ވެސްޓްހޭމް ގެ ކޯޗު ކަމާއި ހަވާލުވީ އެއީ އޭނާއަށް އެންމެ ރަގަޅު ގޮތް ކަމަށް ވެފައި އޭނާ އާއި އެ ކްލަބުގެ ވިސްނުމާއި އެއްގޮތް ވާތީ ކަމަށް ގްރަހަމް ޕޮޓަރ ބުނެފި އެވެ.
އުމުރުން 49 އަހަރުގެ ޕޮޓަރ ބުނެފައިވަނީ ދަނޑު މަތީގައި ރަގަޅު ކުޅުމަކާއިއެކު ނަތީޖާ ނެރޭނަމަ އެ ޓީމުގެ ސަޕޯޓަރުންގެ ފަރާތުން އެ ޓީމަކަށް އިތުބާރާއި ޔަގީންކަން އޮންނާނެ ކަމަށެވެ. އަދި ވެސްޓްހޭމް އާއި ހަވާލުވިއިރު އޭނާގެ ވިސްނުމާއި އެ ކްލަބުގެ މެނޭޖްމަންޓުގެ ވިސްނުން ވަރަށް ބޮޑަށް އެއްގޮތް ކަމަށާއި އެހެންކަމުން ކުރިއަށް ދިއުމުގައި އިތުރު ފަސޭހަތަކެއް ލިބިގެންދާނެ ކަމަށްވެސް ޕޮޓަރ ވަނީ ބުނެފަ އެވެ.
2023 ވަނަ އަހަރުގެ އެޕްރިލް މަހު ޗެލްސީގެ ކޯޗު ކަމުން ވަކިވުމަށްފަހު ފުރަތަމަ ފަހަރަށް ކޯޗިންގެ ތެރެއަށް ޕޮޓަރ އައިސްފައިވާއިރު އޭނާ ވަނީ ދިގު ބްރޭކަކަށްފަހު އަލުން އެނބުރި އައިއިރު އޭނާއަށް އިތުރު ޔަގީން ކަމަކާއި އިތުބާރު ލިބިފައިވާ ކަމަށެވެ.
އަދި ފާއިތުވެދިޔަ ދުވަސްތަކުގައި އެކި ކްލަބުތަކުގެ ވެރިންނާއިއެކު މަޝްވަރާތަކެއް ކުރެވިފައިވާކަމަށްވެސް ޕޮޓަރ ވަނީ ފުރަތަމަ ފަހަރަށް ބުނެފަ އެވެ.
ޕޮޓަރގެ އިރުޝާދުގެ ދަށުން ވެސްޓްހޭމް ކުޅޭ ފުރަތަމަ މެޗުގައި އަންނަ އަންގާރަ ދުވަހު ނިކުންނާނީ ފުލަމް އާއި ދެކޮޅަށެވެ.