ސިއްޙީ ނުރަނގަޅު އާދަތަކުން ދުރުހެލިކުރުވުމަށް، ފަރުވާގެ މުއްދަތުގައި ބާރުއަޅަނީ

މަސްތުވާތަކެތީގެ ވަބާގެ ޖެހިފައިވާ މީހުން އެކަމުން ސަލާމަތްކުރުމަށްޓަކައި ދެވޭ ފަރުވާގެ މުއްދަތުގައި ސިއްޙީ ނުރަނގަޅު ހުރިހާ އާދަތަކުން ދުރުހެލިކުރުވުމަށް، ބާރުއަޅައި މަސައްކަތް ކުރުމާއި ގުޅޭގޮތުން މަޝްވަރާކޮށްފިއެވެ.

މި މަޝްވަރާކޮށްފައިވަނީ ނޭޝަނަލް ޑްރަގް އޭޖެންސީ،އެންޑީއޭގެ ބޯޑުގެ މެންބަރުންނާއި، ދުންފަތް ކޮންޓްރޯލްކުރާ ބޯޑުގެ މެންބަރުންނާއި، ހެލްތު ޕްރޮޓެކްޝަން އޭޖެންސީ، އަދި ނޭޝަނަލް ޑްރަގް އޭޖެންސީގެ ވެރީންނާއި ފަންނީ މުވައްޒަފުންނާއެކު ބޭއްވެވި ބައްދަލުވުމެއްގައެވެ.

ނޭޝަނަލް ޑްރަގް އޭޖެންސީގައި ބޭއްވެވި މި ބައްދަލުވުމާ ގުޅޭގޮތުން އެންޑީއޭއިން ވިދާޅުވީ ފަރުވާގެ ޚިދުމަތް ހޯދާ ފަރާތްތައް ދުންފަތުގެ އިސްތިޢުމާލުކުރުމުން ދުރުހެލިވުމާއި، ފަރުވާދޭ މަރުކަޒުތަކަކީ ދުންފަތުގެ އިސްތިޢުމާލުކުރުމުން ރައްކާތެރި މާޙައުލެއްކަން ކަށަވަރުކުރުން މުހިންމުކަމަށެވެ.

އަދި ދުންފަތުގެ އިސްތިޢުމާލުކުރާ ފަރާތްތައް އެކަމުން ދުރުހެލިކުރުވުމުގެ ގޮތުން ކަމާ ގުޅޭ ތަމްރީންތައް ފުރިހަމަކޮށް ހުނަރުވެރި ބަޔަކަށް ހެދުމަށްޓަކައިވެސް ބައްދަލުވުމުގައި މަޝްވަރާކުރެވުނު ކަމަށް އެންޑީއޭއިިން މައުލޫމާތުދެއްވައެވެ.

އެންޑީއޭއިން ވިދާޅުވީ މަސްތުވާތަކެތި ބޭނުންކުރުމާއި ދެވިހިފުމުގެ ބަލި ތަޙައްމަލުކުރާ ގިނަ ފަރާތްތަކަކީ ދުންފަތުގެ ބާވަތްތަކަށްވެސް ދެވިހިފާފައިވާ މީހުންކަމަށެވެ.

ފަރުވާގެ މުއްދަތުގައި ދުންފަތުގެ ބާވަތްތަކާ ދުރުކުރުމަށް ބާރުއަޅައި މަސައްކަތް ކުރުމާއި ގުޅޭގޮތުން މަޝްވަރާކޮށްފަވާއިރު ދުންފަތް ކޮންޓްރޯލްކުރުމަށް މަސައްކަތްކުރުމަށް ޚާއްސަ މާސްޓަރ ޕްލޭނެއް އެކުލަވާލުމުގެ މަސައްކަތްކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ ނިންމަވާފައެވެ.

އެގޮތުން ދުންފަތް ކޮންޓްރޯލުކުރުމަށް ހަދާފައިވާ ޤާނޫނާއި ގަވާއިދުތައް ތަންފީޒުކުރުމާއެކު، ދުންފަތުގެ އިސްތިޢުމާލުކުރުމުގެ މައްސަލައަށް ދާއިމީ ހައްލެއް ހޯދުމަށް އެކި ފިޔަވަހިތަކަށް ބަހާލައިގެން މަސައްކަތް ކުރުމަށް ރައީސުލްޖުމްހޫރިއްޔާ ވަނީ ނިންމަފާވައެވެ.