ރާއްޖޭގައިހުރި އިންވެސްޓްމެންޓްގެ ފުރުޞަތުތަކާ ބެހޭގޮތުން އަޒަރުބައިޖާނާއެކު މަޝްވަރާކޮށްފި

ރާއްޖޭގައިހުރި އިންވެސްޓްމެންޓްގެ ފުރުޞަތުތަކާ ބެހޭގޮތުން އަޒަރުބައިޖާނާއެކު ރާއްޖެއިން މަޝްވަރާކޮށްފިއެވެ.

މި މަޝްވަރާތައް ކޮށްފައިވަނީ އަޒަރުބައިޖާނު ސަރުކާރުގެ ހައި-ލެވެލް ވަފުދެއް ރާއްޖެއަށް މިހާރު ކުރަމުންދާ ދަތުރުފުޅުގެ ތެރެއިން ޚާރިޖީ ވުޒާރާއާއެކު ބޭއްވި ބައްދަލުވުމުގެ ތެރެއިންނެވެ.

ޚާރިޖީ ވުޒާރާއިން ވިދާޅުވީ އަޒަރުބައިޖާން ސަރުކާރު ތަމްސީލްކުރައްވާ ރާއްޖެ ވަޑައިގެން ހައި-ލެވެލް ވަފުދުގެ ބޭފުޅުންނަށް އަމާޒުކޮށްގެން ފޯރަމެއް ބާއްވާ އެކި ދާއިރާތަކުން ރާއްޖޭގައި އިންވެސްޓްކުރެވެންހުރި ފުރުޞަތުތަކާ ބެހޭގޮތުން މަޢުލޫމާތު ދީފައިވާ ކަމަށެވެ.

މި ފޯރަމްގައި ކަމާގުޅޭ ވުޒާރާތަކާއި ސަރުކާރު ހިއްސާވާ ކުންފުނިތަކުން ވަނީ ޕްރެޒެންޓޭޝަންތައް ހުށަހަޅާފައެވެ. މި ޕްރެޒެންޓޭޝަންތަކުގައި އިއާދަކުރަނިވި ހަކަތަ ބޭނުންކުރުމުގެ ދާއިރާއާއި ތިމާވެށްޓާއި ގެދޮރާއި ޢިމާރާތް އެޅުމާއި ރިއަލް އެސްޓޭޓްގެ ދާއިރާއާއި ދަތުރުފަތުރާއި މަދަނީ އުދުހުންތަކާއި ފަތުރުވެރިކަމާއި ލޮޖިސްޓިކްސްފަދަ ދާއިރާތަކުން އިންވެސްޓްކުރުމަށްހުރި ފުރުޞަތިތަކަށް އަލިއަޅުވާލިކަން ޚާރިޖީ ވުޒާރާއިން ފާހަގަކުރެއްވިއެވެ.

ޚާރިޖީ ވުޒާރާއިން ވިދާޅުވީ މި ފޯރަމް ވެގެންދިޔައީ އިޤުތިޞާދީ ގޮތުން ދެ ޤައުމުގެ ދެމެދުގައި ގުޅުން ބަދަހިވެގެންދިއުމުގެ އިތުރުން ދެ ޤައުމުގެ ގުޅުން އިތުރަށް ބަދަހިވެގެންދިޔަ ކަމަކަށް ކަމަށެވެ. އަދި ކުރިއަށް އޮތްތަނުގައިވެސް ގުޅިގެން މަސައްކަތްކުރުމުގެ ދޮރުތައް މި ފޯރަމްގެ ސަބަބުން ހުޅުވުނަކަމަށް ޚާރިޖީ ވުޒާރާއިން ވިދާޅުވިއެވެ.

އަޒަރުބައިޖާނުގެ ވަފުދަށް އަމާޒުކޮށްގެން ކުރިއަށްގެންދިޔަ ފޯރަމް ހުށައަޅައިދިނީ ޚާރިޖީ ވުޒާރާގެ އެމްބެސެޑަރ އެޓް ލާޖްގެ މަޤާމުގައި ހުންނެވި ޢަބްދުﷲ ހަމީދެވެ. އެމްބެސެޑަރ އެޓް ލާޖް ވާހަކަފުޅުގައި މި ފޯރަމްގެ ސަބަބުން އައު ޕްރޮޖެކްޓްތައް އިފްތިތާޙުކުރުމަށް އެހީވެދީ، ދެ ޤައުމުގެ އިޤުތިޞާދީ ގުޅުން އިތުރަށް ބަދަހިވުމަށް މަގުފަހިވާނެކަމަށް ވިދާޅުވިއެވެ. މި ފޯރަމްގައި ޚާރިޖީ ވުޒާރާގެ އިސްވެރިން ބައިވެރިވެވަޑައިގެންނެވިއެވެ.

އަޒަރުބައިޖާނުގެ ޑެޕިއުޓީ ފޮރިން މިނިސްޓަރު އެލްނޫރު މަމަދޮވް އިސްކޮށް ހުންނަވައިގެން ރާއްޖެއަށް ކުރައްވާ ރަސްމީ ދަތުރުފުޅުގައި އަޒަރުބައިޖާން ސަރުކާރުގެ ކަމާބެހޭ ވުޒާރާތަކުގެ އިސް ބޭފުޅުންނާއި، އަޒަރުބައިޖާންގެ އެކްސްޕޯޓް އެންޑް އިންވެސްޓްމަންޓް ޕްރޮމޯޝަން އޭޖެންސީ (އަޒްޕްރޯމޯ)ގެ އިސްވެރިންނާއި، ޕްރައިވެޓް ސެކްޓާގެ މަންދޫބުން ހިމެނިވަޑައިގަންނަވައެވެ.

މި ވަފްދުގެ ދަތުރުފުޅުގައި ދިވެހި ސަރުކާރުގެ ކަމާބެހޭ ވުޒާރާތަކާއި މަޝްވަރާކުރައްވައި، ރާއްޖޭގައި ހުރި އިންވެސްޓްމަންޓްގެ ފުރުސަތުތައް ދެނެގަތުމަށް ހަމަޖެހިފައިވާކަމަށް ދިވެހި ޚާރިޖިއްޔާއިން ވިދާޅުވެއެވެ. އަޒަރުބައިޖާނުގެ ވަފުދު މިހާރު ރާއްޖެއަށް ކުރަމުންދާ ދަތުރުފުޅު ނިންމާލުމަށް ހަމަޖެހިފައިވަނީ މިމަހުގެ 16 ވަނަ ދުވަހުއެވެ.