ފަސޭހަކަމާއެކު 2-0 ގެ ނަތީޖާއަކުން އެތުލެޓިކް ކުލަބު ބަލިކޮށް ސްޕެނިޝް ސުޕަ ކަޕުގެ ފައިނަލަށް ބާސެލޯނާ ދަތުރުކޮށްފިއެވެ.
ސައޫދީ އަރަބިއްޔާގެ ޖިއްދާގެ ކިންގް އަބްދުﷲ ސްޕޯޓްސް ސިޓީ ސްޓޭޑިއަމުގައި ކުޅުނު މެޗުގައި ފުރަތަމަ ގޯލު ޖެހީ 17 ވަނަ މިނިޓްގައި ގަވީއެވެ. މިއީ އަހަރެއްހާ ދުވަހު ކުޅުމާ ދުރުގައި ހުރެފައި މީގެ ދެ މަސް ކުރިން ކުޅެން ފެށި ޒުވާން މިޑްފީލްޑަރު އޭގެ ފަހުން ޖެހި ފުރަތަމަ ގޯލެވެ. އޭނާ މި ގޯލު ހަދިޔާކުރީ ރަޖިސްޓްރޭޝަން ފުރިހަމަނުވުމުގެ ސަބަބުން މެޗުގައި ނުކުޅެވުނު ޑެނީ އޮލްމޯ އަށެވެ.
"އަހަރެން މި ގޯލު ހަދިޔާ ކުރަނީ އޭނާ އަށް. އޭނާ އަކީ މި ޓީމަށް ވަރަށް މުހިންމު ކުޅުންތެރިއެއް. އެކަން އޭނާ އަށް ވެސް އެނގޭނެ. އަހަރެން މެޗުގެ ކުރިން އޭނާ ގާތުގައި މިވާގަކަ ބުނިން. އޭނާ އާއި ޕައު ވިކްޓަރ އަކީ މި ޓީމުގެ މުހިންމު ދެ ކުޅުންތެރިން. އެ ދެކުޅުންތެރިން ރަޖިސްޓަރީވުމުން އަހަރުމެން ވަރަށް އުފާވެއްޖެ،ގަވީ
މެޗުގެ ދެ ވަނަ ގޯލު ފަހު ހާފު ފަށައިގެން ޖެހީ ލަމީން ޔަމާލެވެ. އޭގެ ފަހުން ބާސެލޯނާގެ ފްރޭންކީ ޑިޔޮންގެ ހެދި ގޯހަކުން އެތްކެޓިކް ކުލަބު ގޯލެއް ޖެހި ނަމަވެސް، ރެފްރީ އެ ގޯލު ބަލައިގެންފައެއް ނުވެއެވެ.
އަންނަ އާދީއްތު ދުވަހު ކުޅޭ މި މުބާރާތުގެ ފައިނަލްގައި ބާސެލޯނާ ކުޅޭނީ ބުމިރޭ ރެއާލް މެޑްރިޑާއި ރެއާލް މަޔޯކާ ބައްދަލުކުރާ މެޗުން މޮޅުވާ ޓީމަކާ އެވެ.
މި މެޗުގައި އެންމެ ފާހަގަ ކުރެވުނީ ބާސެލޯނާގެ އެއްވަނަ ކީޕަރު އިނާކީ ޕެންޔާ ބެންޗުގައި ބޭންދިކަމެވެ. މެޗަށް ފަހު ކޯޗު ހަންސީ ފްލިކް ބުނީ އެއީ އޭނާ ނިންމި ނިންމުމެއް ކަމަށެވެ. ނަމަވެސް ތަފްސީލެއް ކޯޗު ދީފައެއް ނުވެއެވެ.
ނަމަވެސް ސްޕޭނުގެ މީޑިއާ ރިޕޯޓްތައް ބުނާ ގޮތުން ޕެންޔާ ލައްވައި ނުކުޅުވީ އިއްޔެ އޮތް ޓީމުގެ ފަރިތަކުރުންތަކަށް އޭނާ ގަޑިޖެހިގެން އައުމުންނެވެ. ޕޮލެންޑްގެ ކީޕަރު ވޮސިއެޗް ޝެޒްނީ އަކީ ބާސެލޯނާގެ އެއްވަނަ ކީޕަރު މާކް އަންދްރޭ ޓާސްޓެގަން އަށް ބޮޑު އަނިޔާއެއްވުމުން މި ސީޒަނުގެ ފަހުބައިގައި ކުޅުވަން ކީޕަރަކެވެ. އޭނާ ރިޓަޔާމަންޓް އުވާލައި ކުޅެން ނުކުތީ ވެސް ބާސެލޯނާ އެދުމުންނެވެ. މިއީ ޝެޒްނީ ބާސެލޯނާގެ ޖާޒީގައި ކުޅުނު ދެވަނަ މެޗެވެ. މެޗުގައި މޮޅު ސޭވްތަކެއް ކުރުމާއެކު މިހާރު ބެލެވެނީ ފައިނަލް މެޗުގައި ކުޅުވާނީ އޭނާ ލައްވައި ކަމަށެވެ.
މެޗަށް ފަހު ކޯޗު ފްލިކް ބުނީ މެޗުން މޮޅުވުމާއެކު ދެ އުފަލެއް ލިބިއްޖެ ކަމަށެވެ. އެއީ ރަޖިސްޓަރީ ނުވެތިބި އޮލްމޯ އާއި ޕައު ރަޖިސްޓަރީ ވުމާއި މެޗުން މޮޅުވުން ކަމަށެވެ. އަދި ލަމީން ޔަމާލް މެޗުގެ ފަހު 25 މިނިޓްގައި ބަދަލުކުރީ ގިނަ ކުޅުންތެރިންނަށް ފުރުސަތު ދިނުމަށާއި، ސީނިއާ ބައެއް ކުޅުންތެރިންނަށް އަރާމު ކުރަން ވަގުތު ދިނުމުގެ ގޮތުން ކަމަށެވެ.
"އަހަރުމެން ދަނޑަށް އަންނަނިކޮށް ބަހުގައި ތިއްބާ އެ ދެކުޅުންތެރިން ރަޖިސްޓަރ ވެއްޖެކަން އެނގުނު. އެކަމަކު އެމީހުން ލައްވައި ނުކުޅުވީ އެމީހުންނާ ނުލައި މި މެޗަށް ތައްޔާރުވެފައި އޮތުމުން ޕްލޭން ބަދަލު ނުކުރަންވެގެން.ކޯޗު ހަންސީ ފްލިކް
މިއީ ސްޕެނިޝް ސުޕަ ކަޕް ސައުދީގައި ކުޅޭ ތިން ވަނަ އަހަރެވެ. ބޭނުމަކީ ސައޫދީގެ ފުޓްބޯޅަ ކުރިއެރުވުމާއި ސްޕޭނުގެ ފުޓްބޯޅަ ފެޑަރޭޝަނާއި ކުލަބުތަކަށް ލިބޭ ފައިސާ އިތުރުކުރުމެވެ.