އޮރިޔާން ކާޑު އުފައްދާ އަންހެނެއް ކަމުގައިވާ ސްޓޯމީ ޑެނިޔެލްސަށް ރިޝްވަތު ދިނުމާއި, އެ މުޢާމަލާތް ސިއްރު ކުރުމަށް ވިޔަފާރީގެ ލިިޔެކިޔުންތައް އޮޅުވައިލުމާ ގުޅޭ ދަޢުވާ ސާބިތުވެފައިވާ އެމެރިކާގެ އިންތިޚާބީ-ރައީސް ޑޮނަލްޑް ޓްރަމްޕަށް އެ ދަޢުވާއާ ގުޅިގެން އެއްވެސް އަދަބަކާ ކުރިމަތިލައްވަން ޖެހިވަޑައިނުގަންނަވާނެ ކަމަށް އެމެރިކާގެ ކޯޓަކުން ޙުކުމް ކޮށްފިއެވެ. މި މައްސަލައިގައި ޖަލު ޙުކުމެއް ނުވަތަ އެހެން ވެސް އެއްވެސް އަދަބަކާ ޓްރަމްޕަށް ކުރިމަތިލައްވަން ޖެހިވަޑައިނުގަންނަވާނެ ކަމަށް ޙުކުމް ކުރައްވާފައި ވަނީ ފަނޑިޔާރު ހުއާން މެރްޗަނެވެ.
ޑެނިޔެލްސަށް ރިޝްވަތުގެ ފައިސާ ދިނުމުގެ މުޢާމަލާތް ހިންގާފައި ވަނީ 2016ވަނަ އަހަރު ބޭއްވި އެމެރިކާގެ ރިޔާސީ އިންތިޚާބުގެ ކުރިންނެވެ. ޑެނިޔެލްސަށް ޓްރަމްޕް ރިޝްވަތު ދެއްވާފައި ވަނީ ރިޔާސީ ރޭހުގައި ކުރިއެރުން ހޯދުމަށް, އޭނާއާ ގުޅޭ މަޢުލޫމާތުތަކެއް ސިއްރު ކުރުމުގެ ބޭނުމުގައެވެ. މި މައްސަލައާ ގުޅޭ 34 ދަޢުވާއެއް ޓްރަމްޕުގެ މައްޗަށް އުފުލިއެވެ. ނިއު ޔޯކް ސިޓީގެ ކޯޓެއްގައި ހިނގި ޝަރީޢަތް ހަތް ހަފުތާއަށް ދެމިގެން ދިޔައިރު, ޓްރަމްޕްގެ މައްޗަށް އެ 34 ދަޢުވާ ސާބިތުވާ ކަމަށް ޝަރީޢަތުގެ ޖޫރީން ވަނީ ނިންމާފައެވެ.
މި މައްސަލައިގައި އަދަބަކާ ކުރިމަތިލައްވަން ޖެހިވަޑައިނުގަންނަވާނެ ކަން އެނގުމަކީ ޓްރަމްޕަށް ލިބުުނު ވަރަށް ބޮޑު ތަސައްލީއެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. މި ހިނގާ ޖަނަވަރީ މަހުގެ 20ވަނަ ދުވަހު އެމެރިކާގެ ރައީސް ކަމުގެ މަޤާމާ ޓްރަމްޕް ޙަވާލުވެ ވަޑައިގަންނަވާނެއެވެ. މި މައްސަލައިގައި ޙުކުމް ކުރައްވަމުން ފަނޑިޔާރު މެރްޗަން ވިދާޅުވީ، އެއްވެސް އަދަބަކާ ކުރިމަތިލައްވަން ޓްރަމްޕަށް ޖެހިވަޑައިނުގެންނެވި ނަމަވެސް، އޭނާގެ ކުށުގެ ރެކޯޑުން ރިޝްވަތުގެ މައްސަލަ ފޮހެވިގެން ނުދާނެ ކަމުގައެވެ. އަދި، ކުށުގެ ރެކޯޑު ސާފު ނުވާނެ ކަމުގައެވެ. ނަމަވެސް، ރައީސް ކަމުގެ ހުވާ ކުރެއްވުމުގެ ކުރިން، މައްސަލަ މި ވަނީ ނިންމައި، ފައިލްކޮށްފައެވެ.
މިއީ، ޖިނާޢީ ކުށެއް ސާބިތުވެފައިވާ މީހަކު އެމެރިކާގެ ރައީސް ކަމުގެ މަޤާމާ ޙަވާލުވާ ފުރަތަމަ ފަހަރެވެ. ފަނޑިޔާރު މެރްޗަން ވިދާޅުވީ، މި މައްސަލައިގައި ޓްރަމްޕަށް އެއްވެސް އަދަބަކާ ކުރިމަތިލައްވަން ޖެހިވަޑައިނުގަންނަވާނެ ކަމަށް ޙުކުމް ކޮށްފައި ވަނީ އެމެރިކާގެ ޤާނޫނުއަސާސީގައިވާ ގޮތުގެ މަތިން ކަމުގައެވެ. އަދި، ރައީސް ކަމުގެ މަޤާމަށް އެމެރިކާގެ ޤާނޫނު އަސާސީން ލިބިދީފައިވާ ބާރުތަކާއި، އެ މަޤާމުގައި ހުންނަވާ ފަރާތަކަށް ލިބިދީފައިވާ ޤާނޫނީ ރައްކާތެރިކަން އިންތިހާއަށް ފުޅާ ނަމަވެސް، ސާބިތުވެފައިވާ ދަޢުވާއެއް ކުށުގެ ރެކޯޑުން ފޮހެލުމަކީ ކުރެވޭނެ ކަމެއް ނޫން ކަމުގައި ވެސް އޭނާ ވިދާޅުވިއެވެ.
މައްސަލައިގައި ޝަރިޢަތުގައި ޓްރަމްޕް ވަނީ އޭނާއާ ދެކޮޅަށް އުފުލާފައިވާ ދަޢުވާތަކަށް އިންކާރު ކުރައްވާފައެވެ. އަދި، އެއީ 2024ވަނަ އަހަރު ބޭއްވި ރިޔާސީ އިންތިޚާބުގައި އޭނާ ވާދަކުރައްވާނެ ކަން އިޢުލާނު ކުރެއްވުމާ ގުޅިގެން، އޭނާއާ ދެކޮޅަށް އުފުލާފައިވާ ސިޔާސީ ދަޢުވާތެއްގެ ގޮތުގައި ސިފަ ކުރައްވާފައެވެ. "އަހަރެންނަކީ މައުސޫމު މީހެއް، އަހަރެން އެއްވެސް ކުށެއް ނުކުރަން،" ދަޢުވާތައް ސާބިތުވެ، ޙުކުމް ކުރުމުގެ ކުރިން ޓްރަމްޕް ވިދާޅުވެފައިވެއެވެ.
ރިޝްވަތުގެ މައްސަލައިގައި އަދަބަކާ ކުރިމަތިލައްވަން ޖެހިވަޑައިނުގަންނަވާނެ ކަމަށް ޙުކުމް ކޮށްފައިވީ ނަމަވެސް، ޓްރަމްޕާ ދެކޮޅަށް ސާބިތު ކޮށްފައިވާ ދަޢުވާ އިސްތިޢުނާފު ކުރުމުގެ ފުރުޞަތު އޭނާއަށް ލިބިވަޑައިގަންނަވާނެއެވެ. އަދި، ޖަނަވަރީ 20ވަނަ ދުވަހު ފަށާ ހަތަރު އަހަރުގެ ރިޔާސީ ދައުރުގެ ތެރޭގައި މި މައްސަލައިގެ އިސްތިޢުނާފު މަރުޙަލާގެ ޝަރިޢަތްތައް ކުރިއަށްދާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. "އެ ކަން އެ ނިމުނީ، ދެން އޮތީ ބިލާހެއް ފަދަ މި ކަން އިސްތިޢުނާފު ކުރުން،" ސޯޝަލް މީޑިޔާގައި ޕޯސްޓު ކުރައްވަމުން ޓްރަމްޕް ވިދާޅުވިއެވެ.