ވިއްސާރައާ ގުޅިގެން އެހީތެރިވުމަށް ސްޓެލްކޯއާއި ފެނަކައިގެ ޓިމްތައްވެސް ތައްޔާރީ ހާލަތަށް!

ވިއްސާރައާއި ގުޅިގެން ކަރަންޓުގެ ޚިދުމަތަށް ދިމާވެދާނެ މައްސަލަތަކާއި، ވިއްސާރައިގައި ލިބިދާނެ އެހެނިހެން ގެއްލުންތަކަށް އެހީތެރިކަންފޯރުކޮށްދިނުމަށް ސްޓެލްކޯ އަދި ފެނަކައިގެ ޓީމުތަކުން ތައްޔާރީ ޙާލަތުގައި ތިބިކަމަށް އެ ދެ ކުންފުނިން ވިދާޅުވެއްޖެއެވެ.

މިހަފްތާގެ ކުރިއަށް މިއޮތް ދުވަސްތަކުގައި ރާއްޖެއަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ލަފާކޮށްފައިވާއިރު، މިއަދުވެސް ރާއްޖޭގެ އެކި ހިސާބުތަކަށް ދަނީ ވިއްސާރަކުރަމުންނެވެ.

ވިއްސާރައިގައި ލިބިދާނެ ގެއްލުންތަކަށް އެހީވުމަށް ސްޓެލްކޯ އަދި ފެނަކައިންވެސް ޚާއްސަ ޓާސްކްފޯސް ވަނީ އެކުލަވާލާފައެވެ. އެގޮތުން މާލެއާއި އެ ކުންފުނިތަކުން ޚިދުމަތްދޭ ރަށްތަކުގައިވެސް ޚާއްސަ ރެސްޕޮންސް ޓީމްތައް ވަނީ ތައްޔާރުކޮށްފައެވެ.

ސްޓެލްކޯއިން ވިދާޅުވީ ވިއްސާރަކުރާނެކަމަށް ލަފާކޮށް މޫސުމާއި ބެހޭ ޤައުމީ އިދާރާއިން ނެރެފައިވާ ބަޔާނާއި ގުޅިގެން، ފެންބޮޑުވެ ލިބޭ ގެއްލުންތައް ކުޑަކުރުމަށް ދުރާލާ ފިޔަވަޅުއެޅުމަށް ނިންމައި، ސްޓެލްކޯގެ މެނޭޖްމަންޓުން ޚާއްސަ ޓާސްކްފޯހެއް އެކުލަވާލާފައިވާކަމަށެވެ. އަދި މި ހާލަތުގައި އެންމެ އިސްކަމެއް ދޭނީ މާލެ ހިިމެނޭހެން ސްޓެލްކޯއިން ޚިދުމަތްދޭ ރަށްރަށުގައި ހުރި އެކުންފުނީގެ ކްރިޓިކަލް އިންފްރާސްޓްރަކްޗަރ ރައްކާތެރި ކުރެވޭނެ އިންތިޒާމުތައް ހަމަޖެއްސުމާއިއެކު، ރައްޔިތުންނަށް ދެމުންގެންދާ ޔުޓިލިޓީ ޚިދުމަތްތައް މެދުކެނޑުމެއްނެތި ފޯރުކޮށްދިނުމަށްކަމަށް އެކުންފުނިން ވަނީ ވިދާޅުވެފައެވެ.

މީގެދިއުތުރުން ވިއްސާރައިގެ ސަބަބުން ލިބޭ ގެއްލުން ކުޑަކުރުމަށް ރައްޔިތުން ބޭނުންވާ އެހީތެރިކަން ފޯރުކޮށްދިނުމަށް ސްޓެލްކޯއިން ޚިދުމަތްދޭ ހުރިހާ ރަށެއްގައިވެސް ސްޓެލްކޯގެ މުވައްޒަފުން ތައްޔާރަށް ތިބިކަމަށް އެ ކުންފުނިން ވިދާޅުވެފައެވެ.

ފެނަކައިން ނެރެފައިވާ ނޫސް ބަޔާނެއްގައި ވިދާޅުވި ފެނަކައިގެ ބްރާންޗްތަކުގައި އެކުލަވާލާފަވާ ކުއްލި ޙާލަތްތަކަށް އިޖާބަދޭ ޓީމްތައް، ރަށްރަށުގައި ޙަރަކާތްތެރިވާ މުވައްސަސާތަކާ ގުޅިގެން ހަރަކާތްތެރިވުމަށް ތައްޔާތީ ޙާލަތުގައި ތިބިކަމަށެވެ.

އެގޮތުން ފެނަކައިން ޚިދުމަތްދޭ 151 ރަށުގައި ޓީމްތައް އެކުލަވާލާފައިވާކަމަށާއި މި ޓީމްތަކުގައި ޖުމްލަ 2311 މުވައްޒަފުން ހަރަކާތްތެރިވާކަމަށް ފެނަކައިން ވަނީ ވިދާޅުވެފައެވެ.

ރާއްޖެއަށް މިހާރު ކުރަމުންދާ ވިއްސާރައަކީ ބޭ އޮފް ބެންގާލް ސަރަޙައްދުގައި އުފެދިފައިވާ ކޮޅިގަނޑެއްގެ ސަބަބުން ކުރަމުންދާ ވިއްސާރައެވެ. ވިއްސާރައިގެ އަސަރު މުޅި ރާއްޖެއަށް ކުރާނެކަމަށް ލަފާކޮށްފައިވާއިރު، ބޯކޮށް ވާރޭވެހުމާއެކު ކަނޑުތައް ގަދަވެ އަދި ދިޔަވަރު ބޮޑުވާ ގަޑިތަކުގައި އުދަ އަރާނެކަމަށްވެސް ވަނީ ލަފާކޮށްފައެވެ.