ހުކުރު ދުވަހުގެ ވިއްސާރަ: އެންޑީއެމްއޭއިން މިހާތަނަށް ހިންގި އެންމެ ބޮޑު އެއް ރިލީފް އޮޕަރޭޝަން

މިދިޔަ ހުކުރު ދުވަހު ކުރި ވިއްސާރައާއި ގުޅިގެން ހިންގި ރިލީފް އޮޕަރޭޝަނަކީ މިހާތަނަށް ވިއްސާރައިގެ ސަބަބުން ހާލުގައި ޖެހުނު ފަރާތްތަކަށް އެހީތެރިވުމަށްޓަކައި ހިންގުނު އެންމެ ބޮޑު އޮޕަރޭޝާންކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވިއެވެ.

ވިއްސާރައިގައި ލިބުނު ގެއްލުން ދެނެގަތުމަށް ކުރިއަށްގެންދިޔަ އެސެސްމަންޓްތަކަށްފަހު ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ނެރުއްވި ބަޔާނުގައި ވިދާޅުވީ ވާރޭވެހި ފެންބޮޑުވުމުގެ ސަބަބުން މާލެއިން 145 ގެއެއް ފާހަގަކުރެވިފައިވާކަމަށާއި އޭގެ ތެރެއިން 115 ގެއެއްގެ އެސެސްމަންޓް ހަދާ ނިމިފައިވާކަމަށެވެ. އެސެސްމަންޓް ހަދަން ބޭނުން ނުވުމާއި އިތުރު ސަބަބުތަކާއި ހެދި ބާކީ ހުރި ގޭބިސީތަކުގެ އެސެސްމަންޓް ނުހަނދާނެ އެންޑިއެމްއޭއިން ފާހަގަކުރައްވައެވެ. އަދި އަތޮޅުތެރޭގެ 8 ރަށަކުން ރިޕޯޓުކޮށްފައިވާއިރު 4 ރަށެއްގެ 73 ގެއަކަށް އެކިވަރުގެ ގެއްލުން ލިބިގެން އެސެސްމަންޓް ރިޕޯޓު ހުށައަޅާފައިވާކަމަށް އެންޑީއެމްއޭއިން ވިދާޅުވެއެވެ.

މިގޮތުން މާލެގެ ގޭބިސީތަކަށް ލިބުނު ގެއްލުން 2.2 މިލިއަނަށް އަނާކަމަށާއި އަތޮޅު ތެރޭގެ ރަށްރަށުގެ ގޭބިސީތަކަށް ލިބުނު ގެއްލުން 8 ލައްކަ ރުފިޔާއަށް އަރާކަމަށް އެންޑީއެމްއޭއިން ވިދާޅުވެއެވެ. އަދި މިއީ މާލެއާއި ރަށްރަށުގެވެސް ހަމައެކަނި ގޭބިސީތަކަށް ލިބުނު ގެއްލުންކަމަށާއި، ވިޔަފާރިއާއި ގުދަންތަކާއި ދަނޑުބިންތައް ނުހިމެނޭކަމަށް އެއިދާރާއިން ވިދާޅުވެއެވެ.

3 ޖަނަވަރީ 2025 ގައި ރާއްޖެއަށް ކުރި ވިއްސާރައިގެ އަދާ ހަމަ pic.twitter.com/kZjrzJhKVK

— NDMA Maldives (@NDMAmv) January 9, 2025

އެންޑީއެމްއޭއިން ވިދާޅުވީ، މިއީ މިހާތަނަށް ވިއްސާރައިގެ ސަބަބުން ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމަށް ހިންގުނު އެންމެ ބޮޑު އޮޕަރޭޝަންކަމަށެވެ. އަދި އެންމެ ބޮޑަށް ގެއްލުންވެ އެންމެ ގިނަ މީހުންނަށް ރައްކާތެރި ތަންތަނަށް ބަދަލުކުރަންޖެހުނު ފަހަރުކަންވެސް އެއޮތޯރިޓީން ފާހަގަކުރައްވައެވެ.

މިގޮތުން މުޅި އޮޕަރޭޝަން ހިންގުމަށް 61،000 އަށްވުރެ ގިނަ ރުފިޔާ ޚަރަދުކޮށްފައިވާއިރު، ބޯހިޔާވަހިކަމާއި ކެއުންބުއިމަށް 2 ލައްކަ ރުފިޔާގެ އެހީތެރިކަން ފޯރުކޮށްދެވިފައިވާކަމަށް އެންޑީއެމްއޭއިން ވިދާޅުވެއެވެ.

ރާއްޖެ ސަރަޙައްދުގައި އުފެދުނު ވިއްސާރަ ވިލާގަނޑެއްގެ ސަބަބުން މުޅި ރާއްޖެއަށް އައު އަހަރު ފެށުނުއިރުވަނީ ވިއްސާރަކޮށްފައެވެ. އެގޮތުން ޖެނުއަރީ މަހުގެ 3 ވަނަ ދުވަހުން ފެށިގެން 24 ގަޑިއިރުގެ ތެރޭގައި މާލެއަށް 161.9 މިލިމީޓަރުގެ ވާރޭ ވެހިފައިވާއިރު މިއީ 24 ގަޑިއިރުގެ ތެރޭގައި މާލެއަށް މިހާ ބޯކޮށް ވާރޭވެހުމުގެ ރިކޯޑެއްކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ. އަދި ޖެނުއަރީ 3 ވަނަ ދުވަހުގެ މެންދުރުފަހު 3 އިން 6 ޖެހުމާއި ހަމައަށް، 3 ގަޑިއިރުގެ ތެރޭގައި 109.8 މިލިމީޓަރުގެ ވާރޭ ވެހިފައިވާއިރު މިއީ ރިކޯޑު ޢަދަދެއްކަންވެސް މެޓުން ފާހަގަކުރައްވައެވެ.

އެންޑީއެމްއޭއިން ވިދާޅުވީ، ފެންބޮޑުވުމުގެ ސަބަބުން އިޖާބަދިނުމަށް މާލެ ސިޓީ ކައުންސިލަށް 20،000 ގޯނި ވެލި ބަސްތާޖެހުމަށް ފޯރުކޮށްދީފައިވާނެކަމަށެވެ. މާލެއިން ފެންބޮޑުވުމުގެ ސަބަބުން 740 އަށްވުރެ ގިނަ ތަނަކުން ރިޕޯޓުކޮށްފައިވާކަމަށާއި، މީގެތެރޭގައި ހިމެނެނީ ގޭބިސީތަކާއި، ވިޔަފާރިތަކާއި، ސްކޫލްތަކާއި އަދި ގުދަންތައް ހިމެނޭކަމަށް އެންޑީއެމްއޭ ވިދާޅުވެއެވެ.