ލިވަޕޫލްގެ މިސްރުގެ ފޯވާޑް މުޙައްމަދު ސަލާހަކީ މި ވަގުތު އިނގިރޭސި ލީގުގައި ހުރި އެންމެ އިތުބާރު ފޯވާޑެވެ. ތަފާތު ބޮޑުކޮށް ޓޭބަލުގެ އެއްވަނާގައި ލިވަޕޫލް އޮތުމުގެ މައިގަނޑު އެއް ސަބަބަކީ އޭނާގެ ގޯލްތަކެވެ. މި ސީޒަނުގައި އެކަނި ވެސް 21 ގޯލު ޖަހައިފި އެވެ. ފިއޮރެންޓީނާއި ޗެލްސީންނައި ރޯމާގައި ވެސް ހަރުނުލައި އުޅެނިކޮށް، ސަލާހް ލިވަޕޫލަށް ގެނެސް މޮޅު މީހަކަށް ހެދީ ލިވަޕޫލުގެ ކާމިޔާބު ކޯޗު ޔާގެން ކްލޮޕެވެ.
ސަލާހް ލިވަޕޫލާ ގުޅުނީ 2017 ވަނަ އަހަރު އެވެ. މިހާތަނަށް އެ ކުލަބަށް 376 ގޯލު ޖަހައިދީފި އެވެ. އޭނާ އަކީ ކުލަބުގެ ތާރީހުގައި ހަތަރުވަނަ އަށް އެންމެ ގިނަ ގޯލު ޖެހި ކުޅުންތެރިޔާ އެވެ. އުމުރަކީ އަދި އެންމެ 32 އަހަރެވެ. އެކަމަކު މި ސީޒަނަށް ފަހު ލިވަޕޫލް ދޫކޮށްލާނެ ވާހަކަ ސަލާހް ބުނެފި އެވެ. ކީއްވެ ހެއްޔެވެ؟ މިއީ ހަގީގަތެއް ހެއްޔެވެ؟
މިސުރުގެ ކެޕްޓަންކަން ވެސް ކުރާ ސަލާހް އެންމެ ފަހުން މި ވާހަކަ ދެއްކީ މިދިޔަ ހަފުތާގަ އެވެ. ސްކައި ސްޕޯޓްސް އަށް ދިން އިންޓަވިއުގައި ބުނީ ހިނގަމުންދަނީ ލިވަޕޫލްގައި ހޭދަކުރާނެ ފަހު ސީޒަން ކަމަށެވެ. ސަބަބަކީ މި ސީޒަނުގެ ނިޔަލަށް އޭނާގެ ކޮންޓްރެކްޓް ހަމަވުމެވެ. އެ ކޮންޓްރެކްޓް އާކުރަން ވާހަކަތައް ފަށާފައިވީ ނަމަވެސް ދެފަރާތް އެއްބަސްވާ ގޮތެއް އަދި ނުފެނެ އެވެ.
އިނގިރޭސި މީޑިއާގެ ތަޖުރިބާކާރުން ބުނަނީ ލިވަޕޫލުގައި މަޑުކުރަން ސަލާހް ނުހަނު ބޭނުންވާ ކަމަށެވެ. ލިވަޕޫލަށް އެންމެ ގިނަ ގޯލު ޖަހައިދިން ކުޅުންތެރިއަކީ އިއާން ރަޝް އެވެ. އޭނާގެ 660 ގޯލާ އެއްވަރު ނުކުރެވުނަސް ސަލާހް ލިވަޕޫލްގައި މަޑުކޮށްފިނަމަ ކުރިއަށް އޮތް ދެތިން އަހަރެއްގެ ތެރޭގައި މި ލިސްޓުގެ ދެ ވަނަ އަށް އެރިދާނެ އެވެ. ޕްރެމިއާ ލީގުގައި އެންމެ ގިނަ ގޯލު ޖަހާފައިވަނީ 260 ގޯލާއެކު އެލަން ޝިއަރާ އެވެ. 175 ގޯލާއެކު މި ލިސްޓުގައި ސަލާހް އުޅެނީ ހަތްވަނާގަ އެވެ. އެކަމަކު ލިވަޕޫލްގައި ހުރެގެން ލިސްޓުގެ ދެ ވަނާގައިވާ ހެރީކޭން ވައްޓާލެވިދާނެ ކަމަށް ގިނަ ބަޔަކު ދެކެ އެވެ. ކޭން ޖަހާފައިވަނީ 213 ގޯލެވެ.
ދެން އޮތީ އޭނާގެ އާއިލާ އެވެ. އަށް އަހަރު ލިވަޕޫލްގައި ނުވަތަ އިނގިރޭސިވިލާތުގައި ތިބެވުމުން ސަލާހް އާއިލާ މިހާރު އެދެނީ އެތަނުގައި ދިރިއުޅުމަށެވެ. ދަރިންގެ ތައުލީމާއި އެނޫން ސަބަބުތަކަށެވެ. މިހުރީ ހައްތަހާ ވެސް ލިވަޕޫލްގައި ހުންނަން ސަލާހްގެ ހިތްއެދޭނެ ސަބަބުތައް ކަމަށް ތަޖުރިބާކާރުން ދެކެ އެވެ. ސަޕޯޓަރުން ވެސް އެދެނީ ސަލާހް މަޑުކުރާށެވެ.
އެހެންވިއްޔާ ލިވަޕޫލްގެ މެނޭޖްމަންޓު މިކަމަށް ފަސްޖެހެންވީ ކީއްވެ ހެއްޔެވެ؟ ވަރަށް މުހިންމު ސަބަބުތަކެއް އެބަހުއްޓެވެ. ސަލާހް ބޭނުންވަނީ ތިން އަހަރުގެ ކޮންޓްރެކްޓެކެވެ. މިހާރު ދެމުން އަންނަ މުސާރަ ކުޑަނުވާނެ ގޮތަކަށެވެ. އޭނާ އަށް މިހާރު ހަފުތާއަކު ލިބެނީ 350000 ޕައުންޑެވެ. މިއީ ލިވަޕޫލްގެ މިހާރުގެ މެނޭޖްމަންޓްގެ ވިސްނުމެއްނޫނެވެ. އުމުރުން ދޮށިވަމުން އަންނަ ކުޅުންތެރިއަކަށް ތިން އަހަރުގެ ކޮންޓްރެކްޓެއް، ބޮޑު މުސާރައާއެކު ދީފިނަމަ އުމުރުން 35 އަހަރުވަންދެން އެމީހުންނަށް ސަލާހްގެ ބަލަދުއެރީ އެވެ. ކޮންޓްރެކްޓް ވާހަކަތަކަށް ކުރިއެރުން ނުލިބުނީ މިހެންވެ އެވެ. މީގެ އިތުރުން މިދިޔަ ސީޒަނުގައި ލިވަޕޫލަށް ޕްރެމިއާ ލީގުގެ ތަށި ގެއްލުމުގެ އެންމެ މުހިންމު އެއް ސަބަބަކީ ވެސް ސަލާހްގެ ފޯމު ކުއްލިއަކަށް އަޑިއަޅާލުމެވެ. އުމުރު މަތިވާ ވަރަކަށް މިފަދަ ކަންކަން ތަކުރާރުވާނެ ކަމަށް ލިވަޕޫލުން ދެކެ އެވެ.
ސަލާހަށް އެދޭފަދަ ކޮންޓްރެކްޓެއް ހަމަޖައްސައިދީފިނަމަ މި ސީޒަނަށް ފަހު ކޮންޓްރެކްޓް ހަމަވާ ކެޕްޓަން ވާޖިލް ވެންޑައިކާއި ވައިސް ކެޕްޓަން ޓްރެންޓް އެލެގްޒެންޑާ އާނޮލްޑާ މެދުވެސް އެފަދައިން އަމަލުކުރަން މަޖުބޫރުވާނެ އެވެ. އާނޮލްޑަކީ ޒުވާނަކަސް ވެންޑައިކް އަކީ ދޮށީ ކުޅުންތެރިއެކެވެ. އުމުރަކީ 33 އެވެ. ސަލާހު އެދޭހާ ގޮތަކަށް ލިވަޕޫލަށް އެއްބަސްނުވެވިގެން އުޅެނީ މިހެންވެ އެވެ. ނުވިތާކަށް އޭނާ ނެތަސް ޓީމުގައި މޮޅު ފޯވަޑުން އެބަތިއްބެވެ. އަދި ދޮށީ ކުޅުންތެރިއަކަށް އިންވެސްޓް ކުރުމުގެ ބަދަލުގައި ޓީމު ބިނާކުރަން ޒުވާން ކުޅުންތެރިއަކަށް ގެނައުން މޮޅު އިތުރު ކަމަށް ވެސް ލިވަޕޫލްގެ އޮތީ ގަބޫލުކޮށްގެންނެވެ.
މިހެންވެ ސްކައި ސްޕޯޓްސް އަށް ސަލާހް ދިން އެއްބަސްވުމުގެ ފަހަތުގައި އޮތީ އެންމެ ކަމެކެވެ. އޭނާ މިހާރު އެ ދައްކާ ކުޅުމާއެކު ސަޕޯޓަރުން ލައްވައި ލިވަޕޫލްގެ މެނޭޖްމަންޓަށް ކޮންޓްރެކްޓް އާކުރަން ޕްރެޝަރުކުރުން ނޫން އިތުރު ވަކި ކޮންކަމެއް ހެއްޔެވެ؟