ކާށިދޫން ފެނުނު އާސާރީ ތަރަހަ ދެނެގަތުމަށް ދިރާސާއެއް

މީގެ 5 ވަރަކަށް އަހަރު ކުރިން މާލެ އަތޮޅު ކާށިދޫން ފެނުނު އާސާރީތަނެއްގެ ތަރަހަ ދިރާސާކުރުމުގެ މަސައްކަތް ފަށައިފިއެވެ.

2020 ވަނަ އަހަރުގެ ތެރޭގައި ކާށިދޫން ފެނުނު ތަރަހަ ނުވަތަ ބިންގާ ފެނިފައިވަނީ އެރަށުގެ ކުރީގެ ހުކުރު މިސްކިތް ކޮނުމުގެ ތެރޭގައި އެތަނުގެ ތެރެއިންނެވެ.

ދިވެހި ބަހާއި ސަޤާފަތާއި ތަރިކައާ ބެހޭ ވުޒާރާއިން ވިދާޅުވީ އެވޭލާ ތަރަހައިގެ އިތުރުން އެ މިސްކިތް ހުރި ސަރަހައްދު ކޮނުމުގެ ތެރޭގައި އިތުރު އެހެން ތަކެތި ފެނިފައިވާކަމަށާއި، އެ ތަރަހައާއި އެތަނުން ފެނުނު އެހެނިހެން ތަކެތި ދިރާސާކުރުމުގެ މަސައްކަތް މިހާރު ކުރަމުންގެންދާކާމަށެވެ.

ކަމުގެ ތަޖުރިބާކާރުން ބެލުމުގެ ދަށުން އެސަރަހައްދު ދިރާސާ ކުރުމުގެ ފުރަތަމަ މަރުހަލާގެ މަސައްކަތް ކުރިއަށްގެންދަން ހަމަޖެހިފައިވަނީ މި ޖަނަވަރީ މަހުގެ 12އިން 24ގެ ނިޔަލަށްކަމަށް ދިވެހި ބަހާއި ސަޤާފަތާއި ތަރިކައާ ބެހޭ ވުޒާރާއިން ވިދާޅުވިއެވެ.

އެގޮތުން މި ދިރާސާގެ މަސައްކަތް ކުރިއަށްގެންދަނީ ސަގާފީ ތަރިކަ ރައްކާތެރިކުރާ ޤައުމީ މަރުކަޒާއި ޔުނިވަރސިޓީ އޮފް އީސްޓް އެންގްލިއާ އާއި ދިވެހިބަހުގެ އެކެޑަމީ އަދި މެރިޓައިމް އޭޝިޔާ ހެރިޓޭޖް ސަރވޭ ގުޅިގެންނެވެ. މި މަސައްކަތުގައި ތަރިކަރައްކާތެރިކުރާ ޤައުމީ މަރުކަޒުގެ މުވައްޒަފުންގެ އިތުރަށް ދިވެހިބަހުގެ އެކަޑަމީގެ މުވައްޒަފުންނާއި މެރިޓައިމް އޭޝިއާ ހެރިޓޭޖް ސަރވޭގެ ޓީމާއި ޔުނިވަރސިޓީ އޮފް އީސްޓް އެންގްލިއާ އިން މާސްޓާސް އިން ދަ އަރޓްސް އޮފް އެފްރިކާ، އޯޝަނިއާ އެންޑް ދަ އެމެރިކާސް ވިތު ސެއިންސްބަރީ ރިސާޗް ޔުނިޓްގައި ކިޔަވަމުންގެންދާ ދިވެހި ދެ ދަރިވަރުން ބައިވެރިވެއެވެ.

ދެ ހަފުތާގެ ދިރާސީ މި މަސައްކަތުގެ ތެރޭގައި ފަންނީގޮތުން ބިމުގެ އަޑީގައި ހުންނަ އާސާރީ ތަކެއްޗާމެދު އަމަލުކުރަންވީ ގޮތާއި، އެކަމުގެ އަސާސީ މިންގަނޑުތައް ބައިވެރީންނާ ހިއްސާކުރެވޭނެކަމަށް އެ ވުޒާރާއިން ވިދާޅުވެއެވެ.

ރާއްޖޭގެ އެކި ރަށްރަށުގައި ތަންތަން ކޮނުމުގެ ތެރޭގައި ތަފާތު އާސާރީ ތަކެއްޗާއި އެފަދަ ތަންތަނުގެ ތަރަހަ ފެނެއެވެ. އެގޮތަށް ފެންނަ ތަކެއްޗައި ތަރަހަތަކާއި އެސަރަހައްދުތަށް ސަޤާފީ ތަރިކަ ރައްކާތެރިކުރާ މަރުކަޒުންދަނީ ދިރާސާކޮށް ބަލަހައްޓައެވެ. އަދި އެފަދަ ހޯދުންތަކުގެ އަލީގައި ރާއްޖެއާ ގުޅޭ މުހިންމު މަޢުލޫމާތުތައްވެސް އެއްކޮށްފައިވެއެވެ.