ވިލުންތެރިކަމަށް އިންވެސްޓް ކުރުމަކީ އަޅަންޖެހޭ އެންމެ މުހިންމު ފިޔަވަޅު: އަލީ ނަސީރު

މޫސުމަށް އަންނަ ބަދަލުތަކުން އަސަރު ދުނިޔޭގެ ހުރިހާ ޤައުމަކަށްވެސް ކުރަމުންދާއިރު، ވިލުންތެރިކަމަށް އިންވެސްޓް ކުރުމަކީ އަޅަންޖެހޭ އެންމެ މުހިންމު ފިޔަވަޅު ކަމަށް އދ.ގައި ހުންނަވާ ރާއްޖޭގެ ދާއިމީ މަންދޫބު އަލީ ނަސީރު ވިދާޅުވެއްޖެއެވެ. އޭނާ މިހެން ވިދާޅުވީ އެމެރިކާގެ ނިއުޔޯކުގައި ހުންނަވާ ސީޖީޓީއެންއަށް ދެއްވި ބަސްދީގަތުމެއްގައެވެ.

ސީޖީޓީއެންއަށް ދެއްވި ބަސްދީގަތުމުގައި، ރާއްޖޭން އދ.އަށް ކަނޑަޅުއްވާފައި ހުންނަވާ ދާއިމީ މަންދޫބު އަލީ ނަސީރު ވަނީ ވިލުންތެރި ޤައުމަކަށްވުމުގެ މުހިންމު ކަމުގެ މައްޗަށް އަލިއަޅުއްވާ ވާހަކަ ދައްކަވާފައެވެ. އޭނާ ވިދާޅުވިގޮތުގައި 1989 ގައި ރާއްޖޭގައި ބޭއްވި ސްމޯލް ސްޓޭޓް ކޮންފަރެންސް އޮން ސީ ލެވެލް ރައިޒް އާއި ހިސާބުންވެސް މޫސުމަށް އަންނަ ބަދަލުތަކާއި ގުޅޭގޮތުން ރާއްޖެން ގެންދަނީ ވަކާލާތު ކުރަމުންނެވެ. އަދި އޭރުވެސް ޖައްވަށް ދޫކުރާ ވިހަގޭސް މަދުކޮށް، ވެށި ހިމާޔަތް ކުރުމަށްވަނީ ގޮވާލާފައެވެ.

ރާއްޖޭން އަބަދުވެސް ގޮވާލަމުން ދަނީ ވިލުންތެރިކަން އިތުރުކޮށް މޫސުމީ ބަދަލުތަކުން ލިބޭ ގެއްލުން ކުޑަކުރުމަށްކަން އޭނާ ފާހަގަކުރެއްވިއެވެ. އަދި އެންމެ ފަހުން ބޭއްވި ކޮޕް ސަމިޓުގައި ކްލައިމެޓް ފައިނޭންސިންއަށް ކަނޑައެޅުމަށް ޤައުމުތަކުން އެއްބަސްވެފައިވާ އަދަދަކީ އެދުނު މިންވަރު ނޫންނަމަވެސް އެހީތެރިކަން ބޭނުންވާ ޤައުމުތަކަށް މިއީ މުހިންމު އަދަދެއްކަމަށް އަލީ ނަސީރު ވިދާޅުވިއެވެ. އަލީ ނަސީރު ވިދާޅުވީ އިޤްތިޞާދީ އަދި މާލީ ގޮތުން ފުދުންތެރި ނޫން ޤައުމުތަކުން ވިލުންތެރިކަމަށް ކުރަންޖެހޭ ޚަރަދު އެހެން ޤައުމުތަކާއި އަޅާބަލާއިރު ބޮޑު ކަމަށެވެ. އެހެން ކަމުން ޤައުމުތަކުން ވިލުންތެރިކަމަށް ހޭދަކުރުމަށް ހައްލުތަކެއް ހޯދަން ޖެހޭ ކަމަށް އޭނާ ވިދާޅުވިއެވެ.

"އަޅުގަނޑުމެން އުންމީދު ކުރަނީ ތަރައްޤީވަމުން އަންނަ އަދި ތަރައްޤީވެފައިވާ އިޤްތިޞާދީ ގޮތުން ވަރުގަދަ ޤައުމުތަކުން، މިކަމަށް ހައްލެއް ހޯދާ ޤައުމުތަކަށް އެހީވެ އަދި އަމިއްލައަށްވެސް ވިލުންތެރިކަމަށް އިންވެސްޓް ކުރާނެ ކަމަށް. އަޅުގަނޑުމެން ޤަބޫލު ކުރަނީ ވިލުންތެރިކަމަށް އިންވެސްޓް ކުރުމަކީ އަޅަން ޖެހޭ އެންމެ މުހިންމު ފިޔަވަޅު" އދ.ގައި ހުންނަވާ ރާއްޖޭގެ ދާއިމީ މަންދޫބު އަލީ ނަސީރު ވިދާޅުވިއެވެ.

ރާއްޖެއާއި ގުޅޭގޮތުން ވާހަކަ ދައްކަވަމުން، އަލީ ނަސީރު ވަނީ ދިވެހި ކަނޑުތަކާއި އަދި ޤުދުރަތީ ވެށްޓަކީ ދިވެހިންގެ ބައެއްކަން ފާހަގަކުރައްވާފައެވެ. އެގޮތުން ޒަމާނުއްސުރެ ކަނޑު ހުރަސްކޮށް ދަތުރުކުރާ ދިވެހިންނާއި ކަނޑުތައް ގުޅިފައި އޮތްކަން ފާހަގަކުރައްވާ އޭނާ ވިދާޅުވީ، ސުނާމީ ކާރިސާއަށް ފަހު އުމްރާނީ ތަރައްޤީގެ ވިސްނުން ދިވެހިން ވަރަށް ބޮޑަށް ބަދަލުކޮށްފައިވާ ކަމަށެވެ. އެގޮތުން ގެދޮރު އެޅުމާއި ރައްކާތެރި ރަށްރަށް ތަރައްޤީކުރުމަށް މިހާރު އިސްކަން ދޭކަން އޭނާ ފާހަގަކުރެއްވިއެވެ.

އަލީ ނަސީރު ވިދާޅުވީ، އިންޑިއާ ކަނޑުގެ ޤައުމުތަކަށް ސުނާމީ އެރިއިރު، އެއްވެސް ޤައުމެއްގައި ދުރާލާ އިންޒާރު ދޭ ނިޒާމެއް ނެތް ނަމަވެސް މިއަދު އެ ހާލަތު ބަދަލުވެފައިވާކަމަށެވެ. އެގޮތުން މިހާރު އެފަދަ ހާދިސާއެއް ހިނގައިފި ނަމަ، ފުރާނަ ގެއްލޭ މީހުންގެ އަދަދު މަދު ކުރެވި އަދި އެފަދަ ކަމަކަށް ދުރާލާ ތައްޔާރުވުމަށް ފުރުސަތު އޮތަކަމަށް ވިދާޅުވިއެއެވެ.

މޫސުމަށް އަންނަ ބަދަލުތަކާއި ގުޅޭގޮތުން ރާއްޖޭން ދަނީ ދުނިޔޭގެ އެކި މަންސަތަކުގައި ވަކާލާތު ކުރަމުންނެވެ. އެގޮތުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ގެންދަވަނީ ތަރައްޤީވަމުން އަންނަ ކުދި ޤައުމުތަކަށް ރައްކާތެރިކަން ހޯއްދެވުމަށް ވަރަށް ބޮޑަށް ވަކާލާތު ކުރައްވަމުންނެވެ. އަދި ބޮޑެތި ޤައުމުތަކުން މިކަމުގައި އެހީތެރިކަން ފޯރުކޮށްދިނުމަށް އެމަނިކުފާނު ވަނީ ތަކުރާރުކޮށް ގޮވާލައްވާފައެވެ.