މި އަހަރުގެ ކްރިކެޓް ކަލަންޑަރާއެކު ގިނަ ހަރަކާތްތަކެއް ރޭވިފައިވާއިރު، މއީ ކްރިކެޓުގައި އުއްމީދީ އަހަރެއްގެ ކަމަށް ކްރިކެޓް ބޯޑް އޮފް މޯލްޑިވްސް (ސީބީއެމް) ގެ ނައިބު ރައީސް އަޙްމަދު އިސްހާގު ވިދާޅުވެއްޖެއެވެ.
ޕީއެސްއެމް ނިއުސް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން ސީބީއެމްގެ ނައިބު ރައީސް އިސްހާގު ވިދާޅުވީ އަހަރީ ކަލަންޑަރުގައި ގިނަ ހަރަކާތްތައް ހިމެނުމާއެކު، މި އަހަރަށް ކަނޑައެޅުނު ބަޖެޓު ފާސްކުރެވުނީ އެ ހަރަކާތްތަކަށް ބެލުމަށްފަހު ކަމަށެވެ. އަދި މި އަހަރުގެ ކްރިކެޓް ކަލަންޑަރުގައި މުހިންމު ހަރަކާތްތަކެއް މާލެ އާއި، ލ. ކުނަހަންދޫ އަދި ފުވައްމުލަކުގައި ހިންގުމަށް ހަމަޖެހިފައިވާ ކަމަށްވެސް ވިދާޅުވިއެވެ.
"ވައިޑީޕީ ޕްރޮގްރާމުތައް، ޒުވާނުން، ކުޑަކުދިން ކްރިކެޓަށް އަހުލުވެރިކުރުވުމަށް ވަކި ޚާއްސަ ޕްރޮގްރާމުތަކެއް ހިމެނޭނެ." އިސްހާގު ވިދާޅުވިއެވެ.
މި އަހަރުގެ ކަލަންޑަރުގައި ހިމެނޭ ހަރަކާތްތަކުގައި ތެރެއިން ކްރިކެޓް ބޯޑުން މުޅިން އަލަށް އެކެޑަމީއެއް ތައާރަފުކުރުމަށް ވަނީ ހަމަޖެހިފައެވެ. އެ އެކެޑަމީގެ ދަށުން ކުޑަކުދިންނަށް ކުރިއަށްގެންދާ ވައިޑީޕީގެ ހުރިހާ ހަރަކާތްތަކެއް ކުރިއަށްދާނެ ކަމަށް އިސްހާގު ވިދާޅުވިއެވެ.
މި އަހަރުގެ ކްރިކެޓް ކަލަންޑަރާއެކު ގިނަ ހަރަކާތްތަކެއް ރޭވިފައިވާއިރު، މުޅި އަހަރަށް ކްރިކެޓް ބޯޑުން ވަނީ 7.4 މިލިޔަން ރުފިޔާގެ ބޮޑު ބަޖެޓެއް ފާސްކޮށްފައެވެ.