މާލެ ފެންބޮޑުވެ، ފެންހިންދުމުގައި ސިފައިން ޙަރަކާތްތެރިވަނީ

މިރޭ މެންދަމު ބޯކޮށް ވާރޭވެހި މާލޭގައި ފެންބޮޑުވުމުގެ ސަބަބުން މަގުތަކުން ފެން ހިންދުމުގެ މަސައްކަތުގައި ސިފައިން ޙަރަކާތްތެރިވާން ފަށައިފިއެވެ.

މިހާރު ރާއްޖެއަށް ކުރަމުންއަންނަ ވިއްސާރާގައި މިރޭ އިރާކޮޅުންފެށިގެން މާލެއަށް އަންނަނީ ވާރޭ ވެހެމުންނެވެ. މެންދަމު ބޯކޮށްލި ވާރެއާއެކު މާލޭގެ ބައެއް ސަރަޙައްދުތަކުގައިވަނީ ވަރަށްބޮޑަށް ފެންބޮޑުވެފައެވެ. އެއާއެކު ސިފައިންވަނީ މަގުތަކަށް ނުކުމެ ފެންހިންދުމުގެ މަސައްކަތް ފަށާފައެވެ. އަދި ޢާންމު ރައްޔިތުންގެ ގެދޮރާއި ވިޔަފާރިކުރާ ތަންތަނާއި އެނޫންވެސް ޢިމާރާތްތަކަށް ފެން ވަނަނުދިނުމަށް ވެލިބަސްތާ ޖެހުމުގެ މަސައްކަތްވެސް ކުރަމުން ދެއެވެ.

އަދާހަމަ# ވެސްޓް ޕާކު ސަރަހައްދު - 5 ޕަންޕް، އައިޖީއެމްއެޗް ސަރަހައްދު - 2 ޕަމްޕް ބޮޑުވަޅު ސަރަހައްދު - 1 ޕަންޕު ބަހައްޓައިގެން ފެން ހިންދުމުގެ މަސައްކަތް ދަނީ ކުރަމުން. މީގެއިތުރުން އެމްއެންޑީއެފް މާލޭ އޭރިއާ ކޮމާންޑުން، ވެލިބަސްތާ ޖެހުމުގެ މަސައްކަތް ވެސް ދަނީ ކުރަމުން. pic.twitter.com/sEJEpm0E3a

— Maldives National Defence Force (@MNDF_Official) January 10, 2025

ބޯކޮށް ވާރޭ ވެހި މާލޭގެ ބައެއް މަގުތަކުގައި ފެންބޮޑުވުމާ ގުޅިގެން، ފެން ހިންދުމުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ހަރަކާތްތެރިވަމުން އަންނަކަން ހާމަކުރައްވައި އެމްއެންޑީއެފުން ވިދާޅުވީ މާލޭގެ ތިން ސަރަޙައްދެއްގައި ޕަންޕު ބޭނުންކޮށްގެން ފެން ހިންދުމުގެ މަސައްކަތް ކުރަމުން އަންނަކަމަށެވެ. ވެސްޓް ޕާކު ސަރަހައްދުގައި 5 ޕަންޕް، އައިޖީއެމްއެޗް ސަރަހައްދުގައި 2 ޕަމްޕް ބޮޑުވަޅު ސަރަހައްދުގައި 1 ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުން އަންނަކަމަށާ، މީގެއިތުރުން އެމްއެންޑީއެފް މާލޭ އޭރިއާ ކޮމާންޑުން، ވެލިބަސްތާ ޖެހުމުގެ މަސައްކަތް ވެސް ކުރަމުން އަންނަކަން އެފަރާތުން ފަހަގަކުރައްވައެވެ.

މިހާރު ރާއްޖެއަށް ކުރަމުންއަންނަ ވިއްސާރާގައި މުޅި ރާއްޖެއަށްހެން ވިއްސާރަކުރާނެކަމަށް މޫސުމާވެހޭ ޤައުމީ އިދާރާއިން ލަފާކުރެއެވެ. އެގޮތުން މިހާރުވެސް ބ.އަތޮޅުންފެށިގެން ދ.އަތޮޅާ ހަމައަށް ވަނީ ރީނދޫ ސަމާލު ނެރެފައެވެ. މިރޭ މެންދަނުން އަލިވެ 3:00އިން ފެށިގެން މާދަމާ ހެނދުނު 4:00އާ ހަމައަށް މިސަރަޙައްދަށް ގުގުރުމާއެކު ބޯކޮށް ވާރޭ ވެހޭނެކަމަށް ލަފާކޮށް މެޓް އޮފީހުން ވަނީ ރީނދޫ ސަމާލު ނެރެފައެވެ.