީހުން ގެންދިއުމާ ބެހޭ އުސޫލަށް ބަދަލު ގެނައުމަށް ރައީސުލްޖުމްހޫރިއްޔާ ޑރ. މުއިއްޒު ނިންމެވި ނިންމެވުމަކީ ރައްޔިތުންނަށްޓަކާ ނިންމެވި ވަރަށް ރަނގަޅު ނިންމެވުމެއް." ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި ޝަކީލު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖޭގެ ޒަޢާމަތާ ހަވާލުވެވަޑައިގަތީ ޙައްޖުގެ އަޅުކަން އަދާކުރުމުގެ އުންމީދުގައި ތިބި އެތައް ބަޔަކަށް އުފާވެރި އެތައް ޚަބަރެއް ދެއްވަމުންނެވެ.

އެގޮތުން 2023 ވަނަ އަހަރުގެ ރިޔާސީ ކެންޕެއިންގެ ތެރެއިން ސެޕްޓެންބަރުމަހުގެ 1 ވަނަ ދުވަހު ޅ. ނައިފަރުގައި ބޭއްވި ޖަލްސާގައި ރާއްޖެއަށް ލިބޭ ޙައްޖު ކޯޓާ 2000 އަށް އިތުރުކުރަން މަސައްކަތްކުރައްވާނެކަމަށް އޭރުގެ ރިޔާސީ ކެންޑިޑޭޓް ރައީސް ޑރ. މުޙައްމަދު މުޢިއްޒު ވިދާޅުވިއެވެ. އަދި ޙައްޖަށް ދިއުމުގެ މާލީ ތަނަވަސްކަން ނެތް 1000 މީހަކު އެމަނިކުފާނުގެ 5 އަހަރުގެ ތެރޭގައި ސަރުކާރުގެ ޚަރަދުގައި ޙައްޖަށް ފޮނުވުމަށްވެސްވަނީ ވަޢުދުވެވަޑައިގެންފައެވެ.

ރައީސް ޑރ. މުޙައްމަދު މުޢިއްޒު ދިވެހި ޒަޢާމަތާ ހަވާލުވެވަޑައިގެންފަހުން އަހަރަކަށްވުރެ ގިނަ ދުވަސް ވެފައިވާއިރު، ޙައްޖު ކިޔުގެ ބެކްލޮގު ފިލުވައި ހައްޖާޖީންނަށް ފަހި ރަނގަޅު އިންތިޒާމްތަކެއް ހަމަޖެއްސެވުމުގެ އިތުރުން މާލީ ތަނަވަސްކަން ނެތް 1000 މީހުން ޙައްޖަށް ފޮނުވުމަށް ވެވަޑައިގެންނެވި ވަޢުދުތަކުގައި މިއަދުވަނީ ޢަމަލީ ސިފަ ޖެހެން ފަށާފައެވެ.

އެގޮތުން 2024 ވަނަ އަހަރު މާލީ ތަނަވަސްކަން ނެތް 50 މީހުން ސަރުކާރުގެ ޚަރަދުގައި ޙައްޖުގެ މަތިވެރި އަޅުކަން ފުރިހަމަކުރިއެވެ. އެމީހުން ޙައްޖަށް ގެންގޮސްފައިވަނީ ރަސްމީ 1000 ކޯޓާގެ އިތުރުން ލިބުނު ފުރުޞަތުތަކުގެ ދަށުންނެވެ.

ޙައްޖު ކިއުގެ ބެކްލޮގް ފިލުވުމަށާއި ބޮޑު އަގުގައި ޙައްޖަށް ގެންދިއުން ނިމުމަކަށް ގެނައުމަށް ރާއްޖެއަށް ލިބޭ ރަސްމީ ހުރިހާ ކޯޓާއެއް ޙައްޖު ކޯޕަރޭޝަނަށް ދެއްވުމަށްވެސްވަނީ ނިންމަވާފައެވެ.

ސަރުކާރުން އެންމެ އިސްކަމެއް ދެއްވާ އެއް ކަމަކީ ޙައްޖަށް މީހުން ގެންދަން ރާއްޖެއަށް ލިބޭ ކޯޓާގެ އަދަދު އިތުރުކުރުމެވެ. ރައީސުލްޖުމްހޫރިއްޔާ ވިދާޅުވެފައިވާ 2000 ކޯޓާގެ އަމާޒަށް ވާޞިލުވުމަށް ގިނަ މަސައްކަތްތަކެއް މިދިޔަ އަހަރުގެ ތެރޭގައި ކޮށްފައިވެއެވެ.

އެގޮތުން ސެޕްޓެންބަރު މަހުގެ 24 ވަނަ ދުވަހު ސަޢުދީ ޢަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން އަލް ސައުދާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައްދަލުކުރެއްވިއެވެ. މި ބައްދަލުކުރެއްވުމުގައި ރާއްޖެއަށް ދޭ ހައްޖު ކޯޓާ އިތުރުކޮށްދިނުމުގެ މަޝްވަރާތަކަށް ސަޢުދީ ސަރުކާރުން ތައްޔާރަށް އޮތްކަން ހާމަކުރެއްވިއެވެ.

މީގެއިތުރުން ދިވެހި ޙައްޖާޖީންނަށް ދެވޭ ޚިދުމަތުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ސަރުކާރުން ގެންދަވަނީ ކުރައްވަމުންނެވެ. އެގޮތުން މިދިޔަ އަހަރުގެ ޖެނުއަރީ މަހުގެ ތެރޭގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުވަނީ ސަޢުދީ ޢަރަބިއްޔާއަށް ވަޑައިގެން އެ ގައުމުގެ ޙައްޖާއި ޢުމްރާއާ ބެހޭ ވަޒީރާ ބައްދަލުކުރައްވައި ހައްޖަށާއި އުމްރާއަށްދާ ދިވެހިންނަށް ދެވޭ ޚިދުމަތުގެ ފެންވަރު ރަނގަޅުކުރުމަށް މަޝްވަރާކުރައްވާފައެވެ. މިމަޝްވަރާތަކުގެ ތެރެއިން މިދިޔަ އަހަރުގެ ޙައްޖުވެރިންނަށް ޢަރަފާތާއި މިނާގައި ތިބެވޭނެ ރަނގަޅު އިންތިޒާމެއް ހަމަޖެއްސެވުމަށް އެއްބަސްވެވަޑައިގެންނެވިއެވެ. ސަރުކާރުގެ މިމަސައްކަތްތަކާއެކު މިދިޔަ އަހަރަކީ އެންމެ ފުރިހަމައަށް ކަންކަން އިންތިޒާމްވެގެން ދިޔަ އަހަރުކަން ގިނަ ދިވެހި ޙައްޖުވެރިން ފާހަގަކުރިއެވެ.

މިއަހަރު ހައްޖަށް ވަޑައިގެންނެވި ދިވެހި ޙައްޖުވެރިއެއްގެ ޝުޢޫރު pic.twitter.com/KC22HpGf6x

— Ministry of Islamic Affairs (@MVIaffairs) June 22, 2024

ރައީސް ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ އެމަނިކުފާނުގެ މި ދައުރުގެ ތެރޭގައި ޙައްޖު ކިޔުގެ ބެކްލޮގު ފިލުވުމެވެ. ދިވެހި ޙައްޖުވެރިންނަށް ފަސޭހަ އިންތިޒާމްތަކެއް ހަމަޖެއްސެވުމެވެ. އަދި ދެވޭ ޚިދުމަތުގެ ފެންވަރު ރަނގަޅު ކުރައްވައި ހެޔޮ އަގެއްގައި ޙައްޖަށް ދިއުމުގެ މަގު ދިވެހި ރައްޔިތުންނަށް ތަނަވަސްކޮށްދެއްވުމެވެ. މިހާތަނަށް ރައީސް މުޢިއްޒުގެ ސަރުކާރުން ކުރައްވާފައިވާ މަސައްކަތްތަކާއެކު މި އަމާޒުތަކަށް ހުންގާނު އަނބުރާލެވިފައިވާކަން ޔަގީނެވެ. ޙައްޖުގެ އަޅުކަން އަދާކުރުމުގައި ދިވެހީންނަށް އޮތީ އުފާފާގަތި މުސްތަޤުބަލެއްކަން ޔަގީނެވެ.