ކުރިއަށް އޮތް 2 އަހަރު ތެރޭ %71 ކައުންސިލް ޢިމާރާތް އައުކުރެވޭނެ: ވަޒީރު އާދަމް ޝަރީފް ޢުމަރު

ކުރިއަށް އޮތް 2 އަހަރު ދުވަހުގެ ތެރޭގައި ރާއްޖޭގެ ކައުންސިލްތަކުގެ %71 މުޅިން އައު ކައުންސިލް ޢިމާރަތްތަކަށް ބަދަލުކުރެވޭނެކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު ވިދާޅުވީ ރައީސުލްޖުމްހޫރިއްޔާގެ ދަތުރުފުޅުތަކުގައި ފާހަގަކުރެވުނު އެންމެ ބޮޑު އެއްކަމަކީ ކައުންސިލްތަކުގެ ޢިމާރާތްތައް ވީރާނާވާން ދޫކޮށްލެވިފައިވާ މަންޒަރުކަމަށެވެ.

ރައީސުލްޖުމްހޫރިއްޔާ ރ. އަނގޮޅިތީމަށް ކުރެއްވި ދަތުރުފުޅުގެ ތެރެއިން ޕީއެސްއެމް ނިއުސްއަށް ދެއްވި އިންޓަރވިއުގައި ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވީ، ލާމަރުކަޒީ ނިޒާމު ހަރުދަނާކޮށް ކައުންސިލްތައް ބާރުވެރިކުރުވުމާއެކު، މާލީގޮތުންވެސް ތަނަވަސްކަން ކައުންސިލްތަކަށް ހޯދައިދިނުމަކީ ރައީސުލްޖުމްހޫރިއްޔާ ޚާއްސަ އިސްކަމެއް ދެއްވާކަމެއްކަމަށެވެ.

ހަމައެއާއެކު އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކަށްވެސް މަސައްކަތްކުރެވޭނެ ފަހި މާޙައުލެއް ހޯއްދަވާދެއްވުމަށް ރައީސް އިސްކަންދެއްވާކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ރައީސުލްޖުމްހޫރިއްޔާ ރަށްރަށަށް ކުރައްވާ ދަތުފުޅުތަކުގައި އެންމެ ބޮޑަށް ފާހަގަކުރެވެނީ، ކައުންސިލްތަކުގެ ޢިމާރާތްތައް ބާވެ ވީރާނާވެފައިވާ މަންޒަރުކަމަށެވެ. އަދި އެތަންތަނަކީ ކައުންސިލަރުންނަށް މަސައްކަތް ކުރެވޭނެ މާޙައުލެއް ނޫންކަމަށް ވަޒީރު ވިދާޅުވިއެވެ.

"ރައީސްގެ ދަތުރުފުޅުގައި ފާހަގަކުރެވުނީ އެތަންތަނުގެ ހާލަތު ރަނގަޅުކުރުމަކީ މުހިއްމުކަމެއްކަން. އެހެންކަމުން ކުރިއަށް އޮތް 2 އަހަރު ދުވަހުގެ ތެރޭގައި ރާއްޖޭގެ ކައުންސިލްތަކުގެ 71 އިންސައްތަ މުޅިން އައު ކައުންސިލް ޢިމާރަތްތަކަށް ބަދަލުކުރެވޭނެ." ވަޒީރު ވިދާޅުވިއެވެ.

ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވީ، މިވަގުތު ކައުންސިލް ޢިމާރާތް ތަރައްޤީކުރުމުގެ 2 މަޝްރޫޢެއްގެ މަސައްކަތް ކޮންޓްރެކްޓަރ ފައިނޭންސިންގެ އުސޫލުން ފެށުމަށް ރާވާފައިވާކަމަށެވެ. އަދި ރައީސުލްޖުމްހޫރިއްޔާގެ މިދަތުރުފުޅުގެ ތެރެއިންވެސް މިފަދަ މަޝްރޫޢެއްގެ ބިންގާ އަޅުއްވާނެކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، ކައުންސިލްތައް ތަރައްޤީކުރުމުގައި އެންމެ ބޮޑަށް އިސްކަންދީފައިވާނީ އެންމެ ނިކަމެތިކޮށް ޙާލަތު ހުރި ކައުންސިލްތަކަށާއި، ކައުންސިލްތަކަށް ޚިދުމަތް ހޯދުމަށް އަންނަ އާބާދީގެ ނިސްބަތާއި އަދި ލޮޖިސްޓިކް އުސޫލަށް ބަލާއިރު އެންމެ ފަސޭހައިން މަޝްރޫޢުތައް އެއްފަހަރާ ކުރިއަށް ގެންދެވޭނެ ގޮތަށްކަމަށެވެ.

ކައުންސިލްތައް ތަރައްޤީކުރުމަށް ކުރިއަށްގެންދާ މަސައްކަތުގެ ދަށުން 1 ފަންގިފިލާއަށް ޢިމާރާތްކުރާ ތަންތަން އަހަރެއްގެ ތެރޭގައި އަދި 2 ފަންގިފިލާއަށް ތަރައްޤީކުރާ ތަންތަން ދޮޅު އަހަރުގެ ތެރޭގައި ނިމޭނެކަމަށް ލަފާކުރައްވާކަމަށް ސަރުކާރުން ވިދާޅުވެއެވެ.

ކައުންސިލްތައް ތަރައްޤީކުރުމަށް ކުރިއަށްގެންދާ 55 ކައުންސިލެއް ތަރައްޤީކުރުމަށް މިމަޝްރޫޢު ކުރިއަށްގެންދަނީ ދައުލަތުގެ ބަޖެޓުން 36 މިލިއަން ޑޮލަރު ޚަރަދުކޮށްގެންނެވެ. އަދި މި މަސައްކަތް ކުރުމަށް ހަމަޖެހިފައިވަނީ މެލޭޝިއާގެ ހެކްސްޓަރ ގްލޯބަލް ނަމަކަށް ކިޔާ ކުންފުންޏަކާއި ހަވާލުކޮށްގެންކަމަށް ސަރުކާރުން ވިދާޅުވެއެވެ.