"ރައީސްގެ ދަތުރުފުޅުތަކުގެ ސަބަބުން، ރައްޔިތުންގެ ޚިޔާލާއި މަޝްވަރާ ލިބި މަޝްރޫޢުތައް ހަލުއިވެއްޖެ"
-
ވަޒީރު ވިދާޅުވީ ރައީސްގެ ދަތުރުގައި ރައްޔިތުންގެ ޚިޔާލު ލިބިގެންދާކަމަށް
-
އަދި ސަރުކާރުން ކުރައްވަމުންގެންދަވާ ކަންކަމުގެ މަޢުލޫމާތު ސީދާ ރައްޔިތުންނަށް ލިބިގެންދާކަމަށް
ރައީސުލްޖުމްހޫރިއްޔާ އަތޮޅުތަކަށް ކުރައްވަމުންގެންދަވާ ދަތުރުފުޅުތަކުގައި ސީދާ ރައްޔިތުންގެ ޚިޔާލާއި މަޝްވަރާ ލިބި، މަޝްރޫޢުތައް ކުރިއަށްގެންދިޔުން ފަސޭހަވެ، ހަލުވިވެފައިވާކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
ރައީސުލްޖުމްހޫރިއްޔާ މާޅޮސްމަޑުލު އުތުރުބުރިއަށް ކުރައްވަމުންގެންދަވާ ދަތުރުފުޅުގެ ތެރެއިން ޕީއެސްއެމްނިއުސްއަށް ދެއްވި އިންޓަރވިއުއެއްގައި މާލީ ވަޒީރު މޫސާ ޒަމީރު ވިދާޅުވީ، ރައީސުލްޖުމްހޫރިއްޔާ ދަތުރުފުޅު ފެއްޓެވީ ރައްޔިތުންނަށް ބޭނުންވާ ކަންކަމާއި އެކަންކަން ކުރުމަށް ހުރި ފުރުސަތުތަކާ މެދު ވަޒީރުންނާއެކު މުހިއްމު މަޝްވަރާތަކެއް ބޭއްވުމަށްފަހުގައިކަމަށެވެ. މިގޮތުން ކުރައްވާ ދަތުރުފުޅުތަކުގައި ރައްޔިތުން ބޭނުންވާ ކަންކަން އަޑުއައްސަވާ އަދި އެމަނިކުފާނުގެ ސަރުކާރުން ރައްޔިތުންނަށް ކޮށްދެއްވަމުންގެންދަވާ ކަންކަމުގެ މަޢުލޫމާތު ސީދާ ރައްޔިތުންނާ ހިއްސާކުރެވޭނެ މަގު މިހާރު ފަހިވެފައިވާކަމަށެވެ.
އޭގެ ނަތީޖާއެއްގެ ގޮތުން ރައީސުލްޖުމްހޫރިއްޔާގެ މެނިފެސްޓޯގައި ހިމެނޭ ރައްޔިތުންނާ ގުޅުންހުރި ކަންކަން ފުރިހަމަކުރުމަށް ފަސޭހަވެގެންދާކަން ވަޒީރު ފާހަގަކުރެއްވިއެވެ. ވަޒީރު ވިދާޅުވީ މިދަތުރުތަކުގައި ކައުންސިލްގެ ފަރާތުން ލިބޭ ވަރަށް ރަނގަޅު އެއްބާރުލުމެއް ލިބިގެންދާކަމަށެވެ. އެހެންކަމން މިދަތުރަކީ މުހިއްމު ދަތުރުތަކެއްކަން ވަޒީރު ފާހަގަކުރެއްވިއެވެ.
"ވަޒީރުންވެސް މި ދަތުރުފުޅުތަކުގައި ބައިވެރިވާތީ، މެނިފެސްޓޯ ތަންފީޒްކުރުން އަވަސްވެ، ފަސޭހަވެގެންދޭ،" ވަޒީރު ޒަމީރު ވިދާޅުވިއެވެ.
ވަޒީރުވަނީ މިވީ 1 އަހަރުގެ ތެރޭގައި ހުއްޓިފައި ހުރި އެތައް މަސައްކަތްތަކެއް ކުރިއަށްގެންދެވިފައިވާކަން ފާހަގަކުރައްވާފައެވެ. އަދި ވަޞީލަތް ހުރި މިންވަރުން ޕީއެސްއައިޕީގައި ހުރި މުހިއްމު ކަންކަމަށް ސަރުކާރުން ހާއްސަ ތަރުތީބަކުން ކުރިއަށްގެންދަވާކަން ވަޒީރު ފާހަގަކުރެއްވިއެވެ.
މީގެއިތުރުން ސަރުކާރުގެ އަމާޒަކީ އިސްލާޙީ އެޖެންޑާގެ ދަށުން، ބަލްކް ޕްރޮކިއުމަންޓް އުސޫލުގެ ދަށުން ތަރައްޤީގެ މަޝްރޫޢުތަކަށް ބޭނުންވާ ވަޞީލަތްތައް ހަމަކުރުންކަމަށް ވަޒީރު ވިދާޅުވިއެވެ. މިކަން ކުރިއަށްގެންދަނީ އެމްޓީސީސީއާއި އެސްޓީއޯއާއި ހަވާލުކޮށްގެންކަމަށް ވަޒީރު ވިދާޅުވިއެވެ. އެހެންނަމަވެސް ރަށްގިރުމާއި މިނޫންވެސް މައްސަލަތައް ކުރިމަތިވެގެން ކުއްލިއަކަށް ކުރިއަށްގެންދަންޖެހޭ އެކި މަސައްކަތްތަކަށް ބޭނުންވާ ބޮޑުހިލައާއި އެނޫންވެސް ސާމާނު ގެނައުމުގެ މަސައްކަތް އެމްޓީސީސީ މެދުވެރިކޮށް ކުރިއަށްދާކަމަށް ވަޒީރު ވިދާޅުވިއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިއަދުވަނީ ރ.އަތޮޅުގެ 9 ރަށަކަށް ކުރައްވާ ދަތުރުފުޅެއް ފައްޓަވާފައެވެ. މިދިޔަ އަހަރަކީ ހުރިހާ ކައުންސިލްތަކާއި ބައްދަލުކުރެއްވުމުގައި މަސައްކަތް ކުރެއްވި އަހަރެކެވެ. އަދި މިއަހަރު ސީދާ ރައްޔިތުންނާއި ބައްދަލުކުރެއްވުމަށް އިސްކަމެއް ދެއްވާނެކަން އެމަނިކުފާނުވަނީ ފާހަގަކުރައްވާފައެވެ.