ހަތަރު ވަޒީރުންނަށްވެސް ރުހުންދޭން ކޮމިޓީން ފާސްކޮށްފި

ރައީސުލްޖުމްހޫރިއްޔާ ބައެއް ވުޒާރާތަކަށް ގެންނެވި ބަދަލުތަކާއެކު އަލުން ޢައްޔަންކުރެއްވި 4 ވަޒީރުންނަށް ރުހުން ދިނުމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ ކޮމިޓީން ނިންމައިފިއެވެ.

އެ ކޮމިޓީން މިގޮތަށް ނިންމާފައިވަނީ އަލަށް އައްޔަން ކުރެއްވި 4 ވަޒީރުންނަށް ރުހުން ހޯއްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ހުށަހަޅުއްވާފައިވާ މައްސަލައާ ގުޅިގެންނެވެ. ވަޒީރުންނަށް ޤާނޫނީ ހައިސިއްޔަތު ލިބިވަޑައިގަންނަވާނީ މަޖިލީހުން ރުހުން ލިބުމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވުޒާރާތަކަށް ބަދަލު ގެންނަވައި ވަޒީރުން ޢައްޔަން ކުރެއްވީ މިދިޔަ މަހުގެ 26 ވަނަ ދުވަހުއެވެ.

އެގޮތުން، މާލީކަންކަމާއި ތަރައްޤީގެ ރޭވުންތެރިކަމާބެހޭ ވުޒާރާއަށް މޫސާ ޒަމީރު ޢައްޔަންކުރައްވައި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއަށް ޑރ. ޢަބްދުﷲ މުއްޠަލިބް، މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއަށް ޑރ. ޢަލީ ޙައިދަރު އަޙްމަދު އަދި ދަނޑުވެރިކަމާއި ދިރޭތަކެއްޗާ ބެހޭ ވުޒާރާއަށް ޑރ. މަރްޔަމް މާރިޔާ ވަނީ ޢައްޔަންކުރައްވާފައެވެ.

4 ވަޒީރުން ޢައްޔަންކުރައްވައި، ވަޒީރުންނަށް ރުހުން ހޯއްދެވުމަށް ރައީސުލްޖުމްހޫރިއްޔާ ހުށަހެޅުއްވި މައްސަލަ މަޖިލީހުގެ ދައުރުން ބޭރުން މިދިޔަ ހަފުތާގައި ބޭއްވި ޖަލްސާގައި ވަނީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާކޮމިޓީއަށް ފޮނުއްވާފައެވެ. އެ ކޮމިޓީން މިއަދު ބޭއްވި ބައްދަލުކުރެއްވުމުގައި ވަނީ 4 ވަޒީރުންނަށްވެސް ރުހުން ދިނުމަށް ނިންމާފައެވެ.

ކޮމިޓީގައި ފުވައްމުލަކު މެދު ދާއިރާގެ މެންބަރު އަލީ ފަޒާދު ވިދާޅުވީ އަލުން ޢައްޔަންކުރި ނަމަވެސް 4 ވަޒީރުންނަކީވެސް މަޖިލީހުގެ ރުހުން ލިބިވަޑައިގެން ކުރިން ދައުލަތުގެ ވުޒާރާތަކަށް ޢައްޔަންކުރައްވައި މެދުކެނޑުމެއްނެތި ޚިދުމަތް ކުރައްވަމުންގެންދަވާ ވަޒީރުން ކަމަށެވެ. އަދި އެ މަޤާމުތައް އަދާ ކުރެއްވިއިރުވެސް ދައުލަތުގެ އިދާރާތަކުން ލިބިފައިވާ މައުލޫމާތުތަކުން އެއްވެސް ވަޒީރެއްގެ މައްސަލައެއް ނެތް ކަމަށެވެ. އެހެންކަމުން 4 ވަޒީރުންނަށްވެސް ރުހުން ދިނުމަށް ފެންނަކަމަށް ފަޒާދު ވިދާޅުވިއެވެ.

ފަޒާދުގެ ހުށަހެޅުމާއެކު 4 ވަޒީރުންނަށް ރުހުން ދިނުމަށް ފާސްވެފައިވަނީ ކޮމިޓީގެ ޖަލްސާގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.

ވަޒީރުންނަށް ރުހުން ދޭނީ ކޮމިޓީ ރިޕޯޓް ތަޅުމަށް ހުށަހެޅުމަށްފަހު މެންބަރުންގެ މެދުގައި ބަހުސްކޮށް، މެންބަރުންގެ މެދުގައި ނަގާ ވޯޓަކުންނެވެ.