މޯލްޑިވް ގޭސްއިން ވިއްކާ 45 ކިލޯގެ ގޭސްފުޅީގެ އަގު ހެޔޮކޮށްފި

މޯލްޑިވް ގޭސްއިން ވިއްކާ 45 ކިލޯގެ ގޭސް ފުޅީގެ އަގު ހެޔޮކޮށްފިއެވެ.

"ލިކުއިފައިޑް ޕެޓްރޯލިއަމް ގޭސް" ނުވަތަ 45 ކިލޯގެ ގޭސް ފުޅި އާއްމުގޮތެއްގައި ބޭނުންކުރަނީ ކެފޭ ރެސްޓޯރަންޓްތަކާއި ކާބޯތަކެތީގެ ކުދި ވިޔަފާރިތައް ކުރާ ފަރާތްތަކުންނެވެ.

މޯލްޑިވް ގޭހުން ވިދާޅުވީ 45 ކިލޯގެ ގޭސް ފުޅީގެ އަގު ހެޔޮކޮށްފައިވަނީ ކުދި ވިޔަފާރިތަކަށް އެހީވުމުގެ ގޮތުންކަމަށެވެ. އެގޮތުން ކުރިން 1260 ރުފިޔާއަށް ވިއްކި ގޭސް ފުޅީގެ އަގު ވަނީ 1170 ރުފިޔާއަށް ކުޑަކޮށްފައެވެ. އެހެންކަމުން މިއީ ކުރިއާ އަޅާބަލާއިރު 95 ރުފިޔާގެ ކުޑަވުމެކެވެ.

މޯލްޑިވް ގޭހުން ވިދާޅުވީ ކުދި އަދި މެދުފަންތީގެ ކާބޯތަކެތީގެ ވިޔަފާރިކުރާ ތަންތަނުން ހަފްތާއަކު، 45 ކިލޯގެ 1 ނުވަތަ 2 ގޭސް ފުޅި ގަންނަކަމަށެވެ. އެހެންކަމުން އަގަށް ގެނައި ބަދަލާ ގުޅިގެން ކުދި ވިޔަފާރި ހިންގާ ފަރާތްތަކަށް ފައިދާވާނެކަމަށް އެ ކުންފުނިން ވިދާޅުވެއެވެ.

މޯލްޑިވް ގޭހުން ވިދާޅުވީ އެ ކުންފުނިން އަބަދުވެސް މަސައްކަތް ކުރާނީ ކުންފުނީގެ ޚިދުމަތް ހޯދާ އެންމެހާ ފަރާތްތަކަށް އަތްފޯރާ އަގެއްގައި ލުއިފަސޭހަ ޚިދުމަތެއް ފޯރުކޮށްދިނުމަށްކަމަށެވެ.

ލިކުއިފައިޑް ޕެޓްރޯލިއަމް ގޭސް ނުވަތަ ކައްކާ ގޭހުގެ ގޮތުގައި 5 ސައިޒެއްގެ ގޭސް ފުޅި އެ ކުންފުނިން ވިއްކައެވެ. އަދި އެހެނިހެން 10 ބާވަތެއްގެ ޕްރޮޑަކްޓްވެސް އެ ކުންފުނިން ބާޒާރުގައި ވިއްކައެވެ.