މުސްލިމް ވޯލްޑް ލީގުގެ ކޮންފަރެންސެއްގައި ބައިވެރިވެވަޑައިގަތުމަށް ވަޒީރު ޑރ. ޝަހީމް ޕާކިސްތާނަށް

މުސްލިމް ވޯލްޑް ލީގުގެ ބައިނަލްއަޤުވާމީ ކޮންފަރެންސެއްގައި ބައިވެރިވެވަޑައިގަތުމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ޕާކިސްތާނަށް ވަޑައިގަންނަވައިފިއެވެ.

އިސްލާމީ ކަންތައްތަކާބެހޭ ވުޒާރާއިން ވިދާޅުވީ އިސްލާމީ މުޖުތަމަޢުތަކުގައި އަންހެނުންނަށް ތަޢުލީމުދިނުމާ ބެހޭގޮތުން ބާއްވާ ބައިނަލްއަޤުވާމީ ކޮންފަރެންސްގައި ވަޒީރު ޑރ. މުޙައްމަދު ޝަހީމް ޢަލީ ސަޢީދު، ޢިލްމުވެރިންގެ ސެޝަންގައި ވާހަކަފުޅުދައްކަވާނެ ކަމަށެވެ. ވަޒީރު ޑރ. ޝަހީމަކީ މުސްލިމު ވޯލްޑްލީގްގެ ސްޕްރީމް ކައުންސިލްގެ މެންބަރެކެވެ.

އިސްލާމީ ކަންތައްތަކާބެހޭ ވުޒާރާއިން ވިދާޅުވީ ޑރ. ޝަހީމް ޕާކިސްތާނަށްކުރައްވަނީ 2 ދުވަހުގެ ދަތުރުފުޅެއް ކަމަށެވެ.

އަންހެނުންނަށް ތަޢުލީމުދިނުމާ ބެހޭގޮތުން ބާއްވާ ބައިނަލްއަޤުވާމީ ކޮންފަރެންސް އޮންނާނީ މިމަހުގެ 10 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ. މި ކޮންފަރެންސްގައި އިސްލާމީ މުޖުތަމަޢުތަކުގައި އަންހެނުންނަށް ތަޢުލީމު ޙާސިލުކުރުމުގައި ދިމާވާ ދަތިތައް ނައްތާލުމުގެ ގޮތުން ޕްރޮގުރާމްތައް ތަޢާރަފްކުރެވި، މަސައްކަތްތަކެއް ފެށޭނެކަމަށް މުސްލިމް ވޯލްޑް ލީގުން ވިދާޅުވެއެވެ.

މި ކޮންފަރެންސްފައި އިސްލާމީ ޤައުމުތަކުގެ ތަޢުލީމީ ވަޒީރުންނާއި އ.ދ. ހިމެނޭހެން ބައިނަލްއަޤުވާމީ ޖަމިއްޔާތަކާއި އިޖުތިމާޢީ ޖަމިއްޔާތަކުގެ މަންދޫބުންނާއި އަންހެނުންނަށް ތަޢުލީމީ ފުރުޞަތުތައް ފޯރުކޮށްދިނުމުގެ ދާއިރާއިން ދިރާސާކުރާ މަރުކަޒުތަކާއި އިސްލާމީ ފަތުވާދޭ ކައުންސިލްތަކާއި ބޮޑެތި އިސްލާމިކް ޔުނިވަރސިޓީތަކުން ބައިވެރިވާނެއެވެ.

މުސްލިމް ވޯލްޑް ލީގަކީ އިސްލާމީ ވަހުދަތު ފެތުރުމަށާއި ދީނާމެދު ހޭލުންތެރިކަން އުފެއްދުމަށް ސަޢުދީ ޢަރަބިއްޔާގެ މައްކާގައި އުފެދުނު ބައިނަލްއަޤުވާމީ ޖަމިއްޔާއެކެވެ.