ބަލިވުމަކީ މައްސަލެއް ނޫން ކަމަށާއި، ކުރިއަށްދެވޭނީ ހެދޭ ގޯސްތައް ގުބޫލުކޮށް އެކަންކަން ރަނގަޅުކޮށްގެން ކަމަށް އޭޝިއަން ޓެނިސް ފެޑެރޭޝަން (އޭޓީއެފް) ގެ މުބާރާތުގެ ދެ ކެޓެގެރީއަކުން ޗެމްޕިއަންކަން ހޯދީ އާރާ އާސާލް އާޒިމް ބުނެފިއެވެ. އާރާ މިހެން ބުނެފައިވަނީ ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުންނެވެ.
ރާއްޖޭގެ ޓެނިހުގެ ތާރީޚުގައި ބޭއްވި ފުރަތަމަ އޭޝިއަން ޓެނިސް ފެޑެރޭޝަން މުބާރާތުގެ ކާމިޔާބީ ހިއްސާކުރަމުން އާރާ ބުނީ ބަލިނުވެ ކާމިޔާބީގެ އުފާ ހާސިލު ނުކުރެވޭނެ ކަމަށެވެ. އެގޮތުން ހެދޭ ގޯސްތައް ގަބޫލުކުރުމަކީ އެންމެ މުހިންމު ކަންތައް ކަމަށާއި، އެއަށްފަހު ކުރިއެރުން ހޯދުމަށް މަސައްކަތް ކުރަންޖެހޭނެ ކަމަށް ކުރިއަރަމުން އަންނަ ޓެނިސް ކުޅުންތެރިޔާ އާރާ ބުންޏެވެ.
"މި ފަހަރު ދެވަނަ ހަފުތާގައި ޑަބަލްސް އިވެންޓުގައި ޕާޓްނަރާ އެއްކޮށް ކުޅެ މޮޅެއް ނުހޯދުނު. އެހެންވެ ދެން އަންނަ ފަހަރަކު ބަލާނީ ހެދުނު ގޯސްތައް ރަނގަޅުކޮށް މޮޅުވާން" އާރާ ބުންޏެވެ.
މުބާރާތުގައި ވާދަކުރި ކުޅުންތެރިންގެ ތެރެއިން އެންމެ ބޮޑު ކާމިޔާބެއް ހޯދި އެއް ކުޅުންތެރިޔާ އާރާ ބުނީ މުބާރާތުގައި އެއް ފެންވަރެއްގައި ކުޅުން ހިފެހެއްޓުމަށްޓަކައި ވަރަށް ބުރަކޮށް މަސައްކަތްކުރަން ޖެހުނު ކަމަށެވެ.
"ދިގު މެޗުތައް ކުޅެމުންދާއިރު ދެންއޮތް މެޗުތަކަށްވެސް ތައްޔާރުވާން ޖެހޭ، އަނެއްކާ އެ މެޗަށްވެސް ރީސެޓްވާން ޖެހޭނެ. ބޮޑީވެސް ރިކަވަރީކޮށް ހުރިހާކަމެއް ކުރަން ޖެހޭނެ. އަނެއްކާ ދެން އޮންނަ މެޗަށް ފްރެޝް ސްޓާޓަކާ އެއްކޮށް ވަރަށް ހިތްވަރުކުރަންޖެހޭނެ" އެންމެ ފަހުން ރާއްޖޭގައި ބޭއްވި އޭޓީއެފް މުބާރާތާ ގުޅޭގޮތުން އާރާ ބުންޏެވެ.
އާރާ ބުނީ ރާއްޖޭގައި އެންމެ ފަހުން ބޭއްވި މުބާރާތުގައި ވާދަކުރީ ބޭރުގެ އެހެން މުބާރާތެއްގައި ވާދަކުރުމަށްފަހު ކަމަށާއި، މުބާރާތަށް ތައްޔާރުވާން ހެދި ތަމްރީންތަކާއެކު މުބާރާތާ ކުރިމަތީލީ ރިކަވަރީއަށް ވަގުތު ނުލިބުމުގެ ސަބަބުން ވަރުބަލިކަންމަތީގައި ހުރެ ކަމަށެވެ.
ރާއްޖޭގެ ގައުމީ ސިންގަލްސް ޗެމްޕިއަންކަންވެސް ހޯދައި، މިދިޔަ އަހަރު މޯލްޑިވްސް ސްޕޯޓްސް އެވޯޑްސްގައި ހޮވި އެންމެ މޮޅު އަންހެން ޓެނިސް ކުޅުންތެރިޔާގެ މަގާމުވެސް ހޯދި އާރާ ވަނީ އޭޓީއެފްގެ ފުރަތަމަ މުބާރާތުގެ ޑަބަލްސް ބައިން ޗެމްޕިއަންކަން ހޯދާފައެވެ. އަދި އޭނާ ވަނީ އޭޓީއެފް މޯލްޑިވްސް އޯޕަން އާއި އޭޓީއެފް މޯލްޑިވްސް 16 އަހަރުން ދަށުގެ ޖޫނިއަރ އޯޕަންގެ އަންހެން ސިންގަލްސް ޗެމްޕިއަންކަން ހޯދާފައެވެ.