ރަތް ކަނޑުން ދަތުރު ކުރާ އެމެރިކާއާއި އިނގިރޭސިވިލާތުގެ އާގުބޯޓުފަހަރުތަކަށް ޙަމަލާ ދިނުން މެދުކަނޑައިލުމަށް ޔަމަންގައި ހަރަކާތްތެރިވާ ހަތިޔާރު އެޅި ޖަމާޢަތް، ޙޫޘީން ނިންމާފައިވާ ކަން ހާމަކޮށްފިއެެވެ. މި ކަން ހާމަކޮށްފައި ވަނީ، ޔަމަންގެ ވެރިރަށް ޞަންޢާގައި ހުންނަ ހިޔުމެނިޓޭރިޔަން އޮޕަރޭޝަން ކޯޑިނޭޝަން ސެންޓަރ (އެޗްއޯއޯސީ)ންނެވެ. ޔަމަންގެ ނިކަމެތީންނަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތްތައް ވިލަރެސް ކުރާ އެ އިދާރާއަކީ ޙޫޘީންނާ ގާތް ގުޅުމެއް ބާއްވާ އިދާރާއެކެވެ.
ރަތް ކަނޑުގެ އިތުރުން ބާބް އަލް-މަންދަބީ ކަނޑާއި ޢަދަން ކަނޑުން ދަތުރު ކުރާ އުޅަނދުފަހަރާ ދެކޮޅަށް ޙޫޘީން އަސްކަރީ އޮޕަރޭޝަނެއް ފަށާފައި ވަނީ ފަލަސްޠީނުގެ ޣައްޒާގެ މުސްލިމުންނަށް ވާގިވެރިވުމުގެ ގޮތުންނެވެ. އެ ހަރަކާތްތައް ފަށާފައި ވަނީ، ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ލާއިންސާނީ ޖަރީމާތަކެއް ފެށުމާ ގުޅިގެންނެވެ. 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ފެށި ޢުދުވާނީ ޙަމަލާތައް މެދުކަނޑައިލާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީންނާ ދެމެދު ޖަނަވަރީ 19ވަނަ ދުވަހު އަމަލު ކުރަން ފެށި ސުލްޙައިގެ އެއްބަސްވުމެއްގެ ދަށުންނެވެ.
"އަޅުގަނޑުމެންގެ [އުޅަނދުތައް] ރަތް ކަނޑަށް އެނބުރި ދާނީ ސަލާމަތާއި ރައްކާތެރިކަން ކަށަވަރު ކުރެވޭނެ ކަން ޔަގީން ވުމުން،"ޖަރުމަނުވިލާތުގެ ކުންފުނި ހާޕަގް-ލޮއިޑް
ރަތް ކަނޑު ހުރަސްކޮށް ދަތުރު ކުރާ އެމެރިކާއާއި އިނގިރޭސިވިލާތުގެ އާގުބޯޓުފަހަރަށް ޙަމަލާ ދިނުން މެދުކަނޑައިލުމަށް ޙޫޘީން ނިންމާފައި މި ވަނީ، ޣައްޒާ ޢުދުވާން މެދުކަނޑައިލުމުގެ އެއްބަސްވުމަށް އަމަލު ކުރަން ފެށުމުންނެވެ. ޣައްޒާ ޢުދުވާން މެދުކަނޑައިލުމުގެ އެއްބަސްވުމަށް ޔަހޫދީން އަމަލު ކުރަމުންދާ ހިނދަކު، އެ ގޮތަށް އަމަލު ކުރަމުންދާނެ ކަމުގައި ވެސް ޙޫޘީންނާ ޙަވާލާދީ އެޗްއޯއޯސީން ހާމަކުރިއެވެ.
"އަޅުގަނޑުމެން ޔަޤީން ކޮށްދެން، ޔަމަންގެ ޖުމްހޫރިއްޔާއާ ދެކޮޅަށް އެމެރިކާއާއި އިނގިރޭސިވިލާތުގެ އަސްކަރިއްޔާއިން، އަދި ޔަހޫދީން، އަލުން ޙަމަލާ ދޭން ފަށައިފި ނަމަ، އެ މީހުންނާ ދެކޮޅަށް އަސްކަރީ ހަރަކާތްތައް އަލުން ފަށާނަން،" އެޗްއޯއޯސީން އިންޒާރު ކުރިއެވެ.
އެމެރިކާއާއި އިނގިރޭސިވިލާތުގެ އާގުބޯޓުފަހަރަށް ޙަމަލާތައް އަމާޒު ކުރުން ޙޫޘީން މެދުކަނޑައިލާފައިވީ ނަމަވެސް، ޒަޔަނިސްޓު އިސްރާއީލަށް މުދާ ގެންދާ އުޅަނދުފަހަރާއި، ޔަހޫދީންނާ ގުޅުން އޮތް އުޅަނދުފަހަރަށް ޙަމަލާތައް އަމާޒު ކުރުން މެދުކަނޑައިލަން އެ ޖަމާޢަތުން ނިންމާފައެއް ނެތެވެ. ޙޫޘީންނާ ޙަވާލާދީ އެޗްއޯއޯސީން ބުނީ، ޔަހޫދީންނާ ދެކޮޅަށް ފަށާފައިވާ އަސްކަރީ ކެމްޕޭން މެދުކަނޑައިލާނީ، ޣައްޒާ ޢުދުވާން މެދުކަނޑައިލުމުގެ އެއްބަސްވުމުގެ ހުރިހާ މަރުޙަލާތަކެއް ފުރިހަމަކޮށް ނިންމުމުން ކަމުގައެވެ.
ޙޫޘީންގެ ކެމްޕޭނާ އެކު ކަނޑުމަގުން މުދާ އުފުލުމަށް ހުރަސްތަކެއް
ޔަހޫދީންގެ އިތުރުން އެމެރިކާއާއި އިނގިރޭސިވިލާތާ ގުޅުން އޮތް އާގުބޯޓުފަހަރާ ދެކޮޅަށް ޙޫޘީން ވަރުގަދަ އަސްކަރީ ކެމްޕޭނެއް ފެށުމާ އެކު، ކަނޑުމަގުން މުދާ އުފުލުގެ ވިޔަފާރިއަށް ބޮޑު ހީނަރުކަމެއް ކުރިމަތިވިއެވެ. އަދި، ރަތް ކަަނޑުގެ ބަދަލުގައި، އެފްރިކާ ބައްރުގެ ދެކުނު ތަނޑިން ދަތުރު ކުރުމަށް މުދާ އުފުލާ ކުންފުނިތަަކަށް މަޖުބޫރުވިއެވެ. މިއާ އެކު، އެއް ތަނުން އަނެއް ތަނަށް މުދާ އުފުލުމަށް ބޮޑެތި ލަސްތަކެއް ކުރިމަތިވެ، މުދާ އުފުލާ ކުންފުނިތަކަށް ބޮޑެތި ޚަރަދުތަކެއް ކުރަން ޖެހުނެވެ. އަދި، ބޮޑެތި ތަކުލީފުތަކާ ކުރިމަތިލާން ޖެހުނެވެ. ފާއިތުވި 15 މަހެއްހާ ދުވަހުގެ ތެރޭގައި ޙޫޘީން ވަނީ 100އެއްހާ އުޅަނދަށް ޙަމަލާދީ، އޭގެ ތެރެއިން ދެ އުޅަނދު ފައްތައިލާފައެވެ. އަދި، އެއް އުޅަނދު ހިފަހައްޓާފައެެވެ. ޙޫޘީންގެ ޙަމަލާތަކުގައި އެ އުޅަނދުތަކުގައި މަސައްކަތް ކުރާ ހަތަރު ފަޅުވެރިން މަރުވިއެވެ.
ކަނޑުމަގުން މުދާ އުފުލުގެ ޚިދުމަތްދޭ ގިނަ ކުންފުނިތަކުން ބުނީ، އެމެރިކާއާއި އިނގިރޭސިވިލާތުގެ އުޅަނދުފަހަރަށް ޙަމަލާ ދިނުން މެދުކަނޑައިލާފައިވާ ކަން ޙޫޘީން އިޢުލާނު ކޮށްފައިވީ ނަމަވެސް، ރަތް ކަނޑުން ދަތުރުތައް ފެށުމަށް ނިންމާފައި ނުވާ ކަމުގައެވެ. ޖަރުމަނުވިލާތުގެ ކުންފުނި، ހާޕަގް-ލޮއިޑުން ބުނީ ރަތް ކަނޑުގެ ސަލާމަތީ ހާލަތު ވަރަށް ގާތުން ބަލަމުންދާ ކަމުގައެވެ. "އަޅުގަނޑުމެންގެ [އުޅަނދުތައް] ރަތް ކަނޑަށް އެނބުރި ދާނީ ސަލާމަތާއި ރައްކާތެރިކަން ކަށަވަރު ކުރެވޭނެ ކަން ޔަގީން ވުމުން،" އެ ކުންފުނިން ހާމަކުރިއެވެ.
އިންޝުއަރެންސްގެ ޚިދުމަތްދޭ ކުންފިނުތަކުން ވެސް ދަނީ ރަތް ކަނޑުގެ ހާލަތު ބަލަމުންނެވެ. އަދި، ރަތް ކަނޑު މި ވަގުތު ބޭނުން ކުރަމުންދާ އުޅަނދުފަހަރަށް އޮތް ނުރައްކަލުގެ ހާލަތު ވަޒަން ކުރުމަށް މަސައްކަތް ކުރަމުންނެވެ. ޙޫޘީންގެ އަސްކަރީ ކެމްޕޭނާ އެކު، ރަތް ކަނޑުން ދަތުރު ކުރާ އުޅަނދުފަހަރުގެ އިންޝުއަރެންސް ޚަރަދުތައް ވެސް އެތަކެއް ގުނައަކަށް އުފުލިގެން ދިޔައެވެ. މިއާ އެކު، ކަނޑުމަގުން މުދާ އުފުލުގެ ޚަރަދުތައް ވެސް އެތަކެއް ގުނައަކަށް ބޮޑުވެގެން ދިޔައެވެ.
2023 ނޮވެންބަރުގައި ޙޫޘީން ހިފެހެއްޓި ގެލެކްސީ ލީޑަރގެ ނަން ދީފައިވާ އުޅަނދު އަދިވެސް އޮތީ އެ ޖަމާޢަތުގެ ބެލުމުގެ ދަށުގައެވެ. އެ އުޅަނދުގައި ތިބި 25 ފަޅުވެރިން ވެސް ތިބީ ޙޫޘީންގެ ބެލުމުގެ ދަށުގައެވެ. "އެ އުޅަނދުގައި ތިބި ފިލިޕީންސާއި، މެކްސިކޯއާއި، ރޮމޭނިޔާއާއި، ބަލްގޭރިޔާ އަދި ޔޫކްރެއިންގެ ފަޅުވެރިން ތިބީ އެނބުރި ޤައުމަށް ދިޔުމަށް ކެތް މަދުވެފައި،" ގެލެކްސީ ލީޑަރގެ ބެލެނިވެރި ކުންފުނިން ހާމަކުރިއެވެ. ޣައްޒާ ޢުދުވާން މެދުކަނޑައިލުމުން އެ މީހުން މިނިވަން ކުރުން ގާތް ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.