އަންނަ ހޯމަ ދުވަހުން ފެށިގެން މުޅި ރާއްޖެއަށް މޫސުން ގޯސްވާނެ: މެޓް އޮފީސް

އަންނަ ހޯމަ ދުވަހުން ފެށިގެން މުޅި ރާއްޖެއަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާއިން ލަފާކުރައްވައިފިއެވެ. މެޓް އޮފީހުން ވިދާޅުވީ ރާއްޖޭގެ އިރުމައްޗަށް ވާގޮތަށް ސަރކިއުލޭޝަނެއް އުފެދެމުން އަންނަކަމަށެވެ.

ރާއްޖޭގެ ހުޅަނގު ބިތުގައި އުފެދިފައިވާ ސަރކިއުލޭޝަންއެއްގެ ސަބަބުން ހުކުރު ދުވަހުން ފެށިގެން ރާއްޖޭގެ އެކި ހިސާބުތަކަށް ދަނީ ވިއްސާރަކުރަމުންނެވެ. މިގޮތުން ކުރިއަށް އޮތް 24 ގަޑިއިރުގެ ތެރޭގައިވެސް އެކި ހިސާބަށް ކެރީގެ އަސަރުކުރާނެކަމަށް މޫސުމާބެހޭ ޤައުމީ އިދާރާއިން ލަފާކުރައްވައެވެ.

މެޓް އޮފީހުން ވިދާޅުވީ އާދިއްތަ ދުވަހު ރާއްޖޭގެ މޫސުން އާއްމުގޮތެއްގައި ބަނަކޮށް އޮތްނަމަވެސް މޫސުން ގޯސްނުވާނެކަމަށެވެ. އަދި ރާއްޖޭގެ އިރުމަތީގައި ސަރކިއުލޭޝަންއެއް އުފެދެމުން އަންނައިރު، އެސަރކިއުލޭޝަންގެ އަސަރު ރާއްޖެ ސަރަޙައްދަށް ކުރާނެކަމަށް ބެލެވެނީ ހޯމަ ދުވަހުން ފެށިގެން ކަމަށެވެ.

އެހެންކަމުން ހޯމަ ދުވަހުން ފެށިގެން ރާއްޖޭގެ ބޮޑު ބަޔަކަށް ބޯކޮށްވާރޭވެހޭނެކަމަށް މެޓު އޮފީހުން ލަފާކުރައްވައެވެ. މެޓް އޮފީހުން ވިދާޅުވީ އަންނަ ހަފްތާގެ ހޯމަ، އަންގާރަ އަދި ބުދަ، މި ތިން ދުވަހު މޫސުން ގޯސްވާނެކަމަށާއި އެދުވަސްތަކުގައި ރާއްޖެ ސަރަޙައްދުގެ ވައި ބާރުވާނެކަމަށާއި ކަނޑުތައްވެސް ގަދަވާނެކަމަށް ލަފާކުރެވޭނެކަމަށެވެ.