މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ ދެވަނަ ބުރުގެ ޖާގައެއް މަޝްހޫރު ކުޅުންތެރިން ކަމުގައިވާ ޔަނިކް ސިނާ އާއި، ކާލޯސް އަލްކަރޭޒް އަދި ނޯވަކް ޖޮކޮވިޗް ހޯދައިފި އެވެ.
އެންމެ ފަހުގެ ޗެމްޕިއަން އަދި ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާގެ ގޮތުގައި މިވަގުތު ހުރި އިޓަލީގެ ޔަނިކް ސިނާ މި މުބާރާތުގެ ދެވަނަ ބުރުގެ ޖާގައެއް ހޯދާފައިވަނީ ޗިލީގެ ނިކޮލަސް ޖެރީ އާއި ދެކޮޅަށް ކުޅުނު މެޗު ހަތެއް ހައެއް, ހަތެއް ހައެއް އަދި ހައެއް އެކެއްގެ ނަތީޖާއަކުން މެޗު ކާމިޔާބު ކޮށްގެންނެވެ.
މި މެޗުގައި ސިނާ އާއި ދެކޮޅަށް ކުޅުނުޖެރީ ވަނީ 2020 ވަނަ އަހަރު ހެދި ޑޯޕިން ޓެސްޓަކަށް ޕޮޒިޓިވްވެ 11 މަސް ދުވަހަށް މީގެ ކުރިން ސަސްޕެންޑް ކޮށްފަ އެވެ. މިދިޔަ އަހަރު ހެދި ދެ ޓެސްޓަކުން ސިނާ ޕޮޒިޓިވް ވެފައިވީ ނަމަވެސް އޭނާއަށް އެފަދަ ފިޔަވަޅެއް އަޅާފައެއް ނުވެއެވެ. ނަމަވެސް އަންނަ އެޕްރިލް މަހު އޭނާގެ މައްސަލަ އިތުރަށް ބެލުމަށް ކޯޓް އޮފް އާބިޓްރޭޝަން (ކާސް) އިން ވަނީ ނިންމާފަ އެވެ.
މެޗަށްފަހު ވާހަކަ ދައްކަމުން ޖެރީ ބުނެފައިވަނީ ސިނާ އާއި ދެކޮޅަށް ކުޅެން ޖެހުމަކީ އުނދަގޫ ކަމެއް ކަމަށާއި އަދި ސިނާ އާއިމެދު އަމަލުކުރި ގޮތަށް އޭނާ އާއި މެދުވެސް އަމަލުކުރި ނަމައޭ ހިތަށް އަރާ ކަމަށެވެ. ނަމަވެސް ކުޅުންތެރިންނާއިމެދު ތަފާތު ކުރުން ގެންގުޅޭ ކަމަށް ޖެރީ ވަނީ ބުނެފަ އެވެ.
ދުނިޔޭގެ އެއްވަނަ ޓެނިސް ކުޅުންތެރިޔާގެ ގޮތުގައި ކުރިން ހުރި ސަރބިޔާގެ ނޯވަކް ޖޮކޮވިޗް މި މުބާރާތުގެ ދެވަނަ ބުރުގެ ޖާގައެއް ހޯދާފައިވަނީ އެމެރިކާގެ ޒުވާން ކުޅުންތެރިޔާ ނިޝެޝް އާއި ދެކޮލަށް ކުޅުނު މެޗު ވާދަވެރި ކުޅުމަކަށްފަހު ތިން ސެޓް އެއް ސެޓުން މެޗު ކާމިޔާބު ކޮށްގެންނެވެ.
މީގެ އިތުރުން ސްޕެއިންގެ ކާލޯސް އަލްކަރޭޒް މި މުބާރާތުގެ ދެވަނަ ބުރުން ފުރުސަތު ހޯދާފައިވަނީ ކަޒަކިސްތާނުގެ އެލެކްޒެންޑަރ ޝެވްޗެންކޯ އާއި ދެކޮޅަށް ކުޅުނު މެޗު ހައެއް އެކެއް, ހަތެއް ފަހެއް އަދި ހައެއް އެކެއްގެ ނަތީޖާއަކުން މެޗު ކާމިޔާބު ކޮށްގެންނެވެ.
މީގެ ކުރިން ހަތަރު ގްރޭންޑް ސްލޭމް މުބާރާތް ކާމިޔާބު ކޮށްފައިވާ އަލްކަރޭޒް މި މުބާރާތާއި ކުރިމަތިލާފައިވަނީ ފުރަތަމަ ފަހަރަށް އޮސްޓްރޭލިއަން އޯޕަން މުބާރާތް ކާމިޔާބު ކުރުމަށެވެ.