އިންޑިއާގެ ގައުމީ ޓީމަށް ދެން ނަގާނީ ކުލަބު ކްރިކެޓް ކުޅޭ އަދި ފިޓް ކުޅުންތެރިން ކަމަށް ނިންމައިފިއެވެ.
މިއީ އިންޑިއާގެ ކްރިކެޓް ހަރުދަނާ ކުރުމަށާއި، ކުޅުންތެރިންގެ ގަވާއިދުތަކަށް ބަދަލު ގެނެސް، ގައުމީ ޓީމުގެ ނަތީޖާ ރަނގަޅު ކުރުމަށް އެޅި ފިޔަވަޅުތަކުގެ ތެރެއިން ބައެކެވެ.
އައު ގަވާއިދުގައި ނިންމާފައިވަނީ ހަމަޖެހިފައިވާ ވަގުތަށްވުރެ އަވަހަށް މެޗެއް ނުވަތަ މުބާރާތެއް އަދި ދަތުރެއް ނިމުނަސް، ޓީމުގެ އެއްވެސް މީހަކަށް ކަނޑައަޅާފައިވާ ވަގުތު ނުޖެހެނީސް ޓީމާ ވަކިވަކިން ނުދެވޭނެ ކަމަށެވެ. މިއީ ޓީމެއްގެ ގޮތުގައި ކުޅުންތެރިން ޑިސިޕްލިން ކުރުވުމަށް އެޅި އެންމެ މުހިންމު އެއް ފިޔަވަޅެވެ.
އިންޑިއާގެ ކްރިކެޓް ބޯޑުން ބުނީ މި ބަދަލުތަކުގެ ބޭނުމަކީ އެއް ކުޅުންތެރިންތެރިއަކު އަނެއް ކުޅުންތެރިޔަކާ މައްސަލަޖެހުން މަދުކުރުމާއި، ގުޅުން ބަދަހިކުރުން ކަމަށެވެ. މީގެ އިތުރުން މިހާރު ނިންމާފައިވަނީ ކުޅުންތެރިންނަށް އެމީހުންގެ އަމިއްލަ މުވައްޒަފުންނާ އެކުވެސް ދަތުރު ނުކުރެވޭ ގޮތަށެވެ. އެހެންވެ މީގެ ފަހުން ކުޅުންތެރިންގެ މެނޭޖަރުންނާއި، ޝެފުންނާއި، އެހީތެރިންނާއި، ސެކިއުރިޓީ ގާޑުންނަށްވެސް އެކުގައި ނުދެވޭނެ އެވެ. އެ ފަރާތްތަކަށް ކުޅުންތެރިނާ ބައްދަލުކުރެވޭނީވެސް އިންޑިއާގެ ކްރިކެޓް ބޯޑުގެ ހުއްދައާއެކުގައެވެ. އަދި ވަކިވަކިން ދަތުރުކުރުން މަނާކޮށް، ހުރިހާ ކުޅުންތެރިން ދަތުރުކުރަންޖެހޭނީ ޓީމާއެކު ބަހުގައި ކަމަށްވެސް ވަނީ ނިންމާފައެވެ. މިއީ ވެސް ޓީމުވަންތަކަން ބޮޑުކުރުމަށް އެޅި ފިޔަވަޅެކެވެ.
މީގެ އިތުރުން އެއް މަސް ދުވަހަށްވުރެ ދިގު މުބާރާތަކަށް ދާނަމަ ކޮންމެ ކުޅުންތެރިއަކު ގިނަވެގެން ގެންދެވޭނީ ފަސް ލަގެޖެވެ. އަދި އޮފިޝަލަކަށް ތިން ލަގެޖެވެ. ކުޅުންތެރިންނަށް ލިބޭނީ ގިނަވެގެން 150 ކިލޯ އެވެ. އެއަށްވުރެ ކުރު މުބާރާތެއްނަމަ ކުޅުންތެރިއަކަށް 120 ކިލޯ އަދި އޮފިޝަލުންނަށް ގެންދެވޭނީ 60 ކިލޯގެ ތަކެއްޗެވެ.
އިންޑިއާގެ ކްރިކެޓް ބޯޑުން މީގެ ކުރިން ނިންމާފައިވަނީ ކުޅުންތެރިން ޓީމާއެކު ތިބޭއިރު އާއިލާއާއެކު ހޭދަކުރަންދޭ ވަގުތުވެސް މިހާރަށްވުރެ ކުޑަކުރުމަށެވެ. ބޭނުމަކީ ކުޅުންތެރިން ޓީމަށް އިސްކަންދިނުން ބޮޑުކުރުމަށެވެ.
އިންޑިއާއިން މިހާރު ތައްޔާރުވަމުން ދަނީ އަންނަ ފެބްރުއަރީ މަހު ޕާކިސްތާނުގައި ފަށާ ޗެމްޕިއަންސް ޓްރޮފީ މުބާރާތަށެވެ.އެ މުބާރާތުގައި އިންޑިއާގެ މެޗުތައް ކުޅޭނީ ދުބާއީގައެވެ. ސަބަބަކީ ސިޔާސީ އަރައިރުންތަކާ ހެދި އިންޑިއާގެ ޓީމު ޕާކިސްތާނަށް ފޮނުވަން އެ ގައުމުގެ ސަރުކާރުން ބޭނުންނުވުމެވެ.